«احمەتوۆ ءىسى» بويىنشا قاراعاندى وبلىستىق سوتىندا ءوتىپ جاتقان سوت پروتسەسىندە كۋاگەر رەتىندە جاۋاپ بەرگەن عۇمار راحىمجانوۆ س. احمەتوۆكە قولما-قول اقشانى قالاي اپارىپ بەرگەنىن اڭگىمەلەدى. ايتا كەتەلىك، بۇرىن س. احمەتوۆتىڭ كەڭەسشىسى، «سارىارقا» الەۋمەتتىك-كاسىپكەرلىك كورپوراتسياسىنىڭ جانە «قازاگروقارجى» اق-نىڭ باسقارما توراعاسى بولعان  ع. راحىمجانوۆ تا سوتتالۋشىلار ورىندىعىندا وتىر. ول ءوزىنىڭ كىناسىن تولىق مويىندادى.

كۋاگەردىڭ ايتۋىنشا، 2010 جىلى قاراعاندى وبلىسىنىڭ اكىمى س. احمەتوۆپەن تانىسىپ، كەلەسى جىلى ونىڭ كەڭەسشىسى قىزمەتىنە تاعايىندالعان. از ۋاقىتتا اكىمنىڭ سەنىمىنە يە بولعان ع. راحىمجانوۆ 2011 جىلى مامىردا «سارىارقا» اكك» ۇك» اق-نىڭ باسقارما توراعاسى بولىپ شىعادى. كوپ ۇزاماي س. احمەتوۆ «سارىارقانىڭ» كومەگىمەن مەملەكەت قاراجاتىن جەكەمەنشىك جوبالارىنا ينۆەستيتسيالايدى. ماسەلەن، «قازاقمىستان» توپارداعى جىلىجايلاردى ساتىپ الۋ وقيعاسى وسىعان مىسال. سوتتاعى سوزىندە كۋاگەر جىلىجاي كەشەنىنىڭ قۇرىلىسىنا ارنالعان قوندىرعى ءوز قۇنىنان 16,5 پايىزعا كوتەرىلگەن باعامەن ساتىپ الىنعانىن ايتتى. «توپار جىلىجايلارى» جشس-ءىن جەتىلدىرۋ جۇمىستارىنا جابدىقتاردى جەتكىزۋگە يسپاندىق «Rufera Tehnoagro SL» كومپانياسى كەزدەيسوق تاڭداپ الىنباعان ەدى. سوتقا دەيىنگى تەرگەۋدەن بەلگىلى بولعانىنداي، س. احمەتوۆتىڭ سەنىمدى ادامدارى – عۇمار راحىمجانوۆ، ەرلان قيسىقوۆ جانە عابيت ماتاەۆتار وبلىس بيلىگى تاراپىنان قويىلعان «ەرەكشە» تالاپتارعا تولىق كەلىسەتىن كومپانيا ىزدەيدى. ءسويتىپ ونىمەن مامىلەگە كەلىپ، كوممەرتسيالىق ۇسىنىستا قوندىرعىنىڭ قۇنىن شارىقتاتىپ كورسەتىپ، ايىرماداعى 3 ملن. ەۋرونى س. احمەتوۆكە قايتارىپ بەرەدى.

عۇمار راحىمجانوۆ سوتقا بەرگەن جاۋابىندا احمەتوۆكە ارنالعان اقشانى 6 رەت اپارىپ بەرگەنىن اڭگىمەلەدى. سونىڭ ىشىندە ەكى رەت – س. احمەتوۆتىڭ ءوز ۇيىنە، ءبىر رەت ع. ماتاەۆقا ۇكىمەت ۇيىنە جەتكىزگەن كورىنەدى. «2012 جىلدىڭ جەلتوقسانىندا مەن سەرىك نىعمەتۇلىنا ەسەپ بەردىم. باستىسى، جىلىجايلاردى جەتىلدىرۋ جوباسىن قارجىلاندىرۋ باستالعانىن حابارلادىم. وزىمە جۇكتەلگەن تاپسىرمانىڭ ورىندالعانىن ايتتىم. ول كەشكە ءوز ۇيىنە كەلۋىمدى تاپسىردى. مەن كەشكى ساعات 23.00-دە قىزمەتتىك كولىككە ءمىنىپ، س. احمەتوۆتىڭ استاناداعى «اقبۇلاق» شاعىن اۋدانىنداعى ۇيىنە كەلدىم. ەسىكتى قاعىپ ەدىم، كۇزەتشى اشتى. 5-7 مينۋتتان كەيىن سەرىك نىعمەتۇلىنىڭ ءوزى قارسى الىپ، ۇيگە كىرگىزدى. كىرە بەرىستە اقشا سالىنعان قارا سومكەنى قالدىردىم. ودان كەيىن ۇيدەن شىقتىم»،- دەپ اڭگىمەلەدى ع. راحىمجانوۆ.

