كولىك پەن ەلەكتر ستانتسياسىن اۋا ارقىلى قالاي جۇمىس جاساتۋدىڭ ءادىسىن اقتوبەلىك زەينەتكەر بىلەدى. ءوزىنىڭ اۆتورلىق يدەيالارىنا 27 جىل ىشىندە 4 پاتەنت العان. ەندى ونەرتاپقىش تۋىندىسىن ەحرو-2017 كورمەسىنە ۇسىنۋدى جوسپارلاپ وتىر. باقبەرگەن تاحانوۆ ۇزاق جىلدار قۇرىلىس سالاسىندا ەڭبەك ەتكەن. تىڭ جاڭالىعىن اشۋعا 1986 جىلى كولىككە قاجەت جانارماي تاپپاي قينالعان كەزى تۇرتكى بولسا كەرەك.  

باقبەرگەن تاحانوۆ، ونەرتاپقىش:

- بىردە جۇمىستارىممەن ماشينا سۇراپ بازا باردىم. شوپىر جانارماي جوق، اۋامەن جۇرمەيمىن عوي دەپ ايتتى. ىزدەنىسكە تولى كوپ جىل تەككە كەتپەدى.

ول اۋانىڭ قىسىمىمەن جۇرەتىن قوزعالتقىش ويلاپ تاۋىپتى. ويىنداعىسىن ىسكە اسىرۋعا قاراجاتى بولماعاندىقتان، تالاي جاۋاپتى مەكەمەنىڭ ەسىگىن توزدىرعانعا ۇقسايدى. بىلتىر 4 زەرتتەۋ ەڭبەگىنە پاتەنت العان:جوعارعى قىسىمدى اۋامەن جۇمىس ىستەيتىن ەلەكتر ستانساسى، كولىك قۇرالىنا قاجەت جاساندى تارتىلىس قوندىرعىسى جانە اۆتونومدى  جۇيەگە كەرەك جاساندى موتور. اۆتوردىڭ ايتۋىنشا، جوبالار كوپ قارجىنى قاجەت ەتپەيدى. ماسەلەن، شاعىن ەلەكترستانسانىڭ جۇمىس ءتاسىلى وتە قاراپايىم.

باقبەرگەن تاحانوۆ، ونەرتاپقىش: - ءۇش 100 كۋبومەترلىك تسيستەرنانى كومپرەسسوردىڭ كۇشىمەن ىشىنە تولتىرامىز. اۋانى، قاراپايىم اۋانى، قاتتى قىسىممەن. كومپرەسسور جاساندى گراۆيتاتسيالىق قوندىرعىمەن جۇمىس ىستەيدى.

وسىنداي 20 قۇرىلعى بۇكىل قازاقستانعا جەتەدى. زەينەتكەر ءوز ەڭبەكتەرى جايىندا قازاقستانعا عانا ەمەس، اقش-قا دا مالىمدەپ حات جازىپتى. ەندىگى ماقساتى –ەحرو-2017 كورمەسىنە قاتىسۋ. ىزدەنىسىن توقتاتپاعان اقساقال ءوزى اشقان جاڭالىقتىڭ كادەگە جارارىنا سەنىمدى.

www.24.kz