انكارا مەن ماسكەۋ اراسىندا داۋ قايتا تۇتاندى
رەسەي مەن تۇركيا اراسىنداعى وتكەندەگى جانجالدىڭ داۋى اياقتالماي جاتىپ (قاراڭىز: http://abai.kz/post/view?id=5628 ), رەسەي قارۋلى كۇشتەرى تۇركيا اۋە كەڭىستىگىن تاعى دا بۇزدى. بۇل تۋرالى تۇركيالىق جانە رەسەيلىك باق جارىسا حابار تاراتۋدا.
تۇركيالىق «samanyoluhaber.com» سايتىنىڭ حابارلاۋىنشا، ساۋد ارابياسىنىڭ رياد قالاسىندا وتكەن كونفەرەنتسيادا تۇركيا سىرتقى ىستەر ءمينيسترى احمەت داۆۋتوگلى رف اسكەري ۇشاعى تۇركيا اۋە كەڭىستىگىن تاعى دا بۇزىپ كىرگەنىن مالىمدەگەن.
«samanyoluhaber.com» اقپاراتتارىنا سۇيەنسەك، رف قارۋلى كۇشتەرىنىڭ وكىلى سەرگەي رىجكوۆ 1-5 اقپان ارالىعىندا رەسەيلىك An-30B اسكەري ۇشاعى بارلاۋ جاسايتىنىن حابارلاعان.
ال رەسەيلىك گازەتا.ru باسىلىمىنىڭ اقپاراتتارىندا، تۇركيا سىرتقى ىستەر ءمينيسترى ا.داۆۋتوگلى رەسەيلىك ۇشاقتىڭ تۇركيا اۋە كەڭىستىگىن بۇزۋىنا بايلانىستى، رف ەلشىسىن شاقىرتىپ العان.
سونداي-اق، Associated Press اگەنتتىگى «تۇركيا تاراپى رەسەيدى اۋە كەڭىستىگىن بۇزباۋعا شاقىردى»، - دەپ جازادى. ەگەردە حالىقارالىق تالاپتار (1992 جىلى بەكىتىلگەن «اشىق اۋە الاڭى كەلىسىمدەرى») ورىندالماعان جاعدايدا، - دەلىنگەن اتالعان اگەنتتىكتىڭ حابارىندا، - تۇركيا قارۋلى كۇشتەرى تاراپىنان قارسى شابۋىل جاسالۋى مۇمكىن. سونىمەن قاتار، بار جاۋاپكەرشىلىك رەسەيدىڭ موينىنا جۇكتەلۋى ىقتيمال.
ال، «samanyoluhaber.com» سايتى بولسا، تۇركيا سىرتقى ىستەر مينيسترلىگىنىڭ مالىمدەمەسىن كەلتىرە وتىرىپ: "اۋە كەڭىستىگىن بۇزۋ ارقىلى رەسەي ەكى ەل اراسىنداعى شيەلەنىستى كۇشەيتكىسى كەلەتىنىن دالەلدەي تۇسۋدە»، - دەدى.
ءوز كەزەگىندە رف قورعانىس مينيسترلىگىنىڭ رەسمي وكىلى، گەنەرال-مايور يگور كوناشەنكوۆ رەسەيلىك اۋە كۇشتەرىنىڭ سيريادا تۇرىك اۋە كەڭىستىگىن بۇزباعانىن ايتتى.
ەستەرىڭىزدە بولسا، وسىعان دەيىن رەسەي مەن تۇركيا اراسىنداعى جانجالدار ۋشىققان تۇستا قازاقستان پرەزيدەنتى نۇرسۇلتان ءابىشۇلى اراعايىندىق جاساعان ەدى.
وسى رەتتە، abai.kz سايتى «تۇركيا مەن رەسەي اراسىنداعى احۋال قالاي ءوربۋى مۇمكىن؟» دەگەن ساۋالناما جۇرگىزگەن بولاتىن. ساۋالناماعا قاتىسقان وقىرمان «داۋلاسىپ بارىپ توقتايدى» دەگەن جاۋاپتى تاڭداعان بولاتىن. الايدا، بۇگىنگى جاعدايدان كەيىن تۇركيا مەن رەسەي اراسىنداعى احۋالدىڭ ۋشىعا تۇسەتىنىنە كوزىمىز جەتىپ وتىر.
نۇرگەلدى ابدىعانيۇلى
Abai.kz
