GM Uzbekistan ىسىنە قاتىستىلار ۇستالدى
وزبەكستاندا GM Uzbekistan اۆتوكونتسەرن ىسىنە قاتىستى ونداعان ادام ۇستالدى. ۇستالعانداردىڭ ىشىندە GM Uzbekistan'نىڭ باس ديرەكتورى توحيرجون دجاليلوۆتىڭ دا ۇلى بار ەكەنى ايتىلادى. دجاليلوۆتىڭ ءوزى وتكەن اپتانىڭ سوڭىندا تۇتقىنعا الىنعان. وعان كومپانياننىڭ اقشاسىن الاياقتىق جولمەن يەمدەندى دەگەن ايىپ تاعىلعان.
دجاليلوۆ "رەسەيگە اۆتوكولىكتەر ەكسپورتىنىڭ سىزباسىن قۇردى" دەپ كۇدىكتەلىنەدى. قۇجاتتارعا سايكەس اۆتوكولىكتەر وڭتۇستىك قازاقستاننىڭ ورتالىعى شىمكەنت قالاسىندا ۋاقىتشا ساقتالعان. وسىدان كەيىن وزبەكستاندا قايتا ساتىلعان. الدىن ازاتتىقتىڭ وزبەك قىزمەتى قۇپيا دەرەككوزگە سۇيەنىپ، دجاليلوۆتىڭ وزبەكستان پرەزيدەنتى يسلام كاريموۆتىڭ ىسىنە ارالاسقان ءۇشىن تۇتقىنعا الىندى دەپ حابارلاعان بولاتىن.
قازىرگى كەزدە توحيرجون دجاليلوۆ وزبەكستاننىڭ ۇلتتىق قاۋىپسىزدىك قىزمەتىنىڭ تەرگەۋ يزولياتورىندا جاتىر. دجاليلوۆ وزبەك-امەريكالىق GM Uzbekistan اۆتوكونتسەرندى 2010 جىلدان بەرى باسقارىپ كەلگەن.
اباي-اقپارات
