كولىك جانە كوممۋنيكاتسيا مينيسترلىگى كولىك سالاسىنداعى زاڭنامانى جەتىلدىرۋ جونىندەگى جۇمىس توبىن قۇرۋعا باستاما جاساۋدا.

كولىك جانە كوممۋنيكاتسيا مينيسترلىگىندە قر تۋريستىك نارىعىندا چارتەرلىك تاسىمالدى دامىتۋ ماسەلەلەرى جونىندە كەڭەس ءوتتى. كەڭەستى قورىتىندىلاعان مينيستر جەڭىس قاسىمبەك ازاماتتىق اۆياتسيا كوميتەتىنە  كولىك سالاسىنداعى ءنورماتيۆتى-قۇقىقتىق اكتىلەردى جەتىلدىرۋ جونىندەگى جۇمىس توبىن قۇرۋعا تاپسىرما بەردى دەپ حابارلايدى http://mtc.gov.kz. سايتى.

قازىرگى كەزدە ازاماتتىق اۆياتسيا كوميتەتى مۇددەلى مەملەكەتتىك ورگانداردان، ۇلتتىق كاسىپكەرلەر پالاتاسىنان، تۋريستىك ۇيىمدار مەن اۆياكومپانيالاردان كوميسسياعا كىرەتىن كانديداتۋرالارىن كۇتۋدە.

جۇمىس توبىنىڭ نەگىزگى ماقساتى – تۋريستىك كومپانيالاردىڭ كليەنتى بولىپ تابىلاتىن قازاقستان ازاماتتارىن كەلەڭسىزدىككە ۇشىراتاتىن قيىن جاعدايلاردى بولدىرماۋ. تۋريستەردىڭ مۇددەلەرىن قورعاۋ ماقساتىندا جۇمىس توبى كولىك سالاسىنا، ونىڭ ىشىندە تاسىمالداۋشىلارعا قاتىستى زاڭناماعا وزگەرىستەر ەنگىزۋ جۇمىسىن جالعاستىرىپ، اتالعان سالانى جەتىلدىرۋ جونىندە ۇسىنىستار بەرەتىن بولادى.

«جۇمىس توبىن قۇرۋ تۋريستىك ۇيىمدار مەن تاسىمالداۋشىلار جۇمىسىنداعى كەزدەسەتىن سايكەسسىزدىكتەردى ايقىنداۋعا كومەكتەسەدى. كولىك جانە كوممۋنيكاتسيا مينيسترلىگى ءوز قۇزىرىندا حالىقتىڭ ءومىرى مەن دەنساۋلىعىنا قاتەر توندىرمەي قاۋىپسىز ۇشۋلاردى قامتاماسىز ەتۋ ءۇشىن مۇمكىندىگىنشە جاعداي جاساپ، ەرەكشە كوڭىل اۋدارىپ وتىر»، - دەدى ازاماتتىق اۆياتسيا كوميتەتىنىڭ توراعاسى بەكەن سەيداحمەتوۆ.

اباي-اقپارات