جاھاندىق ەكونوميكالىق داعدارىس، گەوساياسي شيەلەنىستەر، سانكتسيالىق تەكەتىرەستەر، سونداي-اق، ەنەرگيا رەسۋرستارىنا الەمدىك باعانىڭ تومەندەۋى الەمدىك ۇدەرىستەردىڭ بەلسەندى قاتىسۋشىسى - ءبىزدىڭ ەلىمىزگە اسەر ەتپەۋى مۇمكىن ەمەس.

ەلباسى اتاپ وتكەندەي، «...تاياۋداعى جىلدار جاھاندىق سىناقتاردىڭ ۋاقىتى بولادى. الەمنىڭ بۇكىل ارحيتەكتۋراسى وزگەرەدى. بارلىق ەلدەر وسى كۇردەلى كەزەڭنەن لايىقتى وتە المايدى. بۇدان تەك مىقتى مەملەكەتتەر، جۇدىرىقتاي جۇمىلعان حالىقتار عانا وتەتىن بولادى...». وسى ماقساتتار بويىنشا وڭتۇستىك قازاقستان وبلىسىندا اۋدان اكىمدەرى ەلباسى تاپسىرمالارىن ورىنداۋدا جۇيەلى جۇمىستار جۇرگىزۋدە. ءبىز بۇل تۋرالى وسىنىڭ الدىندا دا جازعان بولاتىنبىز.

ەلباسى ن.ءا.نازارباەۆتىڭ «نۇرلى جول – بولاشاققا باستار جول» اتتى جولداۋىنىڭ قازىعۇرت اۋدانىندا ورىندالۋى بويىنشا قر ورتالىق كوممۋنيكاتسيالار قىزمەتىنىڭ وقو فيليالىندا اۋدان اكىمى ب.قىستاۋوۆ مالىمدەمە جاسادى.

 اۋداندا جوسپارلانعان 88200 گا ەگىستىك جەر تولىعىمەن يگەرىلىپ، وتكەن جىلمەن سالىستىرعاندا 2900 گەكتارعا ارتقان. ماسەلەن، استىق داقىلدارى 100891 توننا، ماقسارى 15800 تن، كۇنباعىس 775,2 تن، كوكونىس 736 تن، كارتوپ 520 تن، جۇگەرى 1622 توننا ءونىم جينالعان. ال، اۋدان حالقىن قىس ايلارىندا كوكونىس ونىمدەرىمەن قامتاماسىز ەتۋ ماقساتىندا جىلىجاي كولەمى 82,8 گا جەتكىزىلگەن. اعىمداعى جىلعا بەرىلگەن 8 گا جىلىجاي سالۋ تاپسىرماسى 9 ايدا 8,18 گا بولىپ ورىندالىپ 102,3 پايىزدى قۇراعان. ولاردان وندىرىلگەن 32800 توننا ءونىم الماتى، استانا، شىمكەنت قالالارىنا ساتىلۋى قامتاماسىز ەتىلدى.

 سونداي-اق، بريفينگتە اۋدان اكىمى مەملەكەتتىك باعدارلاما «سىباعا»، «قۇلان»، «التىن اسىق» اياسىندا بەرىلگەن تاپسىرمالار ارتىعىمەن ورىندالعان.

ال، بيىل يندۋستريالاندىرۋ كارتاعا جالپى سوماسى 1592,1 ملن.تەڭگەلىك 5 جوبا ەنگىزىلگەن. سونىمەن قاتار، اۋدانعا جىل باسىنان بەرى 2461,2 ملن. تەڭگە كولەمىندە ينۆەستيتسيا تارتىلعان.

مەملەكەتتىك باعدارلامالاردىڭ ءبىرى «جۇمىسپەن قامتۋ 2020». بۇل باعىتتا اتقارىلعان جۇمىستار ناتيجەسىندە اۋدان كولەمىندە 1800 جاڭا جۇمىس ورنىن اشۋ جوسپارلانسا، 1978 جاڭا جۇمىس ورىندارى اشىلىپ جوسپار 110 پايىزعا ورىندالدى. تۇراقتى جانە ۋاقىتشا جۇمىسقا ورنالاستىرۋ جوسپارى 1080 ادام بولسا، ول 1361 ادام بولىپ، جوسپار 126 پايىزعا ورىندالىپ وتىر. ال، اقىلى قوعامدىق جۇمىسقا 431 ادام جىبەرۋ قارالسا، وعان 444 ادام تارتىلدى. جۇمىسپەن قامتۋعا بولىنگەن 19958,0 مىڭ تەڭگە قارجى تولىعىمەن يگەرىلگەن.

 اۋدان اكىمىنىڭ ءباسپاسوز قىزمەتى