قازاقستاننىڭ تۇرعىن ءۇي قۇرىلىس جيناق بانكىنىڭ استاناداعى سالىمشىلارى ءۇشىن جاعىمدى جاڭالىق!

قازاقستاننىڭ تۇرعىن ءۇي قۇرىلىس جيناق بانكى ماماندارى استانا قالاسى بويىنشا سالىمشىلار باللدارىن ەسەپتەۋدە جاڭا وزگەرىستەر ەنگىزىلگەنىن حابارلايدى. سونداي-اق،  اۆتوماتتاندىرىلعان جۇيە ارقىلى بانك سالىمشىلارىنا تۇرعىن ءۇي ۇلەستىرۋدەگى جاڭالىقتار تۋرالى بىزگە تقجب-ءنىڭ استانا قالالىق فيليالىنىڭ ديرەكتورى ەلميرا قابلانوۆا (سۋرەتتە) بايانداپ بەردى.

ۇستىمىزدەگى جىلى استانا قالاسى بويىنشا  مەملەكەتتىك «وڭىرلەردى دامىتۋ 2020» باعدارلاماسى اياسىندا تۇرعىنداردان پاتەر ساتىپ الۋعا نەمەسە جالعا الىپ تۇرۋعا وتىنىمدەر قابىلداۋ باستالدى. وتىنىمدەر 4 قۇرىلىس نىساندارى بويىنشا قابىلدانۋدا.  قازىرگى تاڭدا العاشقى 2 پۋلدىڭ قورىتىندىلارى شىعارىلىپ وتىر. ءوتىنىم قابىلداۋدىڭ العاشقى كەزەڭى 5-مامىر كۇنى اياقتالعان بولاتىن. اتالمىش وتىنىمدەر قورىتىندىسى بويىنشا استانا قالاسى تىلەنديەۆ كوشەسىندە 134 پاتەر تۇرعىنداردىڭ پايدالانۋىنا بەرىلدى. ال ازاماتتاردان ءوتىنىش قابىلداۋدىڭ ەكىنشى كەزەڭى 4-قاراشا كۇنى توقتاتىلىپ، وتىنىشتەر بويىنشا قورىتىندىلار ازىرلەنگەن. قازاقستاننىڭ تۇرعىن ءۇي قۇرىلىس جيناق بانكىنىڭ سالىمشىلارى بانك كومەگىنىڭ ارقاسىندا ەكىنشى كەزەڭدە ءوتىنىم جازىپ،  استانا قالاسىنداعى يمانوۆ، برۋسيلوۆسكي جانە جۇبانوۆ كوشەلەرىنىڭ بويىنان 136 پاتەردىڭ كىلتى  جاڭا قوجايىندارىنا تابىستالدى. ايتا كەتەيىك، ءوتىنىش قابىلداۋدىڭ ەكىنشى كەزەڭىندە تۇرعىنداردان 5 مىڭنان استام ءوتىنىش كەلىپ تۇسكەن.

ال قازىرگى تاڭدا تقجب ازاماتتاردان ءوتىنىش قابىلداۋدىڭ ءۇشىنشى كەزەڭىن باستاپ وتىر. ءوتىنىشتى قابىلداۋ 17-قىركۇيەك پەن 17-قاراشا اراسىندا جۇرگىزىلەتىن بولادى. ال ءوتىنىش قابىلداۋدىڭ  سوڭعى ءتورتىنشى كەزەڭى 30-قىركۇيەك پەن 30-قاراشا ارالىعىندا جۇرگىزىلەدى.  استانا قالاسى بويىنشا اتالمىش كەزەڭدە بارلىعى 242 جاڭا پاتەر بانك سالىمشىلارىنا تابىستالاتىن بولادى.  مەملەكەتتىك تقجب باعدارلاماسى بويىنشا استانا قالاسىندا سالىنىپ جاتقان  تۇرعىن ۇيلەردىڭ ورتاشا باعاسى 1 شارشى مەترىنە 120 مىڭ تەڭگەدەن باستالىپ، 142 مىڭ تەڭگەگە دەيىن جەتەدى.

سونىمەن قاتار تقجب-ءنىڭ استانا قالالىق فيليالىنىڭ ديرەكتورى ەلميرا قابلانوۆا حانىم، سالىمشىلار باللدارىن ەسەپتەۋدە جاڭا تەحنولوگيالار ەنگىزىلگەنىن، تۇرعىن ۇيلەردى ۇلەستىرۋ پروتسەسستەرى اۆتوماتتاندىرىلعانىن، سالىمشىلار تولەمدەرى كرەديتتىك جانە دەپوزيتتىك جۇيەمەن جۇزەگە اساتىنىن جەتكىزدى.

«بۇرىن سالىمشىلارىمىز  قتقجب باعدارلاماسى بويىنشا جاڭا پاتەر الۋعا ءوتىنىش جازۋ ءۇشىن ۇزىن-سونار كەزەكتە تۇراتىن. ءتىپتى بانك اشىلماستان كەلىپ، ەسىك الدىندا كەزەككە تۇرىپ اۋرەگە تۇسەتىن. سەبەبى، ءبىرىنشى كەلگەن ادام ءبىرىنشى ءوتىنىش جازادى. دەمەك، ەرتەڭ پاتەر ۇلەستىرىلەتىن كەزدە دە بۇل ەسكەرىلەدى، سالىمشىنىڭ باللىنا اسەر ەتەتىن ەدى. ەندى سالىمشىلار ءوتىنىشتى ونلاين رەجىمدە جازا الادى. ازاماتتىڭ ۇيىندە ينتەرنەتكە كىرۋ مۇمكىندىگى جوق بولسا، ءبىزدىڭ بانككە كەلىپ، وزىنە-ءوزى قىزمەت كورسەتۋ ورنىنان ونلاين ءوتىنىش جازۋىنا مۇمكىندىك جاسالىپ وتىر: كەرەك دەپ تاپسا، ءبىزدىڭ بانك قىزمەتكەرلەرى كەڭەسىنە جۇگىنە الادى. ايتا كەتەيىك، ەندىگى جەردەن باستاپ ءوتىنىشتىڭ جازىلعان ۋاقىتى سالىمشىلار باللدارىن ەسەپتەگەندە ەشقانداي اسەر ەتپەيدى»،-دەيدى ە. قابلانوۆا.

سونىمەن ەندىگى جەردەن باستاپ سالىمشىلاردىڭ اي سايىنعى تۇراقتى  دەپوزيتىنە قۇيىپ وتىرعان قارجىسى عانا پاتەر ۇلەستىرۋدەگى باللدارىنا ىقپال ەتەتىن بولادى.

«ەڭ باستىسى ءبىز بالل ەسەپتەۋدە ادامي فاكتورلاردىڭ بارلىعىن جويدىق. ەندى باللداردى ەسەپتەۋ مەن پاتەر ۇلەستىرۋ اۆتوماتتى جۇيە ارقىلى جۇرگىزىلەتىن بولادى. اۆتومات ءوزى رەيتينگ جاساپ، قاتىسۋشىلاردىڭ ورتاق باللدارىن ەسەپتەپ شىعارادى. سونىمەن قاتار، تۇرعىنداردىڭ ءوتىنىشى بويىنشا ەندىگى جەردە پاتەر ۇلەستىرۋگە قاتىسۋشىلاردىڭ وتىنىشتەرى كەزەڭ-كەزەڭمەن جۇزەگە اساتىن بولادى. ەندى سالىمشىلارىمىز ءار كەزەڭدە ءوتىنىش بىلدىرە الادى»،- دەيدى ە. قابلانوۆا حانىم.

قتقجب اۆتوماتتاندىرىلعان جۇيەسى ارقىلى سالىمشىلار تەك ونلاين رەجىمدە ءوتىنىش جازىپ قانا قويماي،  نەسيەنى دە جەكە كابينەت ارقىلى تولەي الادى. سونداي-اق، دەپوزيتىن تولىقتىرۋ ءۇشىن بانككە بارىپ، ۇزىن-سونار كەزەكتە تۇرمايدى.  تولەمدەر VISA, VISA Electron, Mastercard, Maestro/Cirrus بارلىق بانككە نەمەسە American Express ارقىلى قابىلدانادى.

Abai.kz