«دوپينگ قولداندى» دەپ ايىپتالعانىنا قاراماستان، قىدىرباەۆ پەن وتەشوۆ جاتتىعۋلارىن باستاپ كەتتى. قازاق اۋىر اتلەتتەرى جاسۇلان قىدىرباەۆ پەن الماس وتەشوۆ پولشا استاناسى ۆارشاۆادا جاتتىعۋ جۇمىستارىن جاساپ ءجۇر، دەپ حابارلادى Alaman.kz.

بۇل تۋرالى قازاقستاندىق باق وكىلدەرىنە ۇلتتىق قۇرامانىڭ باس باپكەرى الەكسەي ني مالىمدەدى.

ەستەرىڭىزگە سالا كەتەيىك، وتەشوۆ پەن قىدىرباەۆ حيۋستوندا وتكەن الەم چەمپيوناتىندا 94 كەلىگە دەيىنگى سالماقتا تيىسىنشە كۇمىس جانە قولا جۇلدەگەر اتانعان. ودان كەيىن، حالىقارالىق اۋىر اتلەتيكا فەدەراتسياسى بۇل سپورتشىلاردى «دوپينگ قولداندى» دەپ ايىپتاپ، الداعى جارىستارعا قاتىسۋعا تىيىم سالعان ەدى. الايدا سپورتشىلار جاتتىعۋىن ۇزگەن جوق. فەدەراتسيا ناقتى شەشىمدى كوكتەمدە شىعارۋى ءتيىس.

ال وسى 94 كەلى سالماقتا 2009 جىلعى الەم چەمپيونى، 2013 جىلعى الەم چەمپيوناتىنىڭ قولا، 2014 جىلعى الەم چەمپيوناتىنىڭ كۇمىس جۇلدەگەرى ۆلاديمير سەدوۆ جاتتىعۋىن قايتا باستاعان. سەدوۆ قازىر الماتى وبلىسى ۇشتوبە قالاسىندا جاتتىعىپ جاتىر. وسىعان دەيىن ول 2015 جىلى تالدىقورعاندا وتكەن ەل چەمپيوناتىنا قاتىسپاعان. كەيىن يليا يلين سەدوۆ سپورتتان كەتكەنىن جەتكىزگەن.

قازىرگى ۋاقىتتا اۋىر اتلەتيكادان الەكسەي ني باستاعان قازاقستان ۇلتتىق قۇراماسى رەسەيدىڭ سوچي قالاسىندا وليمپيادا الدىنداعى جاتتىعۋ جۇمىستارىن باستاپ كەتتى. سوچي قالاسىنا زۋلفيا چينشانلو، مايا مانەزا، سۆەتلانا پودوبەدوۆا، فارحاد حاركي، ارلي چونتەي، جازيرا جاپپارقۇل جانە نيجات راحيموۆ سىندى سپورتشىلار بارعان. سپورتشىلاردىڭ تاعى ءبىر بولىگى تەكەلىدە جاتتىعۋلارىن پىسىقتاپ ءجۇر. ال يليا ءيليننىڭ كومانداسى ۆارشاۆادا جاتتىعۋ جۇمىستارىن باستاعان.

ودان بولەك، بىلتىر جاستار اراسىندا پەرۋدە وتكەن الەم چەمپيوناتىندا قازاقستاندىق سپورتشىلار يگور سون (50 كەلىگە دەيىن) مەن تاتيانا كاپۋستينا (69 كەلىگە دەيىن) الەم چەمپيوناتىندا التىن مەدال جەڭگەن ەدى. الايدا سپورتشىلارىمىزدىڭ قانىنان تىيىم سالىنعان پرەپاراتتار تابىلىپ، 11 ايعا سپورتتان شەتتەتىلگەن.

Abai.kz