ءيا، تەڭگە قۇنسىزداندى. قۇنسىزدانعاندا دا وڭباي قۇنسىزداندى. كەشەگىنى قوسقاندا 35 پايىزعا ءبىر تاۋلىكتىڭ ىشىندە قۇلدىرادى. بۇل دەگەنىڭىز، كىم نە دەسە دە، قازاقستان وسىنشا پايىزعا كەدەيلەندى دەگەن ءسوز. كەدەيلەنبەي كور. مەملەكەتىڭنىڭ تابىسى وسى ۆاليۋتاعا تىكەلەي بايلانىستى بولسا... تاڭەرتەڭنەن مىڭ قۇبىلعان اقشا باعامىن سارالاۋعا Abai.kz ءتىلشىسى بازار جاعالاپ كوردى.

الماتىداعى كوكبازار ماڭىنداعى اقشا ايىرباستاۋ ورىندارىنداعى باعام سۋرەتتەگىدەي. ال، بازارداعى ساتۋشىلارعا ءتىلشىنىڭ «دوللار باعامى تاۋارلارىڭىزدىڭ باعامىنا اسەر ەتتى مە؟» دەگەن سۇراعىنا، ساتۋشىلار ازىرگە بازارداعى حالىق كوپ تۇتىناتىن ازىق-تۇلىكتىڭ باعاسى وزگەرە قويماعانىن، الايدا جاعارمايدىڭ باعاسى وسىدان سوڭ وزگەرەتىن بولسا، تاسىمالعا سۇيەنەتىن ازىق-تۇلىكتىڭ باعاسى تۇراقتى بولمايتىنىن ايتتى. دوللار باعامىنىڭ شارىقتاۋى ەلدىڭ ەرتەڭىنە قالاي اسەر ەتەتىنىن سۇراعان Abai.kz تىلشىسىنە اتى-ءجونىن اتاماعان، سۋرەتكە تۇسۋدەن باس تارتقان قارتاڭ ايەل ساتۋشى: «ۇكىمەت پەن بانكتەردىڭ كۇشى جەتپەگەن، بيلىگى جۇرمەگەن اقشا بىزگە قايدان وپا قىلسىن، «كوپپەن كورگەن ۇلى توي». بۇل كۇن ەرتە مە، كەش پە كەلەتىن كۇن ەدى. اقىرى كەلدى. ەل تىنىش بولسىن! بۇل توسىن كەلدى، زاردابى اۋىر بولاتىن شىعار» دەپ جاۋاپ بەردى.

بۇل داعدارىستىڭ وزگەشە ەكەنىن بۇگىن ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا ۇلتتىق ەكونوميكا ءمينيسترى ەربولات دوساەۆ تا ايتتى.  «جالپى 7 ايدا ەكسپورت 44 پايىزعا، ال يمپورت كولەمى 20 پايىزعا جۋىق تومەندەدى. بۇنىڭ بارلىعى ماكروەكونوميكالىق العىشارتتار بولىپ تابىلادى جانە بۇگىندەگى داعدارىستىڭ بارلىق ۇدەرىستەرى 1997-1999 جىلدار مەن 2007-2009 جىلدارداعى داعدارىستاردان تۇبەگەيلى وزگەشەلىگى بار. داعدارىس بارلىق سالالاردى قامتىدى جانە وسى ۇدەرىس ەكىنشى جىلعا جالعاسىپ كەلەدى»، – دەدى دوساەۆ.

ال، باس بانكير كەلىمبەتوۆ: «يرانعا سانكتسيالار الىنىپ، ولار مۇناي نارىعىنا كىرسە، "مۇنايدىڭ باعاسى 20 دوللارعا دەيىن ءتۇسىپ كەتەدى" دەگەن بولجام بار» دەدى بۇگىنگى سوزىندە. ول سونداي-اق، كەشەگى كۇندە اقشا باعامىن ويناتقانداردى جازالايتىنىن دا ايتتى. الايدا، ءماسىموۆ "ەندى ۇلتتىق بانك اقشا باعامىنا ارالاسپايدى" دەدى. ول سونىمەن قاتار، ۇكىمەتتىڭ اقپاراتتىق ساياساتىنا وزگەرتۋ ەنگىزىلەتىنىن دە جەتكىزدى. ەندىگى كەزەكتە  تەڭگەنىڭ بۇرىنعى باعاعا كەلمەيتىنى اپ-انىق دۇنيە. ء بىر اقيقاتى – ەلدىڭ ەرتەڭى وسى ۇكىمەتتىڭ قالاي ءىس قىلاتىنىنا تىكەلەي بايلانىستى بولىپ وتىر. دۇرىسى وسى ۇكىمەتتىڭ حالىقتىڭ بايلىعىن، قورداعى اقشانى قالاي پايدالاناتىنىندا بولىپ تۇر. قىمباتشىلىق كەلەتىنىن ءبارى دە ءبىلىپ وتىر. ازىرگە ىشتەن تىنعان حالىق پەن قۇنى تۇسكەن تەڭگەنى باستان سيپاي قوياتىن باسقا قۇدىرەت جوق ەكەنى دە ءبىر كۇننىڭ ىشىندە ءبىلىنىپ ۇلگەردى.

Abai.kz