ۋكراينا داعدارىسى باستالعالى بەرى العاش رەت قىتاي كيەۆتى ۋكراينانىڭ وڭتۇستىك-شىعىسىنداعى وپەراتسيانى توقتاتۋعا تىكەلەي شاقىردى. "PolitOnline" پورتالىنىڭ حابارلاۋىنا قاراعاندا، قىتايدىڭ حالىقتىق ازات ەتۋ اسكەرى باس شتابى باستىعىنىڭ ورىنباسارى، گەنەرال-لەيتەنانت ۆان گۋانچجۋن ءوز مالىمدەمەسىندە ۋكراين بيلىگىنەن "بەيبىت حالىققا قارسى كۇشتەۋ وپەراتسياسىن" دەرەۋ توقتاتۋدى تالاپ ەتكەن. بۇنداي قاتاڭ مالىمدەمەنى ول ازياداعى قاۋىپسىزدىك جونىندەگى  XIII حالىقارالىق كونفەرەنتسيا اياسىندا رەسەي قورعانىس ءمينيسترىنىڭ ورىنباسارى اناتولي انتونوۆپەن كەزدەسۋ بارىسىندا جاساعان. بۇل تۋرالى Tengrinews.kz جازدى.

ايتا كەتەتىن بولساق، قىتاي بۇدان بۇرىن دا ۋكراينانىڭ جاڭا بيلىگىن "ەلدىڭ شىعىسىندا ازاماتتىق سوعىستى تۇتاندىرۋدا" دەپ ايىپتاپ، ال اقش پەن ەۋروپانى "ۋكرايندىقتارعا ىقپال ەتتى" دەپ سوككەن. سونداي-اق رەسەي مەن قىتاي العاش رەت بىرىككەن عالامدىق اسكەري وقۋ-جاتتىعۋلاردى باستادى. وعان اقش-تىڭ اسكەري ساراپشىلارى "امەريكاعا قارسى ەكى يادرولىق دەرجاۆانىڭ اسكەري بىرىگۋى قاۋىپتى" دەپ باعا بەرگەن.

سونداي-اق، قىتاي اسكەري لاۋازىمدىلارىنان  تىس،  ۋكراينا مەن باتىستىڭ اتىنا فرانتسيانىڭ "ۇلتتىق فرونتىنىڭ" باسشىسى ماري لە پەن قاتتى سىن تاققان. ونىڭ پىكىرىنشە، ۋكرايناداعى داعدارىس پەن قانتوگىستىڭ ايىبى ەۋروپا مەن اقش-تىڭ موينىندا. "امەريكالىق نۇسقاۋشى سيپاتىنداعى ەو رەسەي ءۇشىن ءتيىمسىز" - دەگەن ول رەسەي پرەزيدەنتى ۆلاديمير ءپۋتيندى ماقتان تۇتاتىندىعىن جەتكىزگەن.

اباي-اقپارات