37 ۋكراينا ازاماتى قازاقستاننان بوسقىن مارتەبەسىن سۇرادى
ۋكراينانىڭ 37 ازاماتى قازاقستان بيلىگىنە بوسقىن مارتەبەسىن الۋعا ءوتىنىش ءبىلدىردى. بۇل تۋرالى Tengrinews.kz قر ىشكى ىستەر مينيسترلىگىنە سىلتەمە جاساپ حابارلادى.
"بۇگىندە الماتى، استانا قالالارى مەن وبلىستاردىڭ ىشكى ىستەر دەپارتامەنتتەرىنىڭ كوشى-قون پوليتسياسى باسقارمالارىنا بوسقىن مارتەبەسىن بەرۋدى سۇراپ، ۋكراينانىڭ 37 ازاماتى ءوتىنىش ءبىلدىردى", - دەلىنگەن حابارلامادا.
قازاقستان اۋماعىندا بارلىعى 589 بوسقىن نەمەسە 131 وتباسىعا قۇقىقتىق-الەۋمەتتىك كومەك كورسەتىلەدى، ولار قورعاۋعا الىنعان. ولاردىڭ دەنى - 556 ادام - اۋعانستاننان كەلگەندەر.
ايتا كەتەيىك، قر ىشكى ىستەر ءمينيسترىنىڭ بلوگىنا قازاقستان بيلىگىنەن بوسقىن مارتەبەسىن بەرۋدى سۇرايتىن ۋكراينا ازاماتتارىنان وتىنىشتەر كەلىپ ءتۇسىپ جاتىر.
اباي-اقپارات
