قۇرمەتتى ەلىمىزدىڭ ازاماتتارى، قازاق جاستارى!

 قازىرگى قوعامىمىزدا اقپاراتتىق تەحنولوگيالاردىڭ جەتىستىكتەرى سانالاتىن الەۋمەتتىك جەلىلەر ارقىلى كوپتەگەن مۇمكىندىكتەر اشىلۋدا. سوعان بايلانىستى قازىرگى ەل ازاماتتارى، اسىرەسە جاستار مەن جاسوسپىرىمدەر بۇل قىزمەتتى تۇراقتى پايدالانادى. اقپاراتتاردىڭ تەز تاراۋىنا مۇرىندىق بولىپ وتىرعان وسى جەلىلەر ارقىلى ءارتۇرلى مازمۇنداعى بەينەروليكتەر نەمەسە ۇندەۋلەر، حابارلامالار دا تارالىپ جاتادى. كەيبىر ازاماتتار ءدىني مازمۇنداعى اقپاراتتاردى كەزدەيسوق جىبەرسە، كەيبىر اقپاراتتار جوسپارلى تۇردە تاراتىلادى. سول ارقىلى ادامدار ءبىر-بىرلەرىمەن تانىسىپ، كوزقاراستارىن ءبولىسىپ، بىرتەكتى ۇستانىمداعى ادامدار بىرىگىپ توپ قۇرىپ جاتادى.

الايدا، كوپتەگەن بەلگىسىز اقپاراتتار مەن حابارلامالار ازاماتتارىمىزدىڭ ءدىني كوزقاراسىن قالىپتاستىرۋعا باعىتتالعان. ولاردىڭ ىشىندە ەڭ بەلسەندى تارالىپ وتىرعانى ەلىمىز ءۇشىن ءداستۇرلى ەمەس بولىپ سانالاتىن ءدىني ۇيىمدار مەن توپتاردىڭ، ءتىپتى ەكسترەميستىك،  تەرىس سەنىمدىك مالىمەتتەر دەۋگە بولادى. سوندىقتان قازىرگى ءدىني جاڭعىرۋ، دىنگە ورالۋ كەزەڭىندە كەيبىر ازاماتتارىمىزدىڭ بۇرىس باعىتتاعى ءدىني كوزقاراسقا بايقاماي بەت بۇرىپ، ءدىندارلار اراسىندا كوپتەگەن تۇسىنىسپەۋشىلىكتەرگە، قايشىلىقتارعا، كەيدە اسىرەدىنشىلدىك (راديكالدىق) فورماداعى قيمىلدارعا سەبەپ بولىپ وتىر. وسى سەبەپتى، ءدىن جولىنا، يماندىلىق جولىنا بەت بۇرعىسى كەلەتىن، نە بولماسا ءدىني ساۋاتىن جەتىلدىرگىسى كەلەتىن ازاماتتار، جاستار ءدىني ءبىلىم مەن مالىمەتتەردى ەلىمىز ءۇشىن ءداستۇرلى بولىپ سانالاتىن اقپارات كوزدەرىنەن الۋى بارىنشا ماڭىزدى. ال ءدىني تاقىرىپتا سەنىمدى ءارى بىلىكتى مالىمەتتەردى تاراتىپ وتىرعان اقپارات كوزدەرى، ولار قازاقستان مۇسىلماندار ءدىني باسقارماسىنا تيەسىلى سايتتار مەن مەرزىمدىك باسىلىمدار بولىپ تابىلادى. ولاردىڭ قاتارىندا «e-islam.kz»، «muftiyat.kz»، «muslim.kz»، «azan.kz»، «islam.kz, سياقتى بەلدى ينتەرنەت سايتتارى بار.

اسىرەسە «e-islam.kz» سايتىندا ءدىن سالاسىنىڭ بىلىكتى ساراپشىلارى وقىرماندار تاراپىنان قويىلعان ساۋالدارعا لايىقتى دەڭگەيدە جاۋاپتار بەرىپ وتىرادى. ءدىني كوزقاراستارىمىز بەن باعىتىمىزدىڭ سەنىمدى اقپاراتتاردان مالىمەت الۋى، ءدىني ءبىرتۇتاس پىكىرىمىزدىڭ قالىپتاسۋى ەلىمىزدىڭ رۋحاني تۇراقتىلىعى مەن بىرلىگى ءۇشىن، ءارى رۋحاني قارىشتاپ دامۋىمىز ءۇشىن اسا ماڭىزدى بولىپ تابىلادى. سوندىقتان ءاربىرىمىز وزىمىزگە، سەنىمىمىزگە، وتباسىمىزعا، جاقىنىمىزعا جاۋاپكەرشىلىكپەن قارايىق!!!

كەڭشىلىك تىشحان، ءدىنتانۋشى

Abai.kz