ازىرگە بۇل ادامنىڭ اتى-ءجونى بىزگە بەلگىسىز بولىپ تۇر. ول قازىر شىمكەنت قالاسى، ورداباسى اۋداندىق ىشكى ىستەر باسقاراماسىندا كۇدىكتى رەتىندە تەرگەۋگە الىنعان. كۇدىكتىنىڭ بالا ۇرلىعىنا قاتىسى بار كورىنەدى.

ەستەرىڭىزگە سالا كەتەيىك، شىمكەنت قالاسىندا مۇحامەد قامشىبەك دەگەن بالا جوعالىپ كەتىپ تابىلدى. بالانىڭ تابىلۋىنا سەبەپكەر بولعان الەۋمەتتىك جەلىنى تۇتىنۋشى كەشە 31 ارنانىڭ جاڭالىقتار قىزمەتىنە ءجۇزىن جاسىرىپ، سۇحبات بەردى. ويتكەنى كۋاگەر ۇرەي قۇشاعىندا. سىرتقا شىعۋعا قورقادى. سەبەبى بار. سەبەبى – كۋاگەردى مىنا سۋرەتتەگى ازامات: «سەن ءبىزدى كورگەن جوقسىڭ. كوردىم دەي قالساڭ  2 جاستاعى سابيىڭنەن ايرىلاسىڭ»، - دەپ قورقىتقان. الايدا، ءۇنسىز قالۋعا ءداتى شىداماعان ول ءبارىبىر ءىىب قىزمەتكەرلەرىنە حابارلاسىپ، ءمان-جايدى ايتادى دا جەكە باسىنىڭ قاۋىپسىزدىگىن سۇرايدى. كۋاگەر پوليتسيا قىزمەتكەرلەرى قاراپايىم كيىممەن، جان بالاسىنا سەزدىرمەي كەلىپ حابارلاساتىن شىعار دەپ كۇتەدى. بىراق، ورداباسى ءىىب قىزمەتكەرلەرى ءبىر توپ بولىپ جانە اۆتوكولىكتەرىنىڭ دابىلىن وزانداتىپ جەتىپ كەلەدى. «ولاردىڭ بۇل كەلىسى مەنىڭ جاعدايىمدى قيىنداتىپ جىبەردى. پوليتسەيلەردىڭ پاتەرىمە باس سۇققانىن كورشىلەرىم تەگىس كوردى. اينالانى تورىپ جۇرگەن كۇدىكتىلەر دە كورۋى مۇمكىن. سوندىقتان دا سىرتقا اتتاپ باسا الماي وتىرمىن»، - دەيدى كۋاگەر.

كۋاگەردىڭ ايتۋىنشا، ول ءوزى جالداپ تۇراتىن ەكى بولمەلى پاتەردىڭ ءبىر بولمەسىنە جامباسپۇلىن تولەپ شىعاتىن ادامداردى جىبەرەدى ەكەن. ءسويتىپ، پاتەردىڭ جالدىق اقىسىن ايرىپ وتىرادى. مىنا جارناما بويىنشا وعان ءبىر ەر ادام حابارلاسادى.

حابارلاسقان ادامدار بىرەر ساعاتتان سوڭ  اۋلاعا كەلىپ جەتكەندەرىن ايتادى. كۋاگەردىڭ پاتەرىنە الدىمەن اياعىن ءسال سىلتىپ باسىپ مىنا كەيۋانا كەلەدى.

 كەيۋانا كەيپىندەگى ايەل قاسىندا نەمەرەسى بار ەكەندىگىن، مۇمكىن بولسا، وسىندا بىرەر تۇنەپ شىعاتىندارىن بىلدىرەدى. وسى كەزدە ونىڭ ۇيالى تەلەفونىنا ءبىر ايەل قوڭىراۋ شالىپ: «بالانى تەز اكەلىڭدەر!» - دەپ دىگىرلەيدى. ال، قازىر كۇدىكتى رەتىندە ۇستالعان ايەل: «قۇجاتى بولماعاندىقتان بالانى پويىزبەن الىپ ءجۇرۋ مۇمكىن ەمەس ەكەن. اۆتوبۋسپەن شىعامىز. كۇت»، - دەيدى. بەيتانىس ايەلدىڭ سوزىنەن  كۇدىكتەنگەن كۋاگەر قۇجات سۇرايدى. قۇجات ماسەلەسى قوزعالعاندا الگى ايەل تەز جينالىپ شىعۋعا بەت الادى. پاتەر يەسى (ونىڭ ەسىمىن ازىرگە ا دەپ قويالىق) – ا جاسى ۇلكەن كىسى عوي دەپ، ايەلدى شىعارىپ سالادى. شىعارىپ سالعاندا كورەدى: اۋلادا ايەلدى كۇتىپ تۇرعان ماشينانىڭ ىشىندە ەكى-ءۇش ادام جانە كىشكەنە بالا وتىرادى. «نەمەرەڭىز وسى بالا ما؟» - دەپ سۇرايدى ا. ء«يا، وسى» - دەيدى كەمپىر. كەمپىردىڭ سوزىنە ىلەسە ماشينادان شىققان ەر ادام: «قارىنداس، ايەلىممەن رەنجىسىپ قالىپ ەدىم. سودان سول، شەشەممەن بالامدى ەرتىپ الىپ قونالقى جەر ىزدەپ ءجۇرمىز» - دەگەندى ايتادى. ارتىنشا  ا-نىڭ پاتەرىندەگى دوموفون ارقىلى قوڭىراۋ سوعىپ جوعارىداعىداي ەسكەرتۋ جاسايدى:  «سەن ءبىزدى كورگەن جوقسىڭ. كوردىم دەي قالساڭ 2 جاستاعى سابيىڭنەن ايرىلاسىڭ».

كۋاگەر ءىىب قىزمەتكەرلەرىنە بالانى ۇرلاپ ماشيناعا سالىپ جۇرگەندەردىڭ اۋزىنان قايتا-قايتا ارىس قالاسى تۋرالى ەستىگەنىن، ولاردىڭ شامامەن ارىس قالاسىنا كەتۋى مۇمكىن ەكەندىگىن ەسكەرتەدى. دەگەندەي-اق، قۇقىق قورعاۋ قىزمەتكەرلەرى مۇحامەد قامشىبەكتى ارىس قالاسىنان تاۋىپ الادى. قالعان جايت وقيعانىڭ بارىسىنان حاباردار وقىرمانعا تۇسىنىكتى شىعار دەپ ويلايمىز. مىنا سىلتەمەلەردى اشىپ قاراڭىز: http://abai.kz/post/view?id=6876; http://abai.kz/post/view?id=6903.

كۋاگەر التى جاستاعى مۇحامەدتى ۇرلاپ جۇرگەندەر ءبىر كەمپىر، ءبىر ەر ادام ەمەس، ۇيىمداسقان توپ بولۋى مۇمكىن ەكەندىگىن جوققا شىعارمايدى. سەبەبى: ولار بالانى الماتى قالاسىنا اپارىپ تاستاۋدىڭ ارەكەتىندە بولعان. كۇدىكتىنىڭ سۋرەتى ازىرگە تەك ءبىزدىڭ پورتالدا عانا جاريا كوردى. سۋرەتتىڭ بەتىندە كاۋگەر ا مەن ورداباسى اۋداندىق ءىىب قىزمەتكەرلەرىنىڭ ۆاتتساپپەن حابارلاسىپ جازىسقان سوزدەرىن وقي الاسىزدار.

قىسقاسى، مىنا ادام كىم؟ ونىڭ اتى-ءجونى نەگە وسى ۋاقىتقا دەيىن قۇپيا؟ ول قاماۋدا ما، الدە بوستاندىقتا ما؟ پوليتسيا قىزمەتكەرلەرى بالا ۇرلىعىنا نەگە تەك موسقال ايەلدى عانا كىنالاپ وتىر؟ سۇراقتاردىڭ جاۋابىن الداعى كۇندەردەن كۇتەمىز.

Abai.kz