الماتىدا «دامۋ مۇمكىندىگى شەكتەۋلى بالالاردى كەشەندى ساۋىقتىرۋ بارىسىندا پسيحوموتوريكا ادىستەرىن قولدانۋ» اتتى ءۇش كۇندىك سەمينار ءوز جۇمىسىن باستادى. سەميناردى جۇرگىزۋگە   ادىسكەر رەتىندە وسى سالاداعى ەڭ بەلدى مامانداردىڭ ءبىرى، يتالياداعى پسيحولوگيا جانە پسيحوموتوريكا سالاسىنداعى زەرتتەۋ ورتالىعىنىڭ جەتەكشىسى فرانكو باسكايني شاقىرىلدى دەپ حابارلايدى «دارا» قورىنىڭ PR-مەنەدجەرى حاديشا سەرجانوۆا.

شارانى «دارا» قايىرىمدىلىق قورى مەن «كەڭەس»  مۇمكىندىگى شەكتەۋلى بالالاردى كەشەندى ساۋىقتىرۋ ورتالىعى ۇيىمداستىرۋدا. سەمينار  قازاقستاندا ينكليۋزيۆتى قوعام قالىپتاستىرۋ جوباسىنىڭ اياسىندا «سامۇرىق-قازىنا» ۇلتتىق ءال-اۋقات   قورى» اق-نىڭ قارجىلىق قولداۋىمەن وتكىزىلۋدە.

 سەمينار بارىسىندا ءتۇرلى ايماقتاردان كەلگەن 25 مامان دايىندىقتان وتەدى. ولار «كەڭەس» ساۋىقتىرۋ ورتالىعىندا بىرنەشە جىلدان بەرى  قولدانىلىپ كەلە جاتقان بىرەگەي اۆتورلىق ساۋىقتىرۋ باعدارلاماسىمەن تانىسادى. پسيحوموتوريكا بولىمشەسىندە ەمدەلىپ جاتقان بالالارمەن جۇمىس ىستەپ، تەوريالىق بىلىمدەرىن ءىس جۇزىندە بەكىتە الادى. دايىندىقتان وتكەن ماماندار بيىلدان باستاپ  قازاقستاندا ينكليۋزيۆتى قوعام قالىپتاستىرۋعا ارنالعان جوبا اياسىندا استانا، قاراعاندى، كوكشەتاۋ، اقتوبە قالالارىندا اشىلاتىن كوررەكتسيالىق كابينەتتەردە جۇمىسقا كىرىسەدى. بۇل كابينەتتەر جىل سايىن 1500-گە تارتا مۇمكىندىگى شەكتەۋلى بالالارعا قىزمەت كورسەتۋگە ەسەپتەلگەن. ماماندار جۇمىس بارىسىندا سەميناردا مەڭگەرگەن پسيحوموتوريكا ادىستەرىن كەڭىنەن قولدانباق.

پسيحوموتورلىق تاجىريبە جونىندەگى ماماندار لوپوپەد، پسيحولوگ، پسيحوتەراپەۆت،   فيزيوتەراپەۆت، دەنە شىنىقتىرۋ تاربيەشىسىنە ءتان بىلىكتەردى مەڭگەرۋى ءتيىس. اتالمىش عىلىم سالاسىنىڭ جەتىستىكتەرى  الەمنىڭ كوپتەگەن ەلدەرىندە اۋتيزم، ءتىلىنىڭ مۇكىسى بار نەمەسە پسيحيكالىق دامۋى تەجەلگەن بالالاردى ساۋىقتىرۋ ءادىسى رەتىندە كەڭ قولدانىس تاپقان. قازىرگى تاڭدا قازاقستاندا مۇمكىندىگى شەكتەۋلى بالالاردىڭ جالپى سانى 138 مىڭنان اسادى. ينكليۋزيۆتى قوعام قالىپتاستىرۋ جوباسىنىڭ ماقساتى  - دەنساۋلىعىندا مۇكىسى بار بالالاردىڭ ءوز قاتارلارىمەن بىرگە جالپى ورتا ءبىلىم بەرەتىن مەكتەپتەردە وقىپ، قوعامدا ورنىن تابۋىنا كومەكتەسۋ.

«دارا» جەكە قايىرىمدىلىق قورى بالالاردى ەمدەۋ ساۋىقتىرۋ مەكەمەلەرىنە، بالالار ۇيلەرىنە، مۇمكىندىگى شەكتەۋلى بالالارعا ارنالعان مەكتەپ ينتەرناتتارعا قولداۋ كورسەتۋگە باعىتتالعان جوبالارمەن اينالىسادى. ۇيىم ءبىرىنشى كەزەكتە جاقىندارىنىڭ قامقورلىعىنان ايرىلعان، مەملەكەتتىك مەكەمەلەر مەن باسقا قايىرىمدىلىق قورلارىنىڭ نازارىنان تىس قالعان بالالارعا قولداۋ كورسەتەدى. استانا، الماتى، بۋرابايدا  فيليالدارى بار. تولىق اقپاراتتى www.dara.kz سايتىنان الا الاسىزدار.

باستالۋى:7 تامىز 10-00

 بايلانىس: حاديشا سەرجانوۆا، «دارا» قورىنىڭ PR-مەنەدجەرى   87017554953;hadish@mail.ru

شارانىڭ وتكىزىلەتىن ورنى: «كەڭەس» كەشەندى ساۋىقتىرۋ ورتالىعى

الماتى قالاسى،  قۇرمانعازى كوشەسى، 166; جاروكوۆ جانە گاگارين كوشەلەرىنىڭ ورتا تۇسىندا

(قالاي  جەتۋ كەرەكتىگى  http://www.center-kenes.kz سايتىندا كورسەتىلگەن)

اباي-اقپارات