دومبىرانىڭ ەڭ كونە اسپاپ ەكەنى بىلاي دا كورىنىپ تۇرعان جوق پا؟ ءون بويىندا مىسقالداي تەمىر، نە، مىس جوق. اعاش پەن شەك-تابيعي دۇنيەلەر. و باستا، دومبىرانى بابام تابيعاتپەن تىلدەسۋ ءۇشىن ويلاپ تاپسا كەرەك؟ سودان بەرى، ەشتەڭەنى وزگەرتپەي سول قالپىندا ۇستاپ كەلەدى. سوندىقتان دا مەن "نار يدىرگەنگە" سەنەمىن.

ال، "قىز جىبەك" ءفيلمىن ءتۇسىرىپ جاتقانداعى وقيعا شە؟ اققۋلار رەجيسسەرگە باعىنباي، سۋ بەتىنە قونباي قويادى عوي. سول كەزدە نۇرعيسا اعام دىبىس كۇشەيتكىشتى قوسىپ، "اققۋ" كۇيىن توكپەي مە؟ كۇيدىڭ سازىنا ەلتىگەن اققۋلار ءۇيىرىلىپ كەلىپ، كامەرانىڭ الدىندا وزدەرى "ويناپ" بەرىپتى. دومبىرانىڭ ءۇنى-تابيعاتتىڭ ءتىلى دەگەن وسى.

وسىنداي وقيعالار كوپ پە؟ اڭىزدار، بارشىلىق ارينە. ال، سىزدەر ءوز كوزدەرىڭىزبەن نە كوردىڭىزدەر؟ دومبىراعا قۇر تامسانا بەرگەنشە، ءومىردىڭ ءوزى تۋدىرعان دالەلدەرگە ءبىر مەزگىل كەزەك بەرەيىكشى. ايتىڭىزدار. ودان مىناداي ماسەلە تۋادى: اكۋستيك ماماندار ءاربىر زاتتىڭ، دەنەنىڭ، ءار قيمىلدىڭ وزىندىك دىبىس شىعاراتىنىن جاقسى بىلەدى. تابيعات - تولىقتاي ۇندەستىكتەن تۇرادى، ءوزى. بالكىم، جالپى دۇنيەگە ورتاق ءۇن، دىبىس، ءتىل بار شىعار؟ گوللانديالىق فەرمەرلەر مۋزىكا تىڭداپ تۇرعان ساۋىن سيىردىڭ ءسۇتتى اناعۇرلىم كوپ بەرەتىنىن انىقتادى ەمەس پە؟ مۋزىكانىڭ قۇدىرەتىن كورسەتەتىن دەرەكتەر جەتەرلىك.

مەنى ويلاندىرىپ وتىرعان ول ەمەس. ناقتى - دومبىرا مەن قوبىز. وسى ەكەۋىنىڭ ءۇنى - تابيعاتتىڭ ءتىلى. الەم مۋزىكاسى ەمەس، دومبىرا مەن قوبىزدىڭ ءۇنىن بۇكىل الەم اكۋستيك ماماندارى تابيعاتتىڭ ءۇنى دەپ تانىعانى - قاجەت. دومبىرانىڭ ءۇنىن گەرتسكە سالىپ، وزىنشە زەرتتەگەن قازاق بالاسى بار ما؟ بولسا، ايتىڭدارشى، كىم؟ باستى دۇنيە - تەمبردە، بوياۋدا عوي. جالپى، تابيعاتقا ورتاق تەمبر قانداي؟ دومبىرانىڭ تەمبرى قانداي؟ دومبىرانىڭ قۇدىرەتىن ءبىز بۇگىنگى عىلىمنىڭ، تەحنيكانىڭ جەتىستىكتەرى ارقىلى زەرتتەپ، ساراپتاپ، دالەلدەپ شىعۋعا ءتيىسپىز. سوندا عانا بۇكىل الەم قازاقتىڭ اڭىزدارى شىن دۇنيە ەكەنىن، دومبىرانىڭ ءۇنى - تابيعاتتىڭ ءتىلى ەكەنىن مويىندايدى.

جاڭا عانا ءبىر كىشكەنتاي بالا دومبىرا كوتەرىپ بارا جاتقانىن كوردىم. بۇل جاي نارسە ەمەس. ونى دا ەلتىتەتىن بىردەڭە بار، بار. سونى عىلىمي دالەلدەيىك تە. سوندا، قازاق بالاسى دومبىراسىن بۇرىنعىدان بەتەر بيىك كورەتىن بولادى.

سەرىك جانبولات

Facebook-تەگى پاراقشاسىنان