2016 جىلى قازاقستاندا مەكتەپ ءبىتىرۋشى تۇلەكتەر مەن ابيتۋريەتتەردىڭ ءبىلىمىن باعالاۋدىڭ جاڭا جۇيەسى ەنگىزىلەدى دەپ مالىمدەدى ءبىلىم جانە عىلىم ءمينيسترى اسلان ءسارىنجىپوۆ. ونىڭ ايتۋىنشا، قازىرگى كەزدە مينيسترلىك ورتا ءبىلىم مازمۇنىن جاڭارتۋمەن قاتار ءبىلىمدى باعالاۋدىڭ جاڭا جۇيەسىن ازىرلەۋ باعىتىندا جۇمىس جۇرگىزۋدە. – بۇل جۇيە تەك قورىتىندى ەمتيحانداردى باعالاۋمەن شەكتەلمەي، جوعارى وقۋ ورىندارىنا ءتۇسۋ ماسەلەسىن دە قامتيدى. شىنىندا دا قازىر جوعارى وقۋ ورىندارىنىڭ وزدەرىنە ابيتۋريەنتتەردىڭ ءبىلىم دەڭگەيىنىڭ ءبىر بولىگىن انىقتاۋعا مۇمكىندىك بەرۋ ماسەلەسى قاراستىرىلىپ جاتىر،- دەدى مينيستر.

ۆەدومستۆو باسشىسى شىعارماشىلىق ەمتيحان تاپسىرۋ ۇلگىسىندەگى مۇنداي تاجىريبەنىڭ الەمدەگى جوعارى وقۋ ورىندارىندا بۇرىننان قولدانىلىپ كەلە جاتقانىن ايتتى. اسىرەسە، مۇنداي ءتاسىل مەديتسينالىق وقۋ ورىندارىنا قاجەت ەكەنى ءسوزسىز. سوندىقتان، مينيسترلىك بۇل ماسەلەنى حالىقارالىق ساراپشىلارمەن بىرلەسە وتىرىپ، تالقىعا سالماق. جالپى العاندا، جاڭا ستاندارتتاردى ماقۇلداۋ مەن ەنگىزۋ شارالارى 2015 جىلى، ال ءبىلىمدى باعالاۋدىڭ جاڭا جۇيەسى 2016 جىلى تولىعىمەن ەنگىزىلەدى.

مەملەكەت باسشىسى نۇرسۇلتان نازارباەۆ ءبىلىم بەرۋ سالاسىنىڭ ەلىمىزدى يننوۆاتسيالىق تۇرعىدا دامىتۋدا ۇلكەن ءرول اتقاراتىنىن ءجيى-ءجيى ايتىپ كەلەدى. ء«بىزدىڭ جاستارىمىزدىڭ ورتا، تەحنيكالىق-وندىرىستىك، جوعارى ءبىلىم الۋىنىڭ اسا ۇلكەن ماڭىزى بار. ەلىمىزدە جۇمىس ىستەيتىن كومپانيالار مەملەكەتتىڭ كومەگىمەن جاس مامانداردى دايارلاۋ ماسەلەسىن ءوز جاۋاپكەرشىلىگىنە الۋ ءۇشىن دۋالدى ءبىلىم بەرۋ جۇيەسىن دامىتقانىمىز دۇرىس. ول ءۇشىن ەۋروپا ەلدەرىنىڭ ۇزدىك تاجىريبەسىن تاعى ءبىر رەت قاراپ شىعۋ قاجەت»،- دەپ قاداپ ايتتى ن. نازارباەۆ ءبىلىم جانە عىلىم ءمينيسترىن اقوردادا قابىلداعان كەزىندە.

