تۇرعىن ءۇي قۇرىلىس جيناق بانكى الەۋمەتتىك مىندەتتەرىن بۇدان ءارى دە اتقارا بەرەدى، - دەپ حابارلايدى تقجب-ءتىڭ ءباسپاسوز قىزمەتى.

مەملەكەت قتقجب قۇرىلتايشىلارىنىڭ قۇرامىندا قالادى. جانە بانك سالىمشىلارىنا جىل سايىن 20% سىياقى تولەۋدى جالعاستىرا بەرمەك. بۇل نورما قارجى ينستيتۋتىنىڭ مەنشىك فورماسىنا بايلانىستى ەمەس. «قر تۇرعىن ءۇي قۇرىلىس جيناق تۋرالى» زاڭىندا ناقتى بەكىتىلگەن.  سوندىقتان ازاماتتاردىڭ الاڭداۋىنا ەشقانداي سەبەپ جوق. تۇرعىن ءۇي قۇرىلىس جيناق بانكىنىڭ ءباسپاسوز قىزمەتىنىڭ بەرگەن تۇسىندىرمەسى وسىعان سايادى.

بانك وكىلدەرىنىڭ سوزىنە قاراعاندا، بۋىنى بەكىپ ۇلگەرگەن تۇرعىن ءۇي قۇرىلىس جيناق جۇيەسى ءوزىنىڭ تۇراقتىلىعى مەن تيىمدىلىگىن الدەقاشان دالەلدەگەن. قازىر تۇرعىن ءۇي قۇرىلىس جيناق بانكى جاڭا دامۋ بەلەسىن باعىندىرىپ، ينۆەستورلارمەن ىنتىماقتاستىق جاساۋعا ۇمىتىلىپ وتىر. مۇنىڭ بانك قىزمەتىنە تىڭ سەرپىن بەرەتىنى داۋسىز. سونداي-اق، بانك جۇمىسىن ودان ءارى ۇتىمدى ەتە تۇسپەك.

- جاڭا سەرىكتەستەن بانك تەك ۇتاتىن بولادى. بۇل -  جاڭا ينۆەستيتسيا، قوسىمشا قۇيىلعان قاراجات، جاڭا تەحنولوگيالار جانە ءىت قىزمەت دەگەن ءسوز. بانك ءوزىنىڭ الەۋمەتتىك قىزمەتىن جالعاستىرا  بەرەدى. ويتكەنى، جىل سايىن مەملەكەت سۋبسيدياسىن الىپ، سالىمشىلارىنا سىياقى تولەپ تۇراتىن بولادى، - دەپ ءتۇسىندىردى «قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ايجان مەدەۋوۆا.

ونىڭ ايتۋىنشا، اكتسيونەر تارتۋعا قاتىستى ءالى ناقتى شەشىم شىققان جوق. بولاشاقتا ەڭ وڭتايلى جوسپار ازىرلەنەتىن بولادى. سوسىن وعان ۇكىمەتتىڭ كەلىسىمى كەرەك. بۇعان شامامەن ەكى اي ۋاقىت كەتەدى. ينۆەستورعا اكتسيالاردىڭ قانشا پايىزى ۇسىنىلاتىنى جايلى ماسەلە قازىر تالقىلانۋ ۇستىندە.

مەدەۋوۆانىڭ ايتۋىنشا، تقج جۇيەسىن جۇزەگە اسىراتىن وزگە بانكتەردىڭ دە جەكە ينۆەستورلارى بولادى. بۇل الەمدىك، ەۋروپالىق تاجىريبەدە ءجيى كەزدەسەدى. ازاماتتاردى قولجەتىمدى تۇرعىن ۇيمەن قامتاماسىز ەتۋ سەكىلدى مەملەكەتتىڭ الەۋمەتتىك ساياساتىن ناتيجەلى ورىنداۋعا ول ەشقانداي كەدەرگى بولمايدى. تۇرعىن ءۇي قۇرىلىس جيناق بانكى دە ءوز جۇمىسىن وسى باعىتتا جالعاستىرا بەرمەك.

قازىرگى كەزدە قتقجب ەۋروپالىق قۇرىلىس جيناق كاسسالارى فەدەراتسياسىنا (ەقجكف) كىرەدى. ەۋروپالىق ارىپتەستەرىنىڭ تاجىريبەسىن سۇيەنىپ، بانك ەلىمىزدە 12 جىل بويى تقج جۇيەسىن جۇزەگە اسىرىپ كەلەدى. سونىڭ ارقاسىندا، ءجۇز مىڭداعان ەل ازاماتتارى ەڭ تومەنگى پايىزدىق مولشەرلەمەلەرمەن زاەم الىپ، تۇرعىن ءۇي جاعدايلارىن جاقسارتتى. بۇگىندە قتقجب 550 مىڭ شارت جاساعان. بانك وسى شارتتار بويىنشا ءوز مىندەتتەسىن تولىق  ورىنداۋدا. 

Aباي-اقپارات