2015 جىلعى شىلدەدە ەلىمىزدەگى كۇنكورىستىڭ ەڭ تومەنگى دەڭگەيىنىڭ شاماسى 19 202 تەڭگەنى قۇرادى. بۇل رەتتە نەگىزگى تاماق ونىمدەرىن تۇتىنۋدىڭ ەڭ تومەنگى نورمالارىنان ەسەپتەلگەن ورتا ەسەپپەن حالىقتىڭ جان باسىنا شاققانداعى كۇنكورىستىڭ ەڭ تومەنگى دەڭگەيىنىڭ شاماسى 2015 جىلعى شىلدەدە وتكەن ايمەن سالىستىرعاندا 2,4 پايىزعا، 2014 جىلعى شىلدەمەن - 2 پايىزعا تومەندەگەن. بۇل تۋرالى ۇلتتىق ەكونوميكا مينيسترلىگىنىڭ ستاتيستيكا كوميتەتىنەن حابارلاعان.

قازاقپارات جازعانداي، ستاتيستيكالىق مالىمەتتەرگە قاراعاندا، كۇنكورىس دەڭگەيىنىڭ قۇرىلىمىندا ەت پەن بالىقتى ساتىپ الۋعا جۇمسالعان شىعىستاردىڭ ۇلەسى 21,6 پايىز، ءسۇت، ماي جانە توڭ ماي ونىمدەرى مەن جۇمىرتقانى - 16,2 پايىز، جەمىستەر مەن كوكونىستەردى - 12,2 پايىز، نان جانە جارما ونىمدەرىن - 8 پايىز، قانت، شاي جانە دامدەۋىشتەردى - 2 پايىزدى قۇراعان.

سونىمەن قاتار، كۇنكورىس دەڭگەيىنىڭ قۇرىلىمىنداعى ازىق-تۇلىك تاۋارلارىنىڭ ۇلەسى 11 مىڭ 521 تەڭگەنى، ال ازىق-تۇلىك ەمەس تاۋارلار مەن اقىلى قىزمەتتەر ۇلەسى 7 مىڭ 681 تەڭگەنى قۇراعان. 

اباي-اقپارات