قادىرلى دوس-باۋىر، اعا-اپكە، ءىنى-قارىنداستار!

مەنىڭ تۇڭعىش كىتابىم 2008 جىلى وقىرمانعا جول تارتقان بولاتىن. سودان بەرى اتتاي 6 جىل ءوتىپتى. ءبىر جاس بالانىڭ دۇنيەگە كەلىپ، تۇساۋى كەسىلىپ، ءتىلى شىعىپ، مەكتەپكە باراتىن ۋاقىت. 6 جىل ايدارىنان جەل ەسىپ، زىمىراپ وتە شىعىپتى.

ال، سول جىلدار بويى مەن نە ىستەپ، نە قويعانىمدى ءوزىم دە بىلمەيمىن. كۇندەلىكتى ولەڭ جازدىم دەپ تە ايتا المايمىن. سەبەبى، ولەڭ دەگەن كىرپياز قوناق كەيدە اپتالاپ، كەيدە ءتىپتى ايلاپ ءىزىن سالماي كەتەدى.

دەگەنمەن، كەيىنگى 6 جىلدا ءبىراز دۇنيە قاعاز بەتىنە ءتۇسىپتى. اماندىق بەرگەن اسا مەيىرىمدى اللاما ءتاۋبا، ولەڭ جازدىرعان تاعدىرىما راحمەت! سول ولەڭدەردىڭ ءبىرشاماسى عالامتوردا جاريالانسا، ءبىرشاماسى جازىلعان جەرىندە ءوز كەزەگىن كۇتىپ جاتتى.

ادام اسىققانمەن، اللا اسىقپايدى عوي! تالاي رەت كىتاپ شىعارۋعا وقتالىپ ەدىم، رەتى كەلمەدى. سويتسەم ونىڭ وزىندىك سەبەبى بار ەكەن. بىلاي بولدى.

وسىدان ەكى جىل بۇرىن جاۋىندى-شاشىندى استانانىڭ ءبىر كەشىندە ءىنى-دوس، اسا تالانتتى اقىن باۋىرىم ەرلان ءجۇنىس ەكەۋمىزدىڭ سانامىزعا ەگىز كىتاپ شىعارۋ تۋرالى يدەيا كەلگەن ەدى. ودان كەيىن الگى يدەيامىز قايدا كەتكەنى بەلگىسىز، ءۇشتى كۇيلى جوعالىپ كەتكەن بولاتىن.

كۇندەردىڭ كۇنىندە «پاتەر قوجايىنىنا نە دەپ جاۋاپ بەرەمىز، بانكتەردەن توقتاۋسىز حابارلاساتىن بۇلبۇل ءۇندى مەنەدجەرلەردەن قالاي قۇتىلساق بولادى...» دەپ اقىلداسىپ تۇرعانىمىزدا الگى اينالىپ كەتەيىن عانا يدەيامىز اسپان استىن جاپ-جارىق قىپ، شۇعىلالانا قايتا كەلە قالعانى!))

ونسىز دا ماعىناسىز بوپ بارا جاتقان ءومىردىڭ تۇنەگىن قاق جارىپ وتكەن بۇل وتكىر ساۋلەنى ەندى ەشقايدا جىبەرمەۋگە بەل بۋدىق. سودان مىنە، وتىرمىز كىتاپتى شىعارىپ اپ))). ونىڭ ءوزىن قارىزعا))) باسقا قانداي امالىمىز بار ەدى دەپ قويامىز تاعى دا)). ال، ول راس.

كىتاپتى تانىستىرۋعا كوشەيىن. بۇل كىتاپتىڭ ءبىر ەرەكشەلىگى - وقىرمان ءبىر عانا اۆتوردى وقىمايدى. ءبىر كىتاپتىڭ ىشىندە ەكى اۆتوردىڭ جىرلارىنا بىردەن قول جەتكىزە الادى!

بۇل جيناقتان ءسىز، ءومىردىڭ اششىسى مەن تۇششىسىن، كەيدە ءتاتتى ساتتەرىن دە بىرگە كورگەن ەكى دوستىڭ، ەكى رۋحاني جاقىن ادامداردىڭ جان ارپالىسىن، قۋانىشى مەن مۇڭىن، جەڭىسى مەن جەڭىلىسىن، ارمانى مەن ءۇمىتىن تاباسىز.

بۇل كىتاپتىڭ فورماتى – «twinbook» (بۇل يدەيا دا بونۋس رەتىندە كوكتەن تۇسكەن بولاتىن). ياعني «ەگىز كىتاپ». ەگىز جاننىڭ ەلگە ۇسىنعان ەكى بولەك الەمى.

سول سەبەپتەن سىزدەردى، قادىرلى وقىرمان، قازاق ادەبيەتىندە تۇڭعىش رەت twinbook فورماتىندا شىعىپ وتىرعان «عارشى» جانە «عاۋسار» اتتى كىتاپتىڭ تۇساۋكەسەرىنە شاقىرامىز!

«عاۋساردىڭ» اۆتورى – ەرلان ءجۇنىس، «عارشىنىڭ» اۆتورى – پاقىرلارىڭىز.

كىتاپتىڭ تۇساۋكەسەر ءراسىمى 26 ءساۋىر كۇنى، قر ۇلتتىق اكادەميالىق كىتاپحاناسىندا، ساعات 15.00 دە باستالادى.

وسى رەتتە ءار تالانتتى، تالاپتى جاسقا ەسىگى ۇنەمى اشىق كىتاپحانانىڭ اقجارقىن ۇجىمىنا، ونىڭ ىشىندە قازاقتىڭ ۇلى جازۋشىسى، التايداي ءور قالامگەر وراعاڭنىڭ تۋعان قارىنداسى، جاستارعا قامقور اپايىمىز عاليا بوكەيقىزىنا ەرەