جاقىندا "HeadHunter قازاقستان» ساراپتاما جانە زەرتتەۋ ورتالىعى قازاقستانداعى ورتاشا جالاقىنىڭ ستاتيستيكاسىن تۇزگەن. زەرتتەۋلەر ناتيجەسى كورسەتكەندەي قازاقستاندىق عالىمدار مۇناي جانە گاز سەكتورى قىزمەتكەرلەرىمەن سالىستىرعاندا ءۇش ەسە تومەن جالاقى الادى ەكەن. بۇل تۋرالى اباي اقپاراتتىق پورتالى 365info.kz سايتىنا سىلتەمە جاساي وتىرىپ حابارلايدى.

سونىمەن، قازاقستاندا كىم قانشا جالاقى الادى؟

1. قر ءبىلىم بەرۋ سالاسىنىڭ قازمەتكەرلەرىنە مينيمالدى سومادا 50 مىڭ تەڭگە، ماكسيمالدى سوممادا 154577 تەڭگە جالاقى تولەنەدى. 
2. قر ينجينەر-قۇرىلىسشىلارى ورتاشا ايلىق ەسەپ كورسەتكىشى 55 مىڭنان 120 مىڭعا جۋىقتاۋ كەلەدى.
3. قر دەنساۋلىق ساقتاۋ سالاسى قازمەتكەرلەرى ايلىق ەسەپ كورسەتكىشى بويىنشا 117 مىڭنان 179 مىڭعا جۋىقتى باعامدايدى. بۇل كورسەتكىش بەلورۋسيالىق دارىگەرلەرمەن سالىستىرعاندا ەكى ەسە جوعارى. ال ماسكەۋلىك دارىگەرلەردىڭ ورتاشا ايلىق جالاقىسى-39833-104000 رۋبل. تەڭگەگە شاققاندا-199165-520000 تگ.
4. قر زەينەتكەرلەرى مينيمالدى كورسەتكىشتە 20782 تەڭگە، ماكسيمالدى بازامەن 54171 تەڭگە كولەمىندە زەينەتاقى الادى.  
5. قر ءورت سوندىرۋشىلەر ايىنا 60 مىڭ تەڭگەدەن 120 مىڭ تەڭگەگە دەيىن جالاقى الادى ەكەن. رەسەيلىك ءورت ءسوندىرۋ قىزمەتكەرلەرى ايىنا 34500 رۋبلدەن 77500 رۋبلگە دەيىن وسكەن.

سونداي-اق، اۋىلشارۋاشىلىق، ورمان جانە بالىق شارۋاشىلىعى سالاسىنداعى قىزمەتكەرلەردىڭ ورتاشا جالاقىلارى 96 مىڭ تەڭگە بولسا، تراكتوريست-ماشينيستتەردىڭ جالاقىلارى ودان ءسال تومەندەۋ - 79-90 مىڭ ارالىعىندا. ەكونوميستەر - 157 مىڭ، بۋحگالتەرلەر - 113 مىڭ تەڭگەنى قاناعات تۇتادى. رەسپۋبليكا كولەمىندە ورتاشا جالاقىنىڭ ەڭ جوعارعى كورسەتكىشى استانا جانە الماتى قالالارىندا تىركەلگەن. بۇل قالالاردا ورتاشا جالاقى كولەمى 484 مىڭ مەن 542 مىڭ تەڭگەنى قۇرايدى. ال اۋىلدىق جەرلەردەگى مۇعالىمدەردىڭ ورتاشا جالاقىسى - 82 مىڭ تەڭگە بولسا، جەكە مەنشىك اقىلى مەكتەپتەردەگى وقىتۋشىلاردىڭ ايلىق جالاقىسى 74 مىڭ تەڭگەنى قۇراعان. ال بالاباقشالارداعى تاربيەشىلەر 55 مىڭ تەڭگەگە جۇمىس ىستەيدى.

سونداي-اق، قازاقستانداعى مۇناي بۇرعىلاۋ سالاسى قىزمەتكەرلەرىنىڭ ورتاشا جالاقىسى – 275 مىڭ تەڭگەنى قۇراسا، قۇرىلىس سالاسىندا ەڭبەك ەتۋشىلەر ايىنا – 100 مىڭ تەڭگەدەن 150 مىڭ تەڭگە دەيىن باعالانادى. ال اكىمشىلىك (ادمينيستراتسيا) پەرسونالدار – 80 مىڭ تەڭگەنى قاناعات تۇتسا، كۇزەتشىلەر 50-80 مىڭ  ارالىعىندا جالاقى الادى ەكەن.

دەۆالۆاتسيا بانكتەردى بايىتىپ جاتىر

جاقىندا «Ranking.kz» پورتالى قازاقستانداعى بانك سالاسى قىزمەتكەرلەرىنىڭ، سونىڭ ىشىندە بانك ديرەكتورلارى مەن توپ مەنەدجەرلەرىنىڭ 2015 جىلداعى ورتاشا تابىستارىن ەسەپتەپ شىققان.

مىسالى، قازاقستانداعى ەكىنشى دەڭگەيلى بانكتىڭ اكتيۆتەرىنىڭ كولەمى 20 تريلليون تەڭگەدەن اسىپ جىعىلعان. ال ەۋرازيالىق بانك جەتەكشىسىنىڭ جىلدىق تابىسى 2014 جىلمەن سالىستىرعاندا 90%-دان اسقان. ونىڭ ۇستىنە قوماعاي بانكتەردىڭ ءبىرى دە ءدال وسى بانك بولىپ شىقتى. بانكتىڭ 5 بىردەي ديرەكتورلار كەڭەسىنە مۇشە لاۋازىمدى مۇشەسى ورتاشا ەسەپپەن 182 ميلليون تەڭگە جالاقى العان.  

ەڭ جوعارعى جالاقى...

«Bank RBK» اق  ديرەكتورىنىڭ ورتاشا ايلىق جالاقىسى – 1,2 ميلليون تەڭگە بولسا، «ەۆرازيالىق بانك» اق ديەكتورى – 15,1 ملن. تەڭگە، ال باسقارما – 8,3 ملن. تەڭگە الىپ وتىرعان. «بانك حوۋم كرەديت» اق ديرەكتورى ايىنا – 4,5 ملن. تەڭگە جالاقى السا، ونىڭ باسقارماسى – 3,5 ملن. تەڭگەنى قاناعات تۇتادى ەكەن. جوعارىداعىلارمەن سالىستىرعاندا «كازكوممەرتسبانك» اق ديرەكتورىنىڭ ارانى ءسال-ءپال كىشىلەۋ ەكەن. اتالمىش بانك ديرەكتورى ءبىر ايدا – 736 مىڭ تەڭگە جالاقىعا كۇنەلتسە، ونىڭ باسقارماسى – 6,7 ميلليون تەڭگەنى مىسە تۇتپايدى ەكەن.  «بانك تسەنتر كرەديت» اق ديرەكتورى – 2,1 ملن.،«حالىق بانك» اق ديرەكتورى – 11,4 ملن. تەڭگە، «اتف بانك» اق ديرەكتورى – 1 ميلليون تەڭگە جانە  «ForteBank»اق ديرەكتورى – 2,2 ميلليون تەڭگە ورتاشا جالاقى الىپ كەلگەن.

ءتۇيىن

 ارينە، جوعارىداعى دوعال دەرەككە دە داۋ ايتار ادام تابىلار. ونىڭ ۇستىنە، بىرەۋدىڭ قازانىنداعى اسقا شۇيلىككەلى تۇرعانىمىز دا شامالى. دەگەنمەن، قازىرگىدەي قارجىلىق قيىندىق قوس وكپەدەن العان قىسىلتاياڭ كەزەڭدە جالاقى ايىرماشىلىعىنىڭ جەر مەن كوكتەي بولۋى قانشالىقتى ادىلەتتى؟  داعدارىس دەندەپ، ەل بيۋدجەتى سارقىلىپ، ۇكىمەت قاراپايىم حالىقتىڭ زەينەتاقى جيناقتارىنا قول سالدى. ۇكىمەتتىڭ  ايىنا 5 ميلليونداپ جالاقى الاتىن بانك ديرەكتورلارى مەن توپ مەنەدجەرلەرىنىڭ ەمەس، 50 مىڭ جالاقىعا وتباسىن اسىراپ وتىرعان قاراپايىم كۇزەتشىنىڭ زەينەت جيناعىنا اۋىز سالعانى اقىلعا سىيىمسىز، ارينە. دەسەك تە، بەكىرە جەگەن بەكتەرگە بيلىگىن جۇرگىزە المايتىن بيلىك، ءبيتىن سىققان قارا حالىققا شايا كورسەتۋدەن الدىنا جان سالمايدى. 

نۇرگەلدى ابدىعانيۇلى

Abai.kz