كەشە، شىعىس قازاقستاندا "قازاقمىس" كورپوراتسياسىنىڭ اقتوعاي كەن ورنىندا جۇمىسشىلار اراسىندا توبەلەس بولىپ، 31 ادام زارداپ شەككەن. بۇگىن وسىعان وراي قازاقستان ۇكىمەتىندە شىعىس قازاقستانداعى كەن ورنىندا بولعان جاپپاي توبەلەسكە بايلانىستى شۇعىل جيىن ءوتتى. بۇل تۋرالى Tengrinews.kz جاڭالىقتارى حابارلادى.

ءتارتىپ ساقشىلارى وقيعانىڭ 8 شىلدە كۇنى "قازاقمىس" كورپوراتسياسىنىڭ تاۋ-بايىتۋ كومبيناتىنىڭ اسحاناسىندا بولعانىن، جۇمىسشىلاردىڭ ءبىرىنىڭ تاماق ساپاسىنا نالىپ، كومبينات اسپازىنا دەنە جاراقاتىن سالعانىن، بۇدان كاسىپورىن جۇمىسشىلارىنىڭ ءبىر-بىرىمەن توبەلەسۋى باستالعانىن حابارلادى.

وقيعا تۋرالى: "اقتوعاي اۋىلدىق پوليتسيا ءبولىمىنىڭ قىزمەتكەرلەرى وقيعا ورنىنا كەلگەن كەزدە توبەلەس اياقتالدى. توبەلەس سالدارىنان كومبيناتتىڭ 31 جۇمىسشىسى زارداپ شەكتى، ونىڭ ىشىندە بىرەۋى كۇزەتشى جانە تاعى 21-ءى قىتاي حالىق رەسپۋبليكاسىنىڭ جانە قازاقستاننىڭ ازاماتتارى. ولار وسكەمەن مەن اياگوز قالالارىنىڭ مەديتسينالىق مەكەمەلەرىنە جەتكىزىلدى. دەنە جاراقاتىن سالۋ جانە بۇزاقىلىق ارەكەتتەر دەرەگى بويىنشا سوتالدى تەرگەۋ امالدارى ءجۇرىپ جاتىر. ", - دەلىنگەن ءىىد حابارلاماسىندا.

بۇگىن، سىرتقى ىستەر مينيسترلىگى تارتاقان اقپارات بويىنشا قحر ازاماتتارى مەن جەرگىلىكتى تۇرعىندار اراسىنداعى جاپپاي توبەلەسكە  بايلانىستى ۇكىمەتتە مۇددەلى مەملەكەتتىك ورگانداردىڭ بارلىعىنىڭ قاتىسۋىمەن شۇعىل جيىن وتكىزىلدى.

مينيسترلىكتەگىلەردىڭ مالىمدەۋىنشە، ءتارتىپ ورناتىپ، وقيعانى تولىق تەرگەۋ ءۇشىن بارلىق شارا قولعا الىندى. "زاڭعا سايكەس ەكى تاراپتىڭ دا كىنالى ازاماتتارىنىڭ جاۋاپقا تارتىلاتىنىنا سەنىمدىمىز. قر ءسىم قحر-ءدىڭ قازاقستانداعى ەلشىلىگىنە ءتيىستى جاردەمدى كورسەتەدى", - دەيدى ۆەدومستۆوداعىلار.

اباي-اقپارات