قىزىلجاردا رەسەي پرەزيدەنتىنىڭ اياعى تيەدى-اۋ دەگەن كوشەلەر عانا قاربالاس جوندەلىپ جاتىر. شاھاردا الداعى جىلى شەكارالاس مەملەكەتتەردىڭ فورۋمى وتپەك ەكەن.  بۇل تۋرالى كتك ارناسى حابارلاعان. NUR.KZ-ءتىڭ جازۋىنشا، بۇل شاراعا قىزۋ دايىندالىپ جاتقان اتقامىنەرلەر ونسىز دا جىلدا جوندەلەتىن ورتالىق كوشەلەردى قايتا جاماۋدا. سالدارىنان قالادا كۇنى بويى  ۇزىن-سونار كولىك بوگەلىسى كوبەيگەن. ال، قىزىلجاردىڭ وزگە كوشەلەرىنىڭ بيىلدىققا ءتىپتى شۇڭقىرلارى دا تەگىستەلمەيتىن ءتۇرى بار.

پەتروپاۆلدىڭ ورتالىعىندا كۇنى بويى قاربالاس. جيەكتاستاردى الماستىرىپ جاتقان بريگادانىڭ سوڭىنان اسفالت توسەيتىن كولىك جۇرەدى. مۇنشاما جولدىڭ  ءبىر مەزەتتە جوندەۋگە جابىلماعانىنا كوپ بولىپتى. قيىلىستاعى جاعدايدى رەتتەۋگە شىققان جول ساقشىسى دا ماشينالاردى  وتكىزىپ ۇلگەرمەي جاتىر ەكەن. بۇل ورتالىق كوشەلەر جىلدا جوندەلەدى. كەيبىرىنىڭ شۇڭقىرلارى جامالسا، وزگەلەرى تولىعىمەن بىلتىر عانا اسفالتتالعان ەدى. ەندى بيىل سونىڭ ۇستىنەن تاعى جاڭاسى جامالىپ جاتىر. ەسەسىنە مىنا كوشەگە مۇنداي تەحنيكانىڭ تابانى تيمەگەلى بەس جىل. شۇڭقىرلاردى اينالىپ وتپەك بولعان كولىك يەلەرى ءتىپتى قارسى باعىتقا شىعۋعا ءماجبۇر.

بۇنداي قىزۋ قاربالاستىقتى قىزىلجاردا الداعى جىلى قازاقستان مەن رەسەيدىڭ فورۋمى وتەدى. بيىلعى جوندەۋ جۇمىستارى سول شاراعا دايىندىق دەيدى شەنەۋنىكتەر. “2016 جىلى وتەتىن شەكارالاس ەلدەردىڭ فورۋمىنى بايلانىستى رەسپۋبليكالىق بيۋدجەتتەن 2 ميلليارد تەڭگە ءبولىندى. بۇل اقشا 10 كوشەنى تولىق جوندەۋگە جەتەدى. ول  جولمەن  فورۋم دەلەگاتتارى جۇرەتىن بولادى. بارلىق جۇمىستار قىركۇيەك ايىندا اياقتالۋى ءتيىس”، – دەگەن پەتروپاۆل قالالىق تۇرعىنۇي-كوممۋنالدىق شارۋاشىلىعى ءبولىمىنىڭ ينسپەكتورى جاقسىلىق اقكوزوۆ.

اباي-اقپارات