 جاقىندا اتىراۋدا وتكەن دۋالدىق جۇيەنى ەنگىزۋ ماسەلەلەرىنە ارنالعان رەسپۋبليكالىق ماجىلىستە اسلان ءسارىنجىپوۆ نەمىس دۋالدىق جۇيەسىنىڭ ارتىقشىلىقتارىنا توقتالدى. ايتپاقشى، ءبىزدىڭ ەلىمىزدە وسى جۇيەنى ەنگىزۋگە ەلباسى ن. نازارباەۆتىڭ 2012 جىلعى اقپانداعى گفر-عا ساپارى اياسىندا كاسىبي-تەحنيكالىق مامانداردى دايارلاۋدا نەمىس مودەلىن پايدالانۋ تۋرالى مالىمدەمەسى نەگىز بولعان-دى. ال، وتكەن جىلدىڭ ءساۋىر ايىندا «قازاقستانداعى دۋالدىق وقىتۋدى ەنگىزۋ» اتتى پيلوتتىق جوبانى جۇزەگە اسىراتىن كەلىسىمگە قول قويىلدى. – بۇل جۇيە كوپتەگەن الدىڭعى قاتارلى ەلدەردە قولدانىلىپ، ءوزىنىڭ ومىرشەڭدىگىن دالەلدەدى. ياعني، ول 2+2 مودەلىن قولدانۋ: ەكى جىل تەوريانى وقىتۋ جانە ەكى جىل كاسىپورىندا تاجىريبەدەن ءوتۋ. گەرمانيادا مامان دايارلاۋدىڭ 70 پايىزىن – جەكەمەنشىك سەكتور، 30 پايىزىن – مەملەكەت موينىنا العان. ال، بىزدە كەرىسىنشە عوي. سول گەرمانيادا ەگەر كومپانيالار ءبىلىم بەرۋ سالاسىنا ينۆەستيتسيا سالماسا، ونى سالىق تۇرىندە تولەيدى،- دەدى ا. ءسارىنجىپوۆ.

ارينە، الەمدەگى ەڭ ۇزدىك بولىپ سانالاتىن نەمىستەردىڭ بۇل سالاداعى تاجىريبەسى بىزگە قاجەت-اق. مىسالى، وندا مەكتەپ بىتىرگەن تۇلەكتەردىڭ جارتىسىنان كوبى دۋالدىق جۇيەنىڭ اياسىندا مەملەكەت رەسمي تۇردە مويىنداعان 350 ماماندىقتىڭ ءبىرىن الىپ شىعادى. ماماندىق الۋ باسقا ەلدەردەگى كادىمگى مەكتەپتەگى كاسىبي وقۋدان بولەك. اپتانىڭ ءتورت كۇنىندە كاسىپورىندا پراكتيكالىق ءدارىس جۇرگىزىلەدى، ال تەوريالىق ءبىلىم اپتاسىنا ەكى رەت كاسىبي مەكتەپتە وقىتىلادى. وقۋ مەرزىمى – 2-دەن 3,5 جىلعا دەيىن. اتاپ ايتارلىعى، كاسىبي-تەحنيكالىق وقۋدىڭ اقىسى ءدارىس تىڭداۋشىلارعا اقشالاي سىياقى تولەيتىن كاسىپورىندار مەن مەملەكەتتىڭ موينىندا. قازىرگى كەزدە گەرمانيادا بۇل باعىتتاعى جۇمىسپەن 500 مىڭعا جۋىق كاسىپورىندار، مەملەكەتتىك قىزمەت جۇيەسى جانە ەرىكتى ماماندىقتار وكىلدەرى اينالىسادى. وقۋشىلارعا قاجەتتى ورىنداردىڭ 80 پايىزىن شاعىن جانە ورتا دارەجەدەگى فيرمالار ۇسىنادى. سايىپ كەلگەندە، دۋالدىق جۇيەنىڭ ارقاسىندا وسى ەلدەگى 15 پەن 19 جاس ارالىعىنداعى جاستاردىڭ ماماندىعى جوقتارىنىڭ ۇلەسى بار-جوعى 4,2 پايىزدى قۇرايدى. ياعني، قازاقستاننىڭ وسىنداي ۇزدىك حالىقارالىق تاجىريبەنى وزىنە ۇلگى ەتۋىنىڭ ءوزى ءبىلىم بەرۋ سالاسىن جەتىلدىرۋدىڭ جاڭا كەزەڭىنە وتكەنىن كورسەتەدى.

ءامىرلان ءالىمجان

 Abai.kz