جامبىل وبلىستىق اكىمدىگىنىڭ اپپاراتى 12 ميلليون 350 مىڭ تەڭگەگە كولىك ساتىپ الدى دەپ حابارلايدى nur.kz ءوز دەرەككوزىنە سىلتەمە جاساپ.
“اقش دوللارىنىڭ تەڭگەگە شاققانداعى بۇگىنگى باعامىمەن 66 مىڭ دوللار تۇراتىن كولىك تابان استىندا كىمگە، نە ءۇشىن قاجەت بوپ قالعانىن  بىلمەيمىز. بىراق، جاقىندا عانا “قازاق حاندىعىنىڭ 550 جىلدىعىن” اتاپ ءوتۋ ءىس-شارالارىن وڭىرگە ارنايى كەپ، پىسىقتاپ قايتقان ۆيتسە-پرەمەر بەردىبەك ساپارباەۆ تويعا جۇماسالاتىن قارجىنى ۇنەمدەپ، ءار تيىنىنا دەيىن ەسەپ بەرەتىندەي ەتىپ جۇمساۋدى قاتاڭ تاپسىرعان-دى. قىمبات كولىككە تويدىڭ اقشاسى جۇمسالماعان دا بولار. الايدا، توي قارساڭىندا تارازدى تارانعان قىزداي ەتىپ، كوركەيتۋگە قارجى بىردە جەتىپ، بىردە جەتپەي، ءار وبلىس “تويعا قوسقانىمىز بولسىن” دەپ، ءبىرى كوشە جوندەپ، ءبىرى ساياباق سالىپ بەرىپ جاتقاندا قىمبات كولىكتى الماي قويا تۇرسا دا بولار ەدى عوي”، – دەپ جازادى ماقالا اۆتورى.

جامبىل وبلىستىق اكىمدىگىنىڭ اپپاراتى ەلەكتروندى مەملەكەتتىك ساتىپ الۋ نەگىزىندە بەرگەن تاپسىرىستا  كولىكتىڭ مىنەزدەمەسى ايقىن جازىلعان.

“F كالسستى، جاقسى جاراقتالعان، ۇزىندىعى  4,9 م ۇلكەن ەمەس، ەنى 1,7 م، تولىقتاي ەلەكتروپاكەتتى، ورتالىقتاندىرىلعان قۇلىپ، ABS,SRS, گۋر، پەپ، كونديتسيونەرى…” تاعى باسقا تولىپ جاتقان تالاپتارىن مەملەكەتتىك تاپسىرىستىڭ لوتىنا تىزبەلەپ شىققان.

بۇل كولىككە تاپسىرىس مەملەكەتتىك ساتىپ الۋ سايتىنا جامبىل وبلىستىق اكىمدىگى  دۇيسەنبى، 3 تامىز كۇنى  ساعات 12.48 دە ورنالاستىرعان. ال كولىكتى كەشكە دەيىن الىپ ۇلگەرگەن.

“قاراپايىم ەلدىڭ ارىز-شاعىمىن، ءوتىنىشىن وسىنداي كوسموستىق جىلدامدىقپەن شەشىپ تاستاسا جامبىلدىق شەنەۋنىكتەرگە ايتار العىس كوپ بولار ەدى-اۋ”، – دەلىنگەن ماقالادا.

كولىكتى  جامبىل وبلىستىق اكىمدىگىنىڭ اپپاراتى “ازيا اۆتو” جشس-نان الىپ ۇلگەرگەن. ال جشس-نىڭ “سالونىنداعى” كولىكتەردىڭ ىشىندە جوعارىداعى تالاپتارعا ساي كەلەتىنى Premium+ كومپلەتكتاتسياسىنداعى KIA Quoris.

كولىكتىڭ سالونى تابيعي بىلعارىمەن قاپتالعان. اعاش جانە اليۋميني جاقتاۋلارمەن جابدىقتالعان. سالونداعىلار بۇل كولىكتىڭ تەرەزەلەرى سۋ جۇقتىرمايتىن قاسيەتكە يە ەكەندىگىن دە اۋىزدارىنىڭ سۋى قۇرىپ ايتىپ بەردى. جۇرگىزۋشى تۇگىلى ىشىنە مىنگەن جولاۋشىنىڭ دا قولايلىلىعى، ىڭعايلىلىعى ءۇشىن بار جاعداي جاسالعانىن تاعى قوسىڭىز.

قىمبات كولىكتى ساتىپ الۋ تۋراسىنداعى حاتتامادا وبلىس اكىمدىگى اپپاراتى جەتەكشىسىنىڭ ورىنباسارى تيمۋرجان نۇرىمبەتوۆ پەن اكىمدىكتىڭ باس مامانى گۇلجان داۋرەنوۆانىڭ ەسىمدەرى جازىلىپتى.

ەسكە سالساق، قازاق حاندىعىنىڭ 550 جىلدىق تويىن ءوز دەڭگەيىندە وتكىزە الماساڭ “باسىڭ كەتەدى” دەپ ەدى بەردىبەك ساپارباەۆ كارىم كوكىرەكباەۆقا.

اباي-اقپارات