شىعىس جەكپە-جەگى - تاەكۆوندو ونەرىن قازاق ەلىنە الىپ كەلگەن قابىلان ۇل مۇستافا وزتۇرىك ەدى. قازىر قازاقستاندا مۇستافا مەكتەبى قالىپتاسىپ، تالاي تارلان جىگىتتەر وسى مەكتەپتەن شىعىپ جاتىر دەپ بەك سەنىمدى تۇردە ايتا الامىز. جىگىتتەر عانا ەمەس، مۇستافا مەكتەبىنەن قىزدارىمىز دا ءتالىم الىپ، شىڭدالۋ ۇستىندە. مۇستافا وزتۇرىكتەي اعالارى جول سالىپ بەرگەن سوڭ با، تاەكۆونداعا دەگەن الاش بالاسىنىڭ قىزىعۋشىلىعى الابوتەن. مىنە، ريو وليمپياداسىندا قازاق ەلىنىڭ تۋىن ۇستاپ باراتىن وعلانننىڭ ەسىمى دە بەلگىلى بولدى.  ول - تاەكۆونداشى رۋسلان جاپاروۆ.  رۋسلانمەن بىرگە اينۇر ەسبەرگەنوۆا مەن جانسەل  دەنيز دە شىعىس جەكپە-جەگى بويىنشا وتەتىن ويىندا ەل نامىسى ءۇشىن باسەكەگە تۇسپەك. "قىزدار اراسىنداعى باسەكەدە سىنعا تۇسەتىن قىزىلوردالىق 18 جاستاعى اينۇر ەسبەرگەنوۆا - جاس تا بولسا ءبىراز بيىكتەردى باعىندىرىپ ۇلگەرگەن تالانتتى سپورتشىلاردىڭ ءبىرى" دەپ جازادى Nur.kz سايتى (https://www.nur.kz/kk/1199153-turkiyada-tughan-qazaq-qyzy-olimpiadad.html).

ال، جانسەل دەنيز  (سۋرەتتە)... بۇل سپورتشىنىڭ ەسىمى  ەلىمىزدەگى سپورت جانكۇيەرلەرىنە اسا تانىس ەمەس دەۋگە بولادى. سەبەبى، جانسەل - تۇركيادا دۇنيەگە كەلگەن قازاق قىزى.  

جانسەل دەنيز 25 جاستا (26/08/1991), تۇركياداعى قازاق وتباسىندا تۋعان. ءىرى جەڭىستەرى بولماسا دا ءتۇرلى حالىقارالىق جارىستاردىڭ جۇلدەگەرى. 2013 جىلى رەسەيدىڭ چەليابينسك قالاسىندا وتكەن اشىق ءتۋرنيردىڭ جەڭىمپازى، ەۋروپا چەمپيونى. تۇركيانىڭ سەگىز دۇركىن چەمپيونى، Austrian Open ءتۋرنيرىنىڭ ەكى مارتە كۇمىس جانە قولا جۇلدەسىن ەنشىلەگەن، Russian Open جەڭىمپازى، Dutch Open مەن Trelleborg Open جارىستارىنىڭ قولا جۇلدە يەسى، Ukraine Open جانە Moldova Open تۋرنيرلەرىنىڭ ەكى مارتە كۇمىس مەدالىن ولجالاعان.

ول وليمپياداعا دەيىن +67, +73 سالماقتاردا سىنعا ءتۇسىپ كەلگەن. جانسەل - تۇركيا قازاقتارى اراسىندا  مۇستافا وزتۇرىك باستاعان تاەكۆوندو جولىن جالعاستىرۋشىلاردىڭ ءبىرى. 2014 جىلدىڭ سوڭىندا قازاقستان ازاماتتىعىن العان جانسەل دەنيز وليمپيادادا +67 كەلى سالماقتا ونەر كورسەتەدى.

 ول ريو وليمپياداسىنا جولدامانى فيليپپين ەلىنىڭ مانيلا قالاسىندا وتكەن ازيا قۇرلىعى بويىنشا ىرىكتەۋ تۋرنيرىندە جەڭىپ العان بولاتىن.

«العاشقى قاتىسقالى وتىرعان وليمپيادامدا العاش رەت قازاق ەلىنىڭ تۋىن جەلبىرەتىپ شىققالى تۇرمىن. وزگە ەلدە تۋسام دا، ءوز ەلىم اتىنان وليمپياداعا بارۋ مەن ءۇشىن ەڭ ۇلكەن قۋانىش. ەندىگى ماقسات - ۇلت نامىسىن ۇياتقا قالدىرماۋ. قازىر وسى ماقساتقا جەتۋ ءۇشىن بارىنشا تەر توگىپ جاتتىعىپ جاتىرمىن. ارمانىم ريودا جەڭىس تۇعىرىنان كورىنىپ، ەل ءۇمىتىن اقتاۋ»، - دەدى جانسەل 

مۇستافا جولىن جالعاستىرۋعا تاۋەكەل ەتكەن قارىنداسىمىزىعا ساتتىلىك سەرىك بولسىن!

Abai.kz