سوتتالۋشى ەكىنشى رەت 30 ملن. تەڭگەنى احمەتوۆتىڭ تاپسىرۋىمەن ع. ماتاەۆقا اپارىپ بەرىپتى. «مەن ع. ماتاەۆقا تەلەفون سوعىپ، اقشانى قايدا اپارۋدى سۇرادىم. ول ۇكىمەت ۇيىنە اكەلۋىمدى تاپسىردى،- دەپ ەسكە الدى بولعان وقيعانى كۋاگەر. - مەن ۇكىمەت ۇيىنە ەشقانداي كەدەرگىسىز كىرە بەرەتىنمىن. سەبەبى قولىمدا جاسىل كارتوچكا بولاتىن. ول جولى دا ءسويتتىم. 30 ملن. تەڭگە سالىنعان سومكەمەن 4 قاباتقا كوتەرىلدىم. ع. ماتاەۆ مەنى ءۇنسىز قارسى الىپ، سومكەدەگى اقشانى سەيفكە سالدى. ول بۇل اقشانىڭ سىيلىقتار الۋعا جەدەل قاجەت بولعانىن ايتتى».

ءۇشىنشى رەت 2013 جىلدىڭ ناۋرىزىندا ع. راحىمجانوۆ 87,5 ملن. تەڭگەنى س. احمەتوۆتىڭ وزىنە اپارعان. 2013 جىلدىڭ قاڭتار ايىنان باستاپ ەكس-پرەمەر استاناداعى تەلمان شاعىن اۋدانىنداعى جەكەمەنشىك جاڭا ۇيىندە تۇرىپ جاتقان. «مەن س. احمەتوۆتىڭ جاڭا ۇيىنە وتكەن جولعىداي كەشكى 23.00-دە باردىم. ەسىكتى اشقان كۇزەتشى مەنى قوناق قابىلدايتىن بولمەگە شاقىردى. سەرىك نىعمەتۇلى 10 مينۋتتان كەيىن كەلدى. ءبىز تاس پەشتىڭ جانىنا وتىردىق. مەن ءىستى تىندىرعانىمدى ايتىپ، قارا سومكەنى ىمدادىم. ول مەنى شىعارىپ سالدى»،- دەدى كۋاگەر. ول بۇدان كەيىن تاعى ءۇش رەت 120 ملن. تەڭگەنى سول كەزدەگى پرەمەردىڭ كەڭسەسى جەتەكشىسىنىڭ ورىنباسارى عابيت ماتاەۆتىڭ استانا قالاسىنداعى «نۇرسايا-2» تۇرعىن ءۇي كەشەنىندەگى 358 پاتەرىنە اپارىپ بەرگەنىن جەتكىزدى. – وسىلاردىڭ بارلىعىن قوسقاندا س. احمەتوۆكە 320 ملن. تەڭگەنى قولما-قول اقشا تۇرىندە جەتكىزدىك. سونىڭ ىشىندەگى 200 ملن-ى يسپاندىق «Rufera Tehnoagro SL» كومپانياسى قايتارعان اقشا، ال 120 ملن-ى مەنىڭ بىلۋىمشە ا. زابيروۆتىڭ اينالىمداعى قاراجاتى،- دەپ مالىمدەدى سوتتا ع. راحىمجانوۆ.

ءامينا باكىر

Abai.kz