ورتالىق سايلاۋ كوميسسياسى 7 پايىزدىق مەجەدەن كوپ داۋىس جيناعان ءۇش پارتيا اراسىندا پارلامەنت ماجىلىسىندەگى دەپۋتاتتىق مانداتتاردى ءبولۋ تۋرالى قاۋلى قابىلدادى دەپ حابارلايدى قازاقپارات.

بارلىق وبلىستارداعى، استانا جانە الماتى قالالارىنداعى اۋماقتىق سايلاۋ كوميسسيالارىنىڭ مالىمەتتەرىنە سۇيەنسەك، سايلاۋدا تىزىمگە ەنگەن 9 ملن 810 مىڭ سايلاۋشىنىڭ 7 ملن 966 مىڭى داۋىس بەرگەن.

سونىڭ ىشىندە، «نۇر وتان» پارتياسى ءۇشىن 6 ملن 183 مىڭ 757 ادام (82,20 پايىز) داۋىس بەرگەن.

قازاقستاننىڭ «اق جول» دەموكارتيالىق پارتياسى ءۇشىن 540 406 (7,18 پايىز)ادام داۋىس بەرگەن.

«اۋىل» پارتياسى ءۇشىن 151 285 ادام (2,01 پايىز) داۋىس بەرگەن.

قازاقستان كوممۋنيستىك حالىق پارتياسىنا 537 123 داۋىس نەمەسە 7,14 پايىز.

جالپىۇلتتىق سوتسيال-دەموكراتيالىق پارتياسىنا 88 813 ادام داۋىس (1,18 پايىز) بەرگەن.

«بىرلىك» ساياسي پارتياسىنا 21 484 (0,29 پايىز) ادام داۋىس بەرگەن.

«داۋىس بەرۋگە قاتىسقان سايلاۋشىلاردىڭ 7 جانە ودان كوپ پايىز داۋىسىن جيناعان ءۇش پارتيا، «نۇر وتان»، «اق جول» جانە قازاقستان حالىق كوممۋنيستىك پارتياسى» انىقتالىپ وتىر. زاڭعا سايكەس، وسى ءۇش پارتيا پارلامەنت ماجىلىسىنە ءوز كانديداتتارىن ۇسىنادى. بۇل ساياسي پارتيالار اراسىندا دەپۋتاتتىق مانداتتار كەلەسىدەي ءبولىنسىن:

«نۇر وتان» پارتياسىنا 84 ماندات;

«اق جول» پارتياسىنا 7 ماندات;

قازاقستان حالىق كوممۋنيستىك پارتياسىنا - 7 ماندات", - دەپ ءمالىم ەتتى بۇگىن ورتالىق سايلاۋ كوميسسياسىندا وتكەن بريفينگ بارىسىندا كوميسسيا توراعاسى قۋىندىق تۇرعانقۇلوۆ.

سونىمەن قاتار قازاقستان حالقى اسسامبلەياسىنىڭ اتىنان پارلامەنت ماجىلىسىنە سايلانعان دەپۋتاتتاردىڭ اتى-ءجونى دە بەلگىلى بولدى.

قحا اتىنان ماجىلىسكە سايلانعان دەپۋتاتتار:

ساۋىتبەك ابدراحمانوۆ، ۆلاديمير كارپوۆيچ بوجكو، ناتاليا ۆاسيلەۆنا جۇمادىلداەۆا، رومان ۋكەنوۆيچ كيم، نارينە گاملەتوۆنا ميكاەليان، احمەت سەيداراحمانوۆيچ مۋرادوۆ، شايماردان ۋساينوۆيچ نۋرۋموۆ، يۋري ەۆگەنيەۆيچ تيموششەنكو، شاكير حۋساينوۆيچ حاحازوۆ.

Abai.kz