بۇگىن وبلىس اكىمى اماندىق باتالوۆ الماتىداعى «قازاقستان» قوناق ۇيىندە جەتىسۋ وڭىرىندەگى ارداگەرلەرمەن - مەملەكەت جانە قوعام قايراتكەرلەرىمەن، كەزىندە پارتيا ورگاندارىندا، باسشىلىق قىزمەتتەردە بولعان ازاماتتارمەن، سوعىس جانە ەڭبەك ارداگەرلەرىمەن كەزدەستى.

بۇل تۋرالى وبلىس باسشىسىنىڭ ءباسپاسوز قىزمەتىنەن حابارلادى.

باسقوسۋدا وبلىس اكىمى پرەزيدەنتتىڭ «نۇرلى جول - بولاشاققا باستار جول» اتتى جولداۋىنداعى تاپسىرمالاردى ورىنداۋدا العا قويعان مىندەتتەر تۋرالى باياندادى.

سونىمەن قاتار ءوڭىردى دامىتۋداعى جوسپارلارىن دا ايتىپ ءوتتى. جانە 2015 جىلى اتاپ وتىلەتىن مەرەيلى داتالار، سونىڭ ىشىندە، اسىرەسە، ۇلى جەڭىستىڭ 70 جىلدىعىن مەرەكەلەۋگە بايلانىستى وي ءبولىستى. 

- مەرەيتويلاردى لايىقتى دەڭگەيدە وتكىزۋ ءۇشىن جان-جاقتى ۇيىمداستىرۋ جۇمىستارى جاسالۋدا. وعان سىزدەر دە اتسالىسادى دەگەن ويدامىن. حالقىمىزدا «ەلگە جاساعان جاقسىلىق ەلەنبەي قالمايدى» دەگەن ءسوز بار. بۇگىنگى كەزدەسۋدى سىزدەرگە كورسەتىلگەن قۇرمەت پەن ءىلتيپاتىمىز دەپ قابىلداڭىزدار. قاي كەزدە دە اعا ۇرپاقتى ارداقتاپ، جاقسى ونەگەسىن جالعاستىرۋ - ءبىزدىڭ پارىزىمىز، - دەي كەلە جاڭا 2015 جىلمەن قۇتتىقتاپ، ىزگى تىلەگىن ءبىلدىردى. 

ءوز كەزەگىندە ارداگەرلەر دە پىكىرلەرىن ايتىپ، ۇسىنىس-تىلەكتەرىن جەتكىزدى.