2014 جىلعى مامىرداعى ءبىر قىزمەتكەردىڭ ورتاشا ايلىق اتاۋلى جالاقىسى 120479 تەڭگەنى قۇرادى. اتاۋلى جالاقى يندەكسى 2013 جىلعى مامىرعا 113,4%، ال ناقتى جالاقى يندەكسى 106,0% قۇرادى. بۇل تۋرالى قر ستاتيستيكا اگەنتتىگىنىڭ حابارلاماسىنا سىلتەمە جاساپ قازاقپارات جازدى.

«سالالىق قۇرىلىمدا ەڭ ۇلكەن جالاقى كەن ءوندىرۋ ونەركاسىبى مەن كارەرلەردى قازۋدا - 249,4 مىڭ تەڭگە (ورتاشا رەسپۋبليكالىق دەڭگەيدەن 2,1 ەسەگە استى), كاسىبي، عىلىمي جانە تەحنيكالىق قىزمەتتە - 234,1 مىڭ تەڭگە (1,9 ەسەگە استى), قارجى جانە ساقتاندىرۋ قىزمەتىندە - 205,5 مىڭ تەڭگە (1,7 ەسەگە استى) بەلگىلەندى. ەڭ تومەنگى جالاقى اۋىل، ورمان جانە بالىق شارۋاشىلىعى قىزمەتكەرلەرىندە بەلگىلەندى - 72,1 مىڭ تەڭگە، بۇل ەل بويىنشا ورتا كورسەتكىشتەن 40,2%-عا تومەن»، -دەلىنگەن حابارلامادا.

وڭىرلىك بولىنىستە ەڭ جوعارى جالاقى اتىراۋ وبلىسىندا بەلگىلەندى - 231,3 مىڭ تەڭگە، بۇل ورتاشا رەسپۋبليكالىق كورسەتكىشتەن شامامەن 1,9 ەسەگە اسادى. سولتۇستىك قازاقستان وبلىسىندا مۇنىڭ شاماسى 80,9 مىڭ تەڭگەنى قۇرادى، بۇل ەل بويىنشا ورتاشا دەڭگەيدەن 32,8%-عا تومەن.

اباي-اقپارات