الانيا قالاسى اكىمشىلىگىنىڭ رەسمي سايتى ءمينيستردىڭ اكتسيادا سويلەگەن سوزدەرىن باسقان. وندا چاۆۋشوگلۋ 15-16 شىلدەدە مەملەكەتتىك توڭكەرىس جاساماق بولعان ادامدار جاۋاپقا تارتىلادى دەگەن.

ول سونىمەن بىرگە تۇركيا بيلىگىن الەمنىڭ بىرقاتار ەلدەرى قولداپ وتىر دەگەن. ونىڭ سوزدەرىنشە، تۇركيا ەندى گۇلەنمەن قانداي دا ءبىر بايلانىس جاسايتىن ەلدەرمەن قارىم-قاتىناستى دوعارادى. سوماليدە گۇلەن جاقتاستارىن ءبىر اپتانىڭ ىشىندە ەلدەن كەتۋدى سۇرادى. سولتۇستىك كيپر گۇلەن قورلارى تەرروريستىك ۇيىمداردىڭ تىزىمىنە ەندى. ء«ازىربايجان جانە باسقا ەلدەر اتالعان شارالاردى قولعا الىپ جاتىر. مەن قىرعىزستاننىڭ سىرتقى ىستەر مينيسترىنە قوڭىراۋ شالدىم. مەن وعان ەگەر گۇلەن جاقتاستارىنا قارسى شارا قولدانباساڭدار، ءبىزدىڭ قارىم-قاتىناسىمىز وزگەرەدى دەدىم. كەزىندە ءبىز قىرعىز ەلىنە ءبىلىم بەرۋ سالاسىندا كومەكتەستىك. بىراق گۇلەن جوسپارى باسقا بولىپ شىقتى»، - دەيدى چاۆۋشوگلۋ.

ەسكە سالا كەتەيىك، 16 شىلدەگە قاراعان ءتۇنى تۇركيادا اسكەر توڭكەرىس ارەكەتى بولدى. بىراق بيلىك دەر كەزىندە ولاردى باسىپ تاستادى. بۇلىككە قاتىسى بار دەپ بىرنەشە مىڭداعان جوعارى لاۋازىمدى شەنەۋنىكتەر، اسكەري قىزمەتكەرلەر، سۋديالار ۇستالدى. وسىدان كەيىن تۇركيادا 43 مىڭ جەكەمەنشىك مەكتەپ، مىڭداعان قورلار، ونداعان دەنساۋلىق ساقتاۋ مەكەمەلەرى جانە 15 جوعارى وقۋ ورنى جابىلدى. ولاردىڭ ءبارى دا گۇلەنگە قاتىسى بار دەپ كۇدىككە ىلىنگەن.

تۇركيا بيلىگى اسكەري توڭكەرىستى اقش-تا تۇراتىن فەتحۋللاح گۇلەن جاساماق بولدى دەيدى. رەسمي انكارا اقش بيلىگىنەن ونى ەكستراديتسيالاۋدى سۇرادى. ءوز كەزەگىندە 75 جاستاعى گۇلەن بۇلىك ارەكەتىنە قاتىسى بارىن جوققا شىعارادى.

اباي-اقپارات