ءبارىن  ءبىلىپ تۋعان بالا­لاردى «ۆۋندەركيند» دەي­مىز. مۇن­داي «التىن بالالار» كەز كەلگەن ەلدىڭ باعى، قوعامنىڭ بايلىعى، اتا-انانىڭ ماقتانىشى ەكەنى داۋسى­ز. «التىن باستى با­لالاردىڭ» جاسىنا قاراماستان ەرەسەكتەردىڭ تىرلىگىن جاساپ، عىلىم مەن ونەردى دامىتىپ، ەرەكشە قابىلەتتەرىمەن ادامزاتتىڭ دامۋىنا قو­سار ۇلەستەرى زور.

ەلىمىز ۆۋندەركيندتەر تاسقىنىنىڭ استىندا قالىپ وتىرعان جوق. دەگەنمەن ءوز قاتارىنان ءبىر باس وزىق تۋعانداردىڭ تاعدىرى تاسادا قالىپ كەتە بەرەدى.

مىسالى، شايمەردەن اسكەن – بار بولعانى سەگىز جاستا. الماتى وبلىسى قاراساي اۋدانىنا قاراستى وراز جاندوسوۆ اۋىلىنىڭ كىشكەنتاي تۇرعىنى، ءوز قاتارلاستارىنان اسىپ تۋعان شايمەردەننىڭ ەرەكشەلىگى – 4 جاسىنان باستاپ قازاق اقىندارىنىڭ ولەڭدەرىن، پوەمالارىن جاتقا ايتادى. جادىدا جاتتاپ قانا قويماي ۇلكەن ساحنالاردا مانەر-ناقىشىن كەلتىرىپ ورىندايدى. شايمەردەننىڭ وسى ءبىر قابىلەتىن بايقاعان اقىن مۇحتار شاحانوۆ اتاسى باتاسىن بەرگەن.

ءوز جاسىنداعىلاردان ءبىر باس وزىق تۋعان شايمەردەن وسى ۋاقىتقا دەيىن بىرنەشە حالىقارالىق جانە رەسپۋبليكالىق جارىستارعا قاتىسىپ، جۇلدەلى ورىندارعا يە بولعان.

ءتورت جاسىنان باستاپ قازاق اقىندارىنىڭ ولەڭدەرىن جاتقا وقىپ، جۇرتتى تاڭ قالدىرعان شايمەردەن بۇگىندە 15 پوەما، 40-قا جۋىق جىر-داستانداردى ەش مۇدىرمەستەن ايتا الادى. مۇحتار شاحانوۆ، فاريزا وڭعارسىنوۆا، تولەگەن ايبەرگەنوۆ، مۇقاعالي ماقاتاەۆ، سىرباي ماۋلەنوۆ شىعارمالارىن جاتتاپ وسكە ناسكەننىڭ كەلەشەكتەگى ارمانى - پاتشا بولۋ.

الماتىنىڭ ءبىر بۇرىشىندا وسىنداي دارىندى بالانىڭ بار ەكەندىگىن بىلگەن سوڭ، ءبىز شايمەردەندى تاۋىپ الدىق. ءدۇيىم جۇرتتىڭ تاڭقالدىرعان ونەرىن ءوز كوزىمىزبەن كورىپ قايتتىق.

- شايمەردەن ءوزى وتە قاعىلەز بالا. ۇيدەگى بالالارىمنىڭ ۇلكەنى دە ءوزى. اۋەلدە ءبىز بۇعان اسا ءبىر ءمان بەرە قويعان جوقپىز. بۇل بالامنىڭ ءوزىنىڭ قۇداي بەرگەن قابىلەتى. ءبىر پوەەمانى ءبىر-ەكى قايتالاعاننان-اق جاتتاپ الادى. بىردە اقىن مۇحتار اتاسىنىڭ كەشىنە بارعاندا شايمەردەن ول كىسىنىڭ «قۇز باسىنداعى اڭشىنىڭ زارى»  دەگەن پوەماسىن جاتقا وقىپ بەردى. سول جەردە مۇحتار اتاسى باتاسىن بەرىپ، ريزاشىلىعىن بىلدىرگەن. قازىر دە كەشتەرىنە ارنايى شاقىرىپ تۇرادى،-دەيدى شايمەردەننىڭ اكەسى ساياتبەك ەگىزەكوۆ.

وسىدان كەيىن دە شايمەردەن كوپتەگەن بايقاۋلارعا قاتىسىپ، جۇلدەلى ورىندارعا يە بولعان.

بىلتىر عانا جەلتوقسان ايىندا الماتىدا وتكەن فرايزا وقۋلارى بايقاۋىندا باس جۇلدەنى قانجىعاسىنا بايلاعان شايمەردەن بىزگە ءوزىنىڭ ونەرىن كورسەتتى.

ءوزى جاتقا بىلەتىن 15 پوەمانىڭ كەز كەلگەن جەرىنەن توقتاتىپ، كەلەسىدەن جالعاستىرا الاتىن جادىنىڭ يەسى وتاندىق تەلەارنالارعا دا بىرنەشە مارتە شىققان.

ايتپاقشى ول بىزگە وقىپ بەرگەن مۇحتار شاحانوۆتىڭ پوەماسىن بار بولعانى ءبىر كۇندە جاتتاپ العان.

ءتۇيىن: ءسوز سوڭىندا ايتا كەتەيىك، سەگىز جاسار شايمەردەن كۇنى بۇگىندە استانا قالاسىندا وتەتىن «اق كوگەرشىن» حالىقارالىق بايقاۋىنا قاتىسادى. ەلدەن ەرەكشە تۋعان تالانتتى بالاپان دوداعا تۇسكەندە ءبىز دە مۇندا تاقىم قىسىپ وتىراتىنىمىز راس. سەگىز جاسىندا سەرگەك ساناسىمەن ءدۇيىم كوپشىلىكتى سۇيسىندىرگەن شايمەردەننىڭ استاناداعى حالىقارالىق بايقاۋدان العان اسەرىمەن الداعى ۋاقىتتا بولىسەتىن بولامىز.

نۇرگەلدى ابدىعانيۇلى

Abai.kz