وڭتۇستىك قازاقستان وبلىسى بايدىبەك اۋدانىنىڭ شايان اۋىلىنا تابيعي گاز جەتتى. كەشە «بەينەۋ-بوزاي-شىمكەنت» ماگيسترالدىق گاز قۇبىرىنان تارتىلاتىن «شالدار» اۆتوماتتاندىرىلعان گاز تاراتۋ ستانتسياسى ىسكە قوسىلدى.

اتالعان ستانتسيا ارقىلى 55 مىڭنان استام تۇرعىنى بار بايدىبەكتەگى 52 ەلدى مەكەن مەن 50 مىڭنان استام  تۇرعىنى بار سوزاق اۋدانى گازبەن قامتىلاتىن بولادى. بۇگىنگى تاڭدا 35 ەلدى مەكەنگە كوگىلدىر وتىن جەتكىزۋ جۇمىستارى جۇرگىزىلۋدە.

كوگىلدىر وتىنعا قول جەتكىزگەن العاشقى تۇرعىنداردىڭ ءبىرى بەيسەنبەك يگىسىنۇلىنىڭ شاڭىراعى بولدى. ۇلى وتان سوعىسىنىڭ ارداگەرى بەيسەنبەك اقساقالدى قۇرمەتتەگەن بيلىك وكىلدەرى بۇل وتباسىعا تابيعي وتىننىڭ تەگىن كىرگىزىلۋىن قامتاماسىز ەتتى.

 گاز بەرۋگە جانە گاز الاۋىن جاعۋعا وراي وتكەن سالتاناتتى شاراعا  وقو-نىڭ اكىمى بەيبىت اتامقۇلوۆ جانە «قازترانسگاز» اق باس ديرەكتورى قايرات شارىپباەۆ، مەردىگەر ۇيىمداردىڭ وكىلدەرى مەن جەرگىلىكتى تۇرعاندار قاتىستى.

اتالعان جوبانى ىسكە اسىرۋ، اگتس-تى جانە «بەينەۋ-بوزوي-شىمكەنت» ماگيسترالدىق گاز قۇبىرىنان وعان تارتىلاتىن گاز قۇبىرىن-بۇرعىشتى سالۋ «قازترانسگاز» اق-نىڭ ءوز قاراجاتى ەسەبىنەن جۇزەگە اسىرىلدى. گاز  قۇبىرى-بۇرعىشتىڭ جالپى ۇزىندىعى 32 كم قۇرايدى.

«قازترانسگاز» اق باس ديرەكتورى قايرات شارىپباەۆ كومپانيا حالىقتىڭ ءال-اۋقاتىن كوتەرۋگە باسا كوڭىل بولەتىندىگىن اتاپ ءوتتى. ونىڭ ايتۋىنشا، اۋىلدى جەردىڭ تۇرعىندارى قالا تۇرعىندارىنا قاراعاندا وزدەرىن كەم ساناماۋى ءتيىس. «قر پرەزيدەنتى ن. نازارباەۆتىڭ قازاقستان حالقىنا جولداۋىن ىسكە اسىرۋ اياسىندا «قازترانسگاز» اق جەرگىلىكتى اتقارۋشى ورگاندارمەن بىرلەسىپ، رەسپۋبليكانىڭ وڭىرلەرىن گازداندىرۋ جونىندە بەلسەندى جۇمىس جۇرگىزۋدە، ال بۇگىنگى ءىس-شارا سوعان تولىقتاي ايعاق بولماق. بايدىبەك اۋدانىن گازداندىرۋ جونىندەگى جوبانىڭ ماڭىزدى ەكونوميكالىق ءمانى بار. ءبىز ايتىلعان ۋادەلى ۋاقىتتا، ياعني ءدال جىلىتۋ ماۋسىمى باستالعان كەزدە كوپتەن كۇتكەن تابيعي گاز بەردىك. ەندى وسى ۇلكەن اۋداننىڭ 52 ەلدى مەكەنىندە تۇراتىن 55 مىڭنان استام ادامعا العاش رەت ەڭ ىڭعايلى وتىن ءتۇرىن پايدالانۋعا مۇمكىندىك الدى»، — دەپ اتاپ ءوتتى كومپانيا باسشىسى.

تەحنيكالىق تالاپتارعا سايكەس جاڭا اگتس-تىڭ وتكىزۋ قابىلەتى وتە جوعارى، سوندىقتان ول بايدىبەك اۋدانىنىڭ بارلىق ەلدى مەكەندەرىن عانا ەمەس، سونداي-اق كورشىلەس جاتقان 50 مىڭ تۇرعىنى بار ءىرى سوزاق اۋدانىنىڭ دا قاجەتتىلىگىن جابۋعا مۇمكىندىك بەرەدى.

كومپانيا گاز قۇبىرىنىڭ بويىندا ورنالاسقان ونەركاسىپتىك وبەكتىلەردى جانە ەلدى مەكەندەردى گازداندىرۋدى جالعىستىرادى. اتاپ ايتقاندا جامبىل وبلىسىنىڭ جاڭاتاس جانە قاراتاۋ قالالارىن دا گازداندىرۋ كوزدەلۋدە.

اباي-اقپارت