الماتىدا 200-گە تارتا بيزنەس-قاۋىمداستىق وكىلدەرىنە «كوكجايلاۋ» كۋرورتىنىڭ جوباسى تانىستىرىلدى دەپ حابارلايدى «قازاقپارات» ءتىلشىسى گۇلميرا عوسمانالى. 

ەستەرىڭىزدە بولار، وسى «كوكجايلاۋ» توڭىرەگىندە ۇلكەن داۋ تۋىنداعان. مەلس ەلەۋسىزوۆ باستاعان تابيعات جانشىرلارى «دەمالىس ورىنى» كەرەك بولسا «شىمبۇلاقتى دامىتسىن»، «كوكجايلاۋدان اۋلاق ءجۇرسىن»، «تازا تابيعاتتى جەكە مەنشىك ۇيلەرگە بەرۋگە بولمايدى» دەپ شىر-پىر بولىپ ەدى. ەندى مىنە ول سوزدەردىڭ ءبارىن ەستىر قۇلاق بولماعانىنا كوز جەتىپ وتىر.   

كۋرورت جوباسىن سينگاپۋرداعى ديزاينەرلىك كومپانيا جاساعان. تاپسىرىس بەرۋشىلەر
جوبانى جاساعان ديزاينەرلەرگە قازاقتىڭ بىرەگەي مادەنيەتى مەن ۇلتتىق ناقىشىن پاش ەتىپ قانا قويماي، قورشاعان ورتاعا زالالىن تيگىزبەيتىن ىقشام نىساننىڭ جوباسىن جاساۋدى تاپسىرعان. 

ناتيجەسىندە سينگاپۋرلىق ماماندار ەجەلگى جىبەك جولىن ەسكە تۇسىرەتىن كەرۋەن سارايدىڭ ەسكيزىن تاڭداپ الىپتى. ولار «كوكجايلاۋ» ساراپتاۋ كەڭەسىنىڭ مۇشەلەرىنىڭدە پىكىرىن قاپەرگە الدى. 

كەڭەس مۇشەسى، «دولوميتى سۋپەرسكي» يتالياندىق كۋرورتىنىڭ ديرەكتورى الەسساندرو مارتسولا تانىستىرىلعان جوبادا بارلىق قاجەتتى تالاپتار ەسكەرىلگەنىن اتاپ ءوتتى.

«ماعان ديزايننىڭ جوباسى ۇنادى. بۇل جەردە 2 نارسە ەسكەرىلگەن: بىرىنشىدەن، كۋرورت وزگە نىساندارعا ۇقسامايدى. ەكىنشىدەن، كۋرورتتا جەكە ۇيلەر جوق، تەك قوناقۇيلەر عانا ورنالاسقان. ءبىز الپىدەگى كۋرورتتاردىڭ قاتەلىگىن قايتالاعىمىز كەلمەيدى. ونداعى جەكە ۇيلەرگە تۋريستەر تاراپىنان سۇرانىس جوق. «كوكجايلاۋ» كۋرورتى جىل بويى قىزمەت ەتەتىن بولادى»، - دەدى ول.

«اباي-اقپارات»