وقو اكىمى  ب.اتامقۇلوۆ ورداباسى اۋدانىنا جۇمىس ساپارىمەن بارىپ، بىرقاتار الەۋمەتتىك جانە اۋىل شارۋاشىلىق نىساندارىمەن تانىستى دەپ حابارلايدى وقو اكىمىنىڭ ءباسپاسوز قىزمەتى.

117 مىڭعا جۋىق حالقى بار بۇل اۋدان ونەركاسىپ پەن اۋىل شارۋاشىلىعىنا بەيىم ءوڭىر. ساپار بارىسىندا وبلىس اكىمى شۇبارسۋ اۋىلىنداعى جاڭادان پايدالانۋعا بەرىلگەن 600 ورىندىق «ىنتىماق» جالپى ورتا مەكتەبىن ارالاپ كورىپ، ءبىلىم ورداسىنىڭ اينالاسىن كوگالداندىرۋدى تاپسىردى.

سونىمەن قاتار، ەلىمىزدەگى ەڭ ۇلكەن 16 گەكتار جەرگە ورنالاسقان «ادەليا» شارۋا قوجالىعىنىڭ جىلىجاي كەشەنىنىڭ جۇمىسىمەن تانىستى. ءۇيد مەملەكەتتىك باعدارلاماسى اياسىندا ىسكە قوسىلعان بۇل كەشەن جىلىنا 9 مىڭ توننا ءونىم وندىرەدى. زاماناۋي قۇرىلعىلارمەن قامتىلعان جىلىجايدا 100-دەن  استام ازامات جۇمىسپەن قامتىلعان.

اۋدانعا جاساعان ساپارىندا ايماق باسشىسى «بادام» يندۋستريالدىق ايماعىندا ورنالاسقان «اگرو-V» جشس-ءنىڭ «بورتە» ءسۇت تاۋارلى فەرماسىنىڭ قۇرىلىسى مەن اۆتوماتتاندىرىلعان جۇيەدەگى جاڭا تەحنولوگيالى قىش زاۋىتىندا بولدى. كۇنىنە 20 مىڭ توننا شيكى ءسۇت ءونىمىن وندەۋگە قاۋقارلى ءسۇت فەرماسىنىڭ قۇرىلىس جۇمىستارى 30 پايىزعا اياقتالعان. مۇندا شۆەيتساريالىق جاڭا تەحنولوگياداعى روبوت ساۋىنشىلارىمەن قامتاماسىز ەتىلەدى دەپ كۇتىلۋدە. اسىل تۇقىمدى ءسۇتتى باعىتتاعى «گولشتەين» تۇقىمدى ءىرى قاراسى جىلىنا 6-7 مىڭ ليتر ءسۇت بەرەدى دەپ جوسپارلانۋدا.

جۇمىس توبى «اگرو-V» جشس-ءنىڭ ەكىنشى جوباسى 2014 جىلى جۇمىسىن باستاعان قىش زاۋىتىن ارالاپ كوردى. ءۇيد مەملەكەتتىك باعدارلاما اياسىندا اشىلعان كاسىپورىن  كۇنىنە 70 مىڭ، ال جىلىنا – 22 ملن. دانا كەراميكالىق قىش شىعارادى.

مۇنان سوڭ اسىل تۇقىمدى مال شارۋاشىلىعى كورمەسىن تاماشالانىپ، شارۋالارمەن كەزدەسۋ ۇيىمداستىرىلدى. مال باسىن اسىلداندىرۋ باعىتىندا اۋداندا 3 اسىل تۇقىمدى مال شارۋاشىلىعى جۇمىس جۇرگىزۋدە. سولاردىڭ ءبىرى «ورداباسى» شارۋاشىلىعى قازاقتىڭ قىلشىق ءجۇندى قويىن اسىلداندىرادى. مۇندا 8 مىڭعا جۋىق اسىل تۇقىمدى قوي بار.  اتالىق مال باسى 120-125 كەلىگە دەيىن ەت بەرەدى. وڭىرىمىزدە وسىنداي قويدىڭ 70 مىڭ باسى بار. بۇل وقو عالىمدارىنىڭ 21 جىلدىق ەڭبەگىنىڭ جەمىسى.

وسىدان كەيىن، ءوڭىر باسشىسى «100 مەكتەپ 100 اۋرۋحانا» باعدارلاماسى اياسىندا 2009 جىلى پايدالانۋعا بەرىلگەن اۋداندىق ورتالىق اۋرۋحاناعا باردى. 240 ناۋقاستى قابىلداپ، ەمدەۋگە قاۋقارلى مەكەمەدە بۇگىنگى تاڭدا 47 دارىگەر قىزمەت ەتۋدە. اۋدان تۇرعىندارىنا 55 ەمدەۋ–پروفيلاكتيكالىق مەكەمەلەر، اتاپ ايتقاندا، 1 اۋداندىق ەمحانا، 1 اۋداندىق اۋرۋحانا، 2 اۋىلدىق اۋرۋحانا، 12 دارىگەرلىك امبۋلاتوريا، 21 فەلدشەرلىك-اكۋشەرلىك بەكەت، 18 مەديتسينالىق بەكەت قىزمەت كورسەتەدى. اۋداندا سالاۋاتتى ءومىر سالتىن قالىپتاستىرۋ جانە اۋرۋلاردىڭ الدىن الۋ باعدارلاماسىنا سايكەس 9 باعىتتا جۇمىستار اتقارىلۋدا.

ساپار سوڭىندا وبلىس اكىمى تەمىرلان اۋىلىنداعى حالىققا قىزمەت كورسەتۋ ورتالىعىنىڭ جۇمىسىمەن تانىستى. بۇل ورتالىققا كۇنىنە 300-گە تارتا تۇتىنۋشى كەلەدى. وسى جىلدىڭ توعىز ايىندا 101829 قۇجات قابىلدانعان.  

اباي-اقپارات