جاقىن ارادا قازاقستاندىق جالپى جانە ورتا ءبىلىم بەرەتىن مەكتەپتەردە «نازارباەۆتانۋ» ءپانى ەنگىزىلۋى مۇمكىن، - دەگەن اقپارات تاراتتى Tengrinews.kz سايتى.

بۇل يدەيانىڭ اۆتورى شىمكەنت ۋنيۆەرسيتەتىنىڭ پروفەسسورى،  ەكونوميكا عىلىمدارىنىڭ كانديداتى ءنۇرالى وتكەلباەۆ ەكەن.

پروفەسسور ءوزىنىڭ بۇل جوباسىن قر ءبىلىم جانە عىلىم مينيسترلىگىنە ۇسىنىپ، مينيسترلىكتىڭ قۇپتاعان جاۋابىن العانىن «وڭتۇستىك قازاقستان» گازەتى جازدى.

پروفەسسور وتكەلباەۆتىڭ زەرتتەۋىنشە، قازاقستان پرەزيدەنتىنىڭ ءتۇرلى مىنبەرلەردە جاساعان مالىمدەمەلەرى، باياندامالارى، جولداۋلارى ءام سۇحباتتارى، عىلىمي-الەۋمەتتىك ماقالالارى 101 تومدى قۇراپتى.

«قازاقستان پرەزيدەنتىنىڭ جولداۋلارى ەلىمىزدىڭ ساياسي، ەكونوميكالىق ءام قوعامدىق-الەۋمەتتىك ءومىرى ءۇشىن ۇلكەن ءرول اتقاراتىن، جاڭا مەملەكەتتى قۇرۋدا جارقىن جەتىستىكتەرگە جەتەلەيتىن اسپەكتىلەردى قامتيدى. ەلباسىمىزدىڭ يدەيالارى جاھاندىق ءام پلانەتالىق سيپاتقا يە»، - دەيدى وتكەلباەۆ مىرزا.

قازاقستاندىق مەكتەپتەردە جاپ-جاڭا ءپان ەنگىزىلەدى دەگەن مالىمەتتى ەستىگەن بويدا، قر ءبىلىم جانە عىلىم مينيسترلىگىنە حابارلاسىپ، ماسەلەنىڭ ءمان-جايىن انىقتادىق.

قر بعم ءباسپاسوز قىزمەتىنىڭ باسشىسى الىبەك جۇمابەكۇلى مۇنداي اقپاراتتى بىزدەن عانا ەستىپ وتىرعانىن ايتىپ، تاڭىرقاپ قالدى. "مەن مۇنى بۇرىن ەستىمەگەن ەكەم. بىلمەيمىن. قازىر ورتا ءبىلىم بەرۋ دەپارتامەنتىنە حابارلاسىپ  كورەيىن",-دەدى الىبەك جۇمابەكۇلى.

ءسال عانا ۋاقىتتان سوڭ، مينيسترلىك ءبىزدىڭ سۇراعىمىزعا جاۋاپ بەردى.

"مەن ءدال وسى ماسەلەمەن اينالىساتىن ورتا ءبىلىم بەرۋ دەپارتامەنتىنە حابارلاستىم. ونداعىلار دا مۇنداي اقپاراتتى ەستىمەگەن ەكەن. سوندىقتان، ءسىز بۇل اقپاراتتى مينيسترلىك راستامادى دەپ جازساڭىز دۇرىس بولادى",-دەيدى بعم ءباسپاسوز قىزمەتىنىڭ باسشىسى الىبەك جۇمابەكۇلى.

P.S: جۋرناليست: -بۇل اقپاراتتى رەسپۋبليكالىق "وڭتۇستىك قازاقستان" گازەتى جازىپ وتىر. سوندا رەسمي باسىلىمنىڭ جاڭساق اقپارات تاراتۋى مۇمكىن بە؟

الىبەك جۇمابەكۇلى: -مۇمكىن شىعار. ايتەۋىر ءبىز وسىنى ءسىزدىڭ اۋزىڭىزدان ەستىپ، تاڭ قالىپ وتىرمىز. بىلمەيمىز ءتىپتى.

نۇرزات توعجان

Abai.kz