اقش رەسەيدىڭ قىرىم تۇبەگىن اننەكسيالاپ الۋىنا جانە ۋكراينا شىعىسىنداعى سەپاراتيستەردى قولداۋىنا قاتىسى بار ازاماتتارعا، كومپانيالارعا، بانكتەر مەن كاسىپورىندارعا سالعان سانكتسياسىن كەڭەيتتى. قازىر ولاردىڭ سانى 30-دان استى. بۇل تۋرالى «ازاتتىق راديوسى» حابارلايدى.

اقش قارجى مينيسترلىگىنىڭ جەلتوقساننىڭ 22-ءسى كۇنى جاريالاعان سانكتسيا سالۋ تۋرالى مالىمدەمەسىندە «سانكتسياعا ىلىنگەندەردىڭ قىرىمدى اننەكسيالاۋ مەن سەپاراتيستەردى قولداۋعا تىكەلەي جانە جاناما قاتىسى بار ەكەنى، رەسەي پرەزيدەنتى ۆلاديمير پۋتينگە جاقىن رەسەيلىك بيزنەسمەندەرگە قاتىسى بار ۇيىمدار ەكەنى» ايتىلعان. سانكتسياعا ىلىنگەندەر اراسىندا مۇناي ماگناتى گەننادي تيمچەنكو مەن اعايىندى ميللياردەرلەر اركادي جانە بوريس روتەنبەرگتەرگە تيەسىلى كومپانيالار مەن كاسىپورىندار اتالادى.

قازاقستانداعى ەكى بانك جانە باسقالار

سانكتسيا سالىنعان كومپانيالار اراسىندا ۆتب-24 بانكى، ۆتب بانكىنىڭ قازاقستان، ارمەنيا، ازەربايجان، بەلارۋس، گرۋزيا، سەربيا جانە ۋكرايناداعى فيليالدارى، «سبەربانك روسسي» اكتسيونەرلىك قوعامىنىڭ قازاقستان، بەلارۋس، شۆەيتساريا، اۆستريا جانە ۋكرايناداعى «سبەربانك» ەنشىلەس بانكتەرى، «ياندەكس.دەنگي» جۇيەسى، «روسوبورونەكسپورت» حولدينگى، «ۆەرتولەتى روسسي» كاسىپورنى، «روستەح» كومپانياسىنىڭ ەنشىلەس كاسىپورىندارى بار.

اقش كومپانيالارى مەن ازاماتتارىنا بۇل مەكەمەلەردەن ۇزاق مەرزىمگە قارجى الۋعا تىيىم سالىندى. 

ال «گەنبانك»، «ينرەسبانك»، «كراينۆەستبانك»، «موسوبلبانك»، سەۆاستوپول تەڭىز بانكى («سەۆاستوپولسكي مورسكوي بانك»), «ماسساندرا» وندىرىستىك-اگرارلىق كاسىپورنى، «تومەنگى ورەاندا» (نيجنيايا ورەاندا) شيپاجايى مەن يالتا كينوستۋدياسىنىڭ اقش-تاعى اكتيۆتەرى بۇعاۋلانىپ، ولاردىڭ امەريكالىقتارمەن بيزنەس جۇرگىزۋىنە تىيىم سالىنادى.

سانكتسياعا ىلىنگەن ازاماتتار اراسىندا ءوزىن-ءوزى جاريالاعان «لۋگانسك حالىق رەسپۋبليكاسىنىڭ» «پرەمەر-ءمينيسترى» سەرگەي تسىپلياكوۆ پەن «پرەمەر ورىنباسارى» ۆاسيلي نيكيتين، يجەۆسكي مەحانيكالىق زاۋىتىنىڭ (قارۋ وندىرىسىنە قاتىسى بار - رەد.) سىرتقى قاتىناستار جونىندەگى باسقارۋشى ديرەكتورى تاتيانا چەرنىح، قارۋ-جاراق وندىرەتىن «كالاشنيكوۆ» كونتسەرنى ديرەكتورىنىڭ ورىنباسارى ەدۋارد يوففە بار.

گەننادي تيمچەنكو.

اقش قارجى مينيسترلىگى «بۇل ازاماتتار بۇعان دەيىن سانكتسيا سالىنعان گەننادي تيمچەنكو مەن ونىڭ قىزمەتكەرلەرى سۆەن ولسسون، «اۆيا گرۋپپ تەرمينال» فيرماسى، «ترانسسەرۆيس» كاسىپورنى جانە باسقا دا بىرنەشە كاسىپورىن اتىنان ارەكەت ەتكەن نەمەسە سەپاراتيستەرگە قولداۋ كورسەتكەن» دەپ سانايدى. 

اقش 2014 جىلى اقپاندا حالىق تولقۋىنان كەيىن بيلىكتەن قۋىلعان ۋكراينانىڭ بۇرىنعى پرەزيدەنتى ۆيكتور يانۋكوۆيچ ۇكىمەتىمەن بايلانىسى بار شەنەۋنىكتەرگە، ونىڭ ىشىندە ۋكراينانىڭ بۇرىنعى ىشكى ىستەر ءمينيسترى ۆيتالي زاحارچەنكوعا دا سانكتسيا سالعان. اقش ۇكىمەتى «زاحارچەنكو 2014 جىلى «ەۋرومايدان» قارسىلىق اكتسيالارى كەزىندە شەرۋشىلەرگە وق اتۋدى بۇيىرعان» دەيدى.

كرەملدىڭ رەنىشى مەن بانكتەردىڭ جاۋابى

اقش سانكتسيالارىنىڭ «ماسكەۋ مينسك ءبىتىمىنىڭ تالاپتارىن ورىنداسا، ونىڭ ىشىندە ۋكراينانىڭ رەسەيمەن مەملەكەتتىك شەكاراسىن كيەۆتىڭ باقىلاۋىنا قايتارعان جاعدايدا عانا جەڭىلدەيتىنىن» ايتادى.

رەسەي پرەزيدەنتى ۆلاديمير پۋتين. ماسكەۋ، 2015 جىلدىڭ جەلتوقسانى.

كرەمل اقش-تىڭ وزىنە قارسى سانكتسيالارىن كەڭەيتۋىن «دوستىق پيعىلعا جاتپايتىن جانە قارسى شارالار جاساۋعا اكەپ سوقتىراتىن ارەكەت» دەپ باعالادى. كرەمل ءباسپاسوز حاتشىسى دميتري پەسكوۆ رەسەيلىك باق-قا «ماسكەۋدىڭ اقش-تىڭ جاڭا سانكتسيالارىنا قارسى شارالار جاساۋدى ويلاستىرىپ جاتقانىن» ايتقان. ول «بۇل - رەسەيگە قارسى جاۋلىق پيعىلداعى، قيسىنعا كەلمەيتىن شارالار جالعاسى. بۇل ەكى جاقتىڭ قارىم-قاتىناسىنا كۇيرەتە سوققى بەرەدى» دەگەن.

ازاتتىق سانكتسيا سالىنۋىنا قاتىستى تۇسىنىك بەرۋدى سۇراپ قازاقستانداعى «سبەربانك» پەن ۆتب وكىلدەرىنە حابارلاستى. «سبەربانكتىڭ» ءباسپاسوز حاتشىسى ەكاتەرينا كۋپرەەۆا «سبەربانكتىڭ» سانكتسيا كەزىندەگى قىزمەتىنە قاتىستى بۇعان دەيىن، 2014 جىلى شىلدەدە، ەۋروپا وداعى (ەو) سانكتسيا سالعان كەزدەگى مالىمدەمەسىن قايتالادى.

ۋكرايناداعى رەسەيشىل سەپاراتيستەردىڭ تانكىلەرى. دونەتسك ماڭى، 14 قىركۇيەك 2015 جىل.

وندا «سبەربانكتىڭ» قازاقستانداعى ەنشىلەس بانكى «قالىپتى رەجيمدە، كاپيتالى مەن قارجىلىق تۇراقتىلىعىن ساقتاي وتىرىپ جۇمىسىن جالعاستىرىپ جاتقانى» ايتىلعان. مالىمدەمەدە «بانك تۇتىنۋشىلارى الدىنداعى ءوز مىندەتتەرىن ورىنداپ وتىر، ۇزاق مەرزىمدى دامۋ ستراتەگياسى جاسالعان. بانك بۇرىنعىداي ءوز تۇتىنۋشىلارىن قولداۋدى، ولاردىڭ سەنىمدى ارىپتەسى بولىپ قالۋدى ماقسات تۇتادى» دەپ جازىلعان.

ۆتب ءباسپاسوز حاتشىسى ارينا پيروگوۆا ازاتتىققا «بانكتىڭ بۇعان دەيىن-اق سانكتسياعا ىلىنگەنىن، سانكتسيانىڭ ۇزارتىلۋىنىڭ ۆتب (قازاقستان) بانكىنىڭ كليەنتتەرىنە قانداي دا ءبىر اسەرى بولمايتىنىن» ايتتى.

بىرەر كۇن بۇرىن ەو رەسەيگە 2014 جىلى شىلدەدە سالعان سانكتسيالارى مەرزىمىن تاعى التى ايعا، ياعني 2016 جىلعى شىلدەنىڭ 31-ىنە دەيىن ۇزارتقان.

بۇۇ دەرەگى بويىنشا، دونباستا (ۋكراينانىڭ شىعىس ايماعى - رەد.) 2014 جىلدىڭ ساۋىرىندە باستالعان ۋكراينا اسكەرى مەن رەسەيشىل سەپاراتيستەر اراسىنداعى قاقتىعىستاردان 9 مىڭنان استام ادام قازا تاپقان.

Abai.kz