دۇيسەنبى, 6 جەلتوقسان 2021
بيلىك 3177 0 پىكىر 4 جەلتوقسان, 2015 ساعات 03:00

«تاريحي فوتوسۋرەتتەر» فوتوبايقاۋىنىڭ جەڭىمپازى

استاناداعى ۇلتتىق مۋزەي قازاق حاندىعىنىڭ 550 جىلدىعى، جەڭىستىڭ 70 جىلدىعى، قازاقستان رەسپۋبليكاسى كونستيتۋتسياسى مەن قازاقستان حالقى اسسامبلەياسىنىڭ 20 جىلدىعى سىندى اتاۋلى داتالارعا ارناپ «تاريحي فوتوسۋرەتتەر» اتتى رەسپۋبليكالىق فوتوبايقاۋ جاريالاعان بولاتىن. سول بايقاۋدىڭ قورىتىندىسى ناتيجەسىندە شىمكەنتتىك فوتوگراف ماقسات شاعىرباەۆ كونستيتۋتسيانىڭ 20 جىلدىعى  مەن قازاقستان حالقى اسسامبلەياسىنىڭ 20 جىلدىعى نوميناتسياسى بويىنشا جەڭىمپاز اتاندى.

 

– ءبىزدىڭ بەيبىت زاماندا ءومىر ءسۇرىپ جاتقانىمىز ءبىرىنشى اللانىڭ، ەكىنشى اتا-بابالارىمىز ات ۇستىندە ۇيىقتاماي، جاۋىن جەر جاستاندىرىپ، قاسىق قانى قالعانشا قورعاعانىنىڭ ارقاسى. بىزگە قۇس ۇشسا قاناتى تالاتىن، ات شاپسا تۇياعى تالاتىن ۇلان-عايىر جەردى امانات ەتتى. كەزىندە جاۋىنا نايزا ۇستاپ شاپقان باتىر بابالارىمىزدىڭ ۇرپاعى بۇگىن كەڭ دالادا كوك تۋىن جەلبىرەتىپ العا قاراي شاۋىپ بارا جاتقانىن فوتوسۋرەت ارقىلى جەتكىزگىم كەلدى. سونداي-اق، ەلىمىزدە مەكەندەگەن ءتۇرلى ۇلت وكىلدەرىنىڭ تاتۋ-ءتاتتى ءبىر شاڭىراق استىندا عۇمىر كەشىپ جاتقانىن كورسەتكەن سۋرەتىم دە جۇلدە الىپ، قۋانىشقا كەنەلتىپ وتىر، – دەيدى ماقسات شاعىرباەۆ.

ەندى جەڭىمپازدار 2016 جىلدىڭ قاڭتار ايىندا ارنايى ماراپاتتالىپ، ۇلتتىق مۋزەيدە كورمەسى ۇيىمداستىرىلادى.

ەستەرىڭىزگە سالا كەتەيىك، «تاريحي فوتوسۋرەتتەر» رەسپۋبليكالىق فوتوبايقاۋى تومەندەگى ەرەجە بويىنشا ءوتتى: 

قازاق حاندىعىنىڭ 550 جىلدىعى;

جەڭىستىڭ 70 جىلدىعى;

قر كونستيتۋتسياسىنىڭ 20 جىلدىعى;

قازاقستان حالقى اسسامبلەياسىنىڭ 20 جىلدىعى;              

بايقاۋدىڭ شارتتارى

1. بايقاۋعا كاسىبي جانە اۋەسقوي فوتوگرافتار قاتىسا الادى، جاسىنا شەكتەۋ قويىلمايدى.

2. jpg (jpeg) فورماتىنداعى تۇپنۇسقا فوتوسۋرەتتەر قابىلدانادى. كولەمى 300*1200-دان كەم  بولماۋى كەرەك.

3. بايقاۋعا اق-قارا ءتۇستى سۋرەتتەر دە قابىلدانادى.

4. فوتوكوللاج، ارنايى ەففەكتىلەرمەن وڭدەلگەن فوتوسۋرەتتەر قابىلدانبايدى.

5. بايقاۋعا ساپاسىز، تالاپقا ساي كەلمەيتىن فوتوسۋرەتتەر قاتىستىرىلمايدى.

6. بايقاۋعا قاتىسۋشى ءاربىر تاقىرىپ بويىنشا 3 فوتوسۋرەتتەن، بارلىعى 12 فوتوسۋرەت جولداۋى ءتيىس.

7. فوتوسۋرەتتەر قاتىسۋشى جايلى تولىق اقپاراتپەن (اتى-ءجونى، تۇرعىلىقتى جەرى، جۇمىس ورنى، بايلانىس تەلەفوندارى، فوتوسۋرەتتىڭ تاقىرىپتىق اتاۋى، قايدا، قاشان تۇسىرىلگەنى تۋرالى ت.ب) قوسا ەلەكتروندى پوشتامىزعا جىبەرىلۋى ءتيىس.

8. بايقاۋعا فوتوسۋرەتتەر جىبەرۋ ارقىلى قاتىسۋشى بايقاۋ ەرەجەسىندە كورسەتىلگەن بارلىق تالاپتارمەن كەلىسەتىندىگىن راستايدى. ياعني، بايقاۋعا قاتىسۋشى ءوزى جايلى اقپاراتتاردىڭ جانە ونىڭ فوتوسۋرەتتەرىنىڭ جاريالانۋىنا قارسى ەمەستىگىن ماقۇلدايدى. قازاقستان رەسپۋبليكاسىنىڭ اۆتورلىق قۇقىق جانە ساباقتاس قۇقىقتار تۋرالى زاڭنىڭ تالاپتارىن تولىقتاي ساقتايتىنىنا كەپىلدىك بەرەدى. اۆتورلىق قۇقىق ماسەلەسىنە بايقاۋعا قاتىسۋشى تاراپ جاۋاپتى.

8. سۋرەتتەر ارنايى مامانداردان جاساقتالعان قازىلار القاسىمەن ىرىكتەلىپ الىنادى.

بايقاۋعا قاتىساتىن فوتوسۋرەتتەردى ىرىكتەۋ شارتتارى

 

-        بايقاۋ ەرەجەسىندە كورسەتىلگەن بارلىق تاقىرىپتاردىڭ قامتىلۋى;

 

-        كوركەمدىك شەشىمنىڭ سونىلىعى، بايقاۋ تاقىرىپتارىن ەرەكشە جەتكىزۋ;

 

-        فوتوسۋرەتتىڭ ساپالىلىعى: بەينەنىڭ انىقتىعى، دالدىگى;

 

-        فوتوسۋرەتتەردى ازىرلەۋدەگى كاسىبي كوركەمدىك تالعام.

Abai.kz

0 پىكىر