وڭتۇستىك قازاقستان وبلىسىنىڭ جەر قاتىناستارى باسقارماسىنىڭ باسشىسى س.ابدىقۇلوۆ، وبلىستىق جەر ينسپەكتسياسى باسقارماسى، وبلىستىق اۋىل شارۋاشىلىعى باسقارماسى، جەر كاداسترى وقو فيليالىنىڭ وكىلدەرى شاردارا مەن ماقتارال اۋداندارىندا بولىپ، جەر كودەكسىنە ەنگىزىلگەن وزگەرىستەردى ءتۇسىندىرۋ اياسىندا سەمينار-كەڭەس وتكىزدى.

ەلباسىنىڭ «100 ناقتى قادام» ۇلت جوسپارىن ىسكە اسىرۋ شەڭبەرىندەگى جەر كودەكسىنە ەنگىزىلگەن وزگەرىستەردى اۋدان كولەمىندەگى اگروقۇرىلىم وكىلدەرىنە ءتۇسىندىرۋدى ماقسات ەتكەن جيىندا وسى جىلدىڭ 1 شىلدەسىنەن باستاپ جەردى اۋكتسيون ارقىلى ساتىپ بەرۋ ماسەلەسى، اۋىل شارۋاشىلىعى كووپەراتيۆتەرى تۋرالى زاڭى جانە باسقا دا نورماتيۆتىك قۇجاتتارعا ەنگىزىلگەن وزگەرىستەر جايى تالقىلاندى.

سونداي-اق، سەميناردا وبلىس بويىنشا بۇگىنگى كۇنگە 61,3 مىڭ گا اۋىل شارۋاشىلىعى جەرلەرىن ساتىپ الۋعا نيەت بىلدىرگەن اگروقۇرىلىمدار تۋرالى، جەرلەردى ساتىپ الۋ ەرەكشەلىكتەرى مەن سالاداعى جۇمىستار بويىنشا العا قويىلعان ماقساتتار كەڭىنەن باياندالدى.

جيىن سوڭىندا اۋدانداردىڭ جەرگە جاۋاپتى ماماندارى مەن اگروقۇرىلىم وكىلدەرى كوكەيدە جۇرگەن سۇراقتارىنا تولىق جاۋاپ الدى.

وقو اكىمىنىڭ ءباسپاسوز قىزمەتى

اباي-اقپارات