ەكسپو-نىڭ ەكس-توراعاسى تالعات ەرمەگياەۆتىڭ تۋعان تۋىستارى دا قۇقىق قورعاۋ ورگاندارى تاراپىنان قىسىم كوردىك دەپ شاعىمدانىپ وتىر. ايتۋلارىنشا، ءتىپتى اۋىلداعى ۇيلەرىنە دەيىن تىكۇشاقپەن اڭدىپ، فوتوعا ءتۇسىرىپ، شەنەۋنىكتىڭ وزىنەن كىشى ءىنىسىن ءۇش كۇن تەرگەۋگە العان.

بىرىنەن سوڭ ءبىرى بولىپ جاتقان بۇنداي جاعدايدان سوڭ، كۇندىز كۇلكىدەن، تۇندە ۇيقىدان ايىرىلدىق دەيدى ولار.

تالعات ەرمەگياەۆتى 1 ايلىعىنان باستاپ باعىپ العام، سوندىقتان مەن ونىڭ اكەسىمىن دەگەن امەت ەرمەگياەۆ اقساقال ۇلى كۇدىككە ىلىككەلى وزدەرىنەن مازا كەتكەنىن ايتادى. ايتۋىنشا، سوڭعى كۇندەرى الماتى وبلىسى رايىمبەك اۋدانىنداعى ۇيلەرىن تىكۇشاق اسپاننان تورۋىلدايتىن بولعان.

تالعات ەرمەگياەۆتىڭ اكەسى: “ويىمدا ەشتەڭە جوق، ۇيدە وتىر ەدىم بالالارىم شۋلاپ ۇيگە جۇگىرىپ كەلدى. ۆەرتولەت ءۇيدىڭ توبەسىندە ءبىزدى سۋرەتكە ءتۇسىردى دەپ. دالاعا شىقسام، ۇزىن كابەلمەنەن فوتواپپاراتىن ءتۇسىرىپ، ءۇيدىڭ توبەسىندە”، – دەيدى امەت ەرمەگياەۆ.

تەرگەۋ ءىسىنىڭ مۇنداي ەلەمەنتتەرىنەن تىكسىنىپ قالعان ەرمەگياەۆتىڭ تۋىستارى وزدەرىنە قاتىستى زاڭ وكىلدەرى تاراپىنان باقىلاۋدىڭ كۇشەيگەنىن ايتادى.

تەگىنە قاراپ تەرگەۋگە جاپپاي شاقىرتىلۋدا دەيدى. كەيبىرىن، ءتىپتى، ەشقانداي ەسكەرتۋسىز جۇمىس ورىنان دا الىپ كەتكەن ەكەن.

“تالعاتتان كەيىن باقىتجان دەگەن بالام بار الماتىدا. قاراپايىم جۇمىسكەر. سونى جۇمىستا وتىرعان جەرىنەن استاناعا الىپ كەتىپتى. كەلىنىم كەلدى ۇيگە جىلاپ. اتا، باقىتجاندى استاناعا الىپ كەتتى دەپ. مىناۋ نە دەگەن سۇمدىق!”، – دەپ ناليدى ەكس-شەنەۋنىكتىڭ اكەسى.

كۇڭىرەنگەن اكەنىڭ سوزىنشە، تەرگەۋشىلەر وزگە تۋىستاردى دا شەتىنەن جاۋاپ الۋ ماقساتىندا سۇراققا الىپ جاتىر ەكەن. ال ەلىمىزدەگى بىلىكتى زاڭگەرلەردىڭ ءبىرى تەرگەۋ بارىسىندا كۇدىكتىنىڭ تۋىستارىنا قىسىم جاساۋ قىلمىستىق پروتسەسسۋالدىق كودەكستە كورسەتىلمەگەن دەيدى.

ءتىپتى، كۇدىكتىنىڭ تۋىستارى تەرگەۋ بارىسىندا ەشقانداي جاۋاپ بەرمەۋگە دە قۇقىلى ەكەن.

زاڭگەر جانگەلدى سۇلەيمەنوۆتىڭ  ايتۋىنشا، “تۋىستاردىڭ كەرەمەت قۇقىعى بار. تەرگەۋ بارىسىندا تەرگەۋشى كۋاگەر رەتىندە سۇرالعان كۇدىكتىنىڭ تۋىستارىنا مۇنى ەسكەرتۋ كەرەك. ال تۋىستارعا قىسىم كورسەتۋ زاڭسىز. ولارعا سىرتتاي باقىلاۋ ورناتۋ بەلگىلى ءبىر زاڭ شەڭبەرىندە عانا جۇزەگە اسۋ كەرەك. وعان ارنايى رۇقسات بولۋى مىندەتتى” ەكەن.

ايتا كەتۋ كەرەك، تالعات ەرمەگياەۆ ەكسپو-عا بولىنگەن 4 ميلليارد 200 ميلليون تەڭگەنى تالان-تاراجعا سالدى دەگەن كۇدىكپەن قازىر ءۇي قاماۋىندا وتىر. تەرگەۋ بارىسىندا ونىڭ قامالۋ مەرزىمىن ارنايى ورگاندار وسىمەن ءۇشىنشى رەت سوزىپ، 12 قازانعا دەيىن ۇزارتقان.

تۇپنۇسقاداعى تاقىرىپ: ەرمەگياەۆتىڭ تۋىستارى ۇيلەرىن تىكۇشاقپەن تورۋىلداپ جۇرگەنىن مالىمدەدى.

31 ارنا