جامبىل وبلىسىنىڭ 75 جىلدىعىنا ارنالعان

وبلىستىق «تەاتر kz» فەستيۆالى وتۋدە

اۋداندارداعى تەاتر ونەرى قانداي حالدە؟ دالىرەك ايتساق، حالىق تەاترلارىنىڭ  حال-احۋالى، جالپى جاعدايى قالاي؟ وسى ساۋالدارىمىزدىڭ جاۋابىن كەشەدەن بەرى جامبىل وبلىسىنىڭ توعىز اۋدانىنان كەلگەن ونەر ۇجىمدارى ءوز قال-قادىرلەرىنشە تارقاتۋعا تىرىسىپ جاتىر. جامبىل وبلىسىنىڭ 75 جىلدىعىنا وراي وتكىزىلىپ وتىرعان ونەر دوداسىنىڭ وتۋىنە وبلىستىق مادەنيەت، مۇراعاتتار جانە قۇجاتتاما باسقارماسى مەن حالىق شىعارماشىلىق ورتالىعى اتسالىسىپ وتىر.

نەگىزىنەن ۋاقىت تالابىنا ساي ەلەۋلى وقيعالارعا قۇرىلعان شىعارمالاردى ساحنالاۋدى ماقسات ەتكەن فەستيۆال حالىق تەاترلاردىڭ ءبىر-بىرلەرىمەن تاجىريبە الماسۋلارىنا مۇمكىندىك بەرمەك. ۇيىمداستىرۋشىلاردىڭ ايتۋىنشا، فەستيۆالگە بارلىق اۋداندار بەلسەندى تۇردە اتسالىسۋدا. وبلىس اۋداندارىنان جانە تاراز قالاسىنان قاتىسىپ وتىرعان 12 ۇجىم ەلىمىزگە ەسىمدەرى تانىس، سونداي-اق، جەرگىلىكتى دراماتۋرگتەردىڭ دە شىعارمالارىن ساحنالاماق. ولاردىڭ اراسىندا دۋلات يسابەكوۆتىڭ «اپكە»، باققوجا مۇقايدىڭ «زاماناقىر»، ءسۇلتانالى بالعاباەۆتىڭ «قىز جيىرماعا تولعاندا»، ماار بادجيەۆتىڭ «قۇدالار» پەسالارى دا بار.

فەستيۆالدىڭ العاشقى كۇنى ساحناعا «مەركى» حالىق تەاترى ءالديحان قالدىباەۆتىڭ ء«سالىم-ءساليما» دراماسىمەن شىقسا، جۋالى اۋداندىق «مىڭبۇلاق» حالىق تەاترىنىڭ ۇجىمى جولتاي ءالماشۇلىنىڭ ء«تىرى جان» پەساسىن ساحنالادى. قۋانىشتىسى سول، بۇل فەستيۆال وڭىردە تەاتر ونەرىنىڭ العا باسقانىن اڭعارتتى. تەاتر ارتىستەرىنىڭ كيىمى، ءجۇرىس-تۇرىسى، ساحنادا وزدەرىن ەركىن ۇستاۋى، رولدەردى سومداۋداعى شەبەرلىگى كوپشىلىكتىڭ ريزاشىلىعىن تۋعىزدى. بۇل تۋرالى بىزگە ونەر ۇجىمدارىنىڭ شىعارماشىلىق دەڭگەيلەرىن انىقتاپ، شەبەرلىگىن ساراپتاۋشى ماماننىڭ ءبىرى، وبلىستىق قازاق دراما تەاترىنىڭ كوركەمدىك جەتەكشىسى قۋاندىق قاسىموۆ ءوز پىكىرىن بىلدىرگەن ەدى. «بۇل ەكى قويىلىمنان قازىرگى ۋاقىتتىڭ بولمىسىنداعى دۇنيەلەردى كوردىك. دەگەنمەن دەكوراتسيانىڭ جۇتاڭدىعى كوزگە كورىنىپ تۇرادى. ەندى بۇل ماسەلە اۋدانداعى حالىق تەاترلارىنا ورتاق ماسەلە بولىپ وتىر عوي. ولاردا سۋرەتشى جوق، ماماندار جەتىسپەيدى. دەگەنمەن بۇل باعىتتاعى جۇمىستى جەتىلدىرۋگە، ءارى قاراي جۇمىس جاساۋعا بولادى. مەنى جاس مامانداردىڭ اۋداندارعا بارىپ جۇمىس جاساي باستاعاندىعى قۋانتادى. بۇگىن ءبىز سونىڭ ناتيجەسىن كورىپ تۇرمىز. جاستار جاعى كەرەمەت ويناپ شىقتى. اسىرەسە، قوعامنىڭ اششى شىندىعىن كورسەتكەن ء«تىرى جان» قويىلىمىنان اكتەرلەردىڭ بويىنداعى كاسىبي شەبەرلىكتى دە كورىپ ۇلگەردىك» دەيدى ول.

تەاتر سۇيەر قاۋىمدى قۋانتقان ونەر دوداسى ءۇش كۇنگە سوزىلماق.

اباي-اقپارات