اقتوبەدە سيرياعا كەتپەك بولعان ازاماتتار ۇستالدى
اقتوبەدە سيرياعا بارىپ، ونداعى سوعىسقا قاتىسۋدى كوزدەدى دەگەن كۇدىكپەن ونشاقتى ادام ۇستالعان. بۇل تۋرالى «ازاتتىق» راديوسى حابارلايدى.
اقتوبە وبلىستىق پروكۋراتۋراسى 19 اقپان كۇنى سيرياعا اتتانباق بولعان 11 ادامنىڭ ۇستالعانىن مالىمدەدى.
اقتوبە وبلىستىق پروكۋراتۋراسىنىڭ سايتىندا جاريالاعان اقپاراتتا «ولاردىڭ بارلىعى سيريا اراب رەسپۋبليكاسى اۋماعىنداعى سوعىس ءجۇرىپ جاتقان ايماقتاردا قارۋلى قاقتىعىسقا قاتىسۋعا كەتپەك بولعان. قازاقستان زاڭدارىنا ساي بۇل ازاماتتاردىڭ ارەكەتتەرى قىلمىس بولىپ سانالادى» دەپ جازىلعان.
قازاقستان بيلىگىنىڭ دەرەگى بويىنشا، يراك پەن سيريانىڭ ەكسترەميستەردىڭ قولىنداعى اۋماقتارعا كەتكەن قازاقستاندىقتاردىڭ سانى 400-ءدىڭ شاماسىندا. اقش كونترتەررورلىق ورتالىعىنىڭ مالىمەتىنشە، «يسلام مەملەكەتى» توپتارىنا مۇشە بوپ كەتكەن قازاقستان ازاماتتارىنىڭ سانى مىڭعا جەتەدى.
اباي-اقپارات
