بۇۇ-نىڭ ىزگى نيەتتى ەلشىسى، حولليۆۋد  جۇلدىزى انجەلينا دجولي وتكەن اپتانىڭ سەنبىسىندە، 20 ماۋسىم تۇركيانىڭ ماردين قالاسىندا ەرەجەپ تايپ ەردوعانمەن كەزدەستى. ول، تۇركيانىڭ سيريامەن جانە يراكپەن شەكارالاس اۋماعىنداعى ماردين ايماعىنىڭ ميديات اۋدانىندا  وتكىزىلگەن بوسقىندارمەن كەزدەسۋ لاگەرىنە بۇۇ-نىڭ بوسقىندار ىستەرى جونىندەگى جوعارعى كوميسسارى انتونيو گۋتەررەسپەن بىرگە كەلگەن. ولار قالىن سۇراي كەلگەن بەس جارىم مىڭداي يراكتىق جانە سيريالىق بوسقىندار قالانىڭ اقشاكايا ماحاللەسىندە ۋاقىتشا باسپاناعا قونىستاندىرىلعان.  ايماققا ەكى ءمينيسترىن ەرتە كەلگەن ەردوعان بۇۇ وكىلدەرىمەن جارىم ساعاتقا جاۋىق باق-قا جابىق كەزدەسۋ وتكىزدى. لاگەرى بوسقىنداردىڭ تۇركيا اۋماعىنا كىرۋىنە جىل تولۋىنا وراي ۇيىمداستىرىلعان. مۇندا جينالعان ساياسي باسپانا سۇراۋشىلاردىڭ كەيبىرى دجوليمەن كەزدەسۋىندە تۋعان ولكەسىنە كەرى قايتقىسى كەلمەيتىنىن، ەۋروپاعا كەتكىسى كەلەتىنىن بىلدىرگەن.

كەزدەسۋدەن سوڭ ەردوعان تۇركيانىڭ 2 ميلليوننان استام بوسقىنعا يە شىعىپ وتىرعانىن، ولارعا كومەك رەتىندە سىرت مەملەكەتتەردەن 370 ميلليون دوللار قارجى كەلگەنىن، الايدا تۇركيانىڭ بوسقىنداردى قابىلداۋعا جۇمساعان قاراجاتى 6 ميلليارد دوللاردان اسقانىن ايتتى. ونىڭ ايتۋىنشا، تۇركيا 2011 جىلى 10 مىڭ عانا بوسقىن قابىلداسا، سوڭعى ءبىر جىلدا ەلگە كەلگەن بوسقىندار 2 ميلليوننان استى.

ءوز كەزەگىندە انجەلينا دجولي تۇركيانىڭ كەڭ قۇشاقتىعىنا ىستىق ىقىلاسىن ايتىپ، وزگە ەلدەرگە ۇلگى بولار ارەكەتىنە العىس بىلدىرگەن. ول بوسقىندار اراسىنداعى ايەلدەر مەن بالالار سانىنىڭ كوپتىگىنە باسا نازار اۋدارىپ، جۇرتتى كومەك كورسەتۋگە شاقىردى.

انجەلينا دجولي بۇعان دەيىن دە انتونيو گۋتەررەسپەن بىرگە 2012 جىلدىڭ قىركۇيەگىندە تۇركيانىڭ سيريامەن شەكارالاس بىرقاتار اۋداندارىندا بوسقىنداردىڭ جاعدايىن كوزدەن كەشىرىپ، انكارادا بۇرىنعى پرەزيدەنت گۇلمەن كەزدەسكەن بولاتىن.

Abai.kz