مەن وسىلاي ويلايتىن بولدىم. كەيىنگى كەزدەرى. ويتكەنى ۇكىمەتىمىز ۇلكەن-ۇلكەن ءۇمىت ارتقان، حالقىمىز كادىمگىدەي قوڭىرايىپ اۋزىنا قاراعان  «جاپ-جاقسى» ادامدارىمىز «ەكى جەپ بيگە شىعامىن» دەپ، اياق استىنان سوتتالىپ كەتەتىن بولدى. ءتىپتى كەيدە ويلايمىن، قايبىر جىلدارى پرەزيدەنتىمىز «ليۋبويىڭدى» قولىڭنان جەتەكتەپ وتىرىپ، سوتقا اپارا الامىن» دەپ بەكەرگە ايتپاعان ەكەن عوي دەپ. بەكەرگە ايتپاعان. مەن قاراپايىم حالىقتىڭ ءبىرىمىن، سوندىقتان وسى قاراپايىم حالىقتىڭ ءبىرى رەتىندە «مەملەكەتتىك قىزمەتتەگى مافياعا» مۇلدە سەنۋدەن قالدىم. ەل ماقتاعان، «قىز جاقتاعان» جاپ-جاس مينيسترلەرىمىز بەن اگەنتتىك باسشىلارى شەتتەرىنەن «بەز وچەرەد» سوتتالىپ كەتىپ جاتىر. ال ەندى سوتتالىپ جاتقان ۇلكەندى-كىشىلى، ۇزىندى-قىسقالى اكىم-قارالاردىڭ ەسەبىندە ءتىپتى دە سان جوق. حراپۋنوۆتىڭ ءتۇرى اناۋ – مىرس-مىرس كۇلىپ شۆەيتساريادا جاتىر. ەرلان ارىن دەگەن ۇلكەن عالىم، “سۆەجي» اكىمىمىزدىڭ جاعدايى دا جاقسى ەمەس سياقتى: تەمىر توردىڭ ارعى جاعىندا جانتالاسىپ جاتىر اق تەر، كوك تەر بولىپ – «رەپۋتاتسيامنىڭ تازالىعىن دالەلدەيمىن» دەپ.

ءجا، ءبىزدىڭ ايتايىق دەگەنىمىز بۇل ەمەس، ءبىزدىڭ ايتايىق دەگەنىمىز مىناۋ: اكىمدەرىمىز سوتتالىپ جاتىر. اقتالىپ جاتقان ەشقايسىسىن كورمەدىك. ماسەلەن، ەلىمىزدەگى ەڭ ۇلكەن يندۋستريالدى قالا بولىپ سانالاتىن، كەنشى جازعانداردىڭ استاناسى دەپ اتالىپ كەتكەن قاراعاندى وبلىسىنىڭ بۇرىنعى اكىمى باۋىرجان ابدىشەۆ دەگەن ازامات تا سوتتالايىن دەپ جاتىر. اراشا تۇسەيىك دەپ جاتقان جوقپىز، ءبىزدىڭ  زايىرلى سوتىمىز بىردەڭە بىلەتىن بولسا، يا سوتتايدى، يا اقتايدى. بۇعان ءبىزدىڭ داۋىمىز جوق. ايتايىق دەگەنىمىز، وسى ازامات ۇستىمىزدەگى جىلدىڭ باسىندا ايتىپ ەدى – ەلباسىنىڭ باستاماسىنا سايكەس مەملەكەتتىك باعدارلاما بويىنشا جاس مامان-وتباسىلارعا جىل اياعىندا جاپ-جاڭ ءۇي بەرىلەدى دەپ. ەل سوعان سەنىپ ەدى، ويتكەنى باۋىرجان اكىم، جاسىراتىنى جوق، قاتتى جۇمىس ىستەپ جاتىر ەدى. اللا بولماسا، اكىم اتاۋلىنىڭ  نازارىنان تىس قالعان وسىناۋ كەنشىلەر استاناسى ابدىشەۆ كەلگەن ءبىر جىلدىڭ اينالاسىندا بىردەن گۇلدەنىپ سالا بەردى. بۇل سوزىمە ەل كۋا. ال ەندى اقتوبەدەن «ابايسىزدا» كەلىپ قالعان نۇرمۇحامبەت اكىم باۋىرجاننىڭ باستاعانىن اياقتاپ، كوزدەرى جاۋتەڭدەگەن جاس وتباسىلارعا جاڭادان سالىنىپ جاتقان كوپ قاباتتى ۇيلەردەن باسپانا بەرە الا ما؟ كۇمانىمىز بار، ويتكەنى جەرگىلىكتى جاعداياتتى جاقسى بىلمەيتىن اقتوبەلىك اكىم ءالى كۇنگە دەيىن «وبلىسپەن تانىسۋ» ماسەلەسىمەن اۋرە بولىپ ءجۇر. جاستارعا تيەسىلى دەگەن كوپ قاباتتى ەكى ءۇيدىڭ ءبىرىنىڭ قۇرىلىسى توقتاپ قالعان. ءسويتىپ، «قولجەتىمدى تۇرعىن-ءۇي» باعدارلاماسى بويىنشا بيىلعى جىلى بەرىلۋگە ءتيىستى بىرنەشە تۇرعىن ءۇي قۇرىلىسى دا «اقساق قوي تۇستەن كەيىن ماڭىرايدىنىڭ» كەبىن كيىپ، جەتىمسىرەپ تۇر. ۇزىن ءسوزدىڭ قىسقاسى، «حالىق ءۇشىن كادىمگىدەي جۇمىس ىستەپ جاتقان» اكىمدەردى پىتىرلاتىپ سوتتاي بەرمەي، ولارعا باستاعان ىستەرىن اياقتاۋعا مۇمكىندىك بەرۋ قاجەت. حراپۋنوۆ سياقتى شەت ەلگە قاشىپ كەتپەۋلەرى ءۇشىن «سپەتسسلۋجبانىڭ يتتەن دە كوپ» ادامدارىن سوڭدارىنا سالىپ، اڭدىتىپ قويۋ كەرەك، ءجۇدا بولماي بارا جاتسا. ال ولاردى سوتتاۋعا «قارپول (قارجى پولياتسياسى), جولپول (جول پوليتسياسى), پاتپول (پاترۋلدەر پوليتسياسى) سياقتى وڭكەي «پولدار» مەن كنب-سنب دەگەندەرىمىز ارقاشاندا ۇلگەرەدى. «ەسلي نادو بۋدەت» دەپ ورىستار ايتپاقشى.

مارات ماداليموۆ

Abai.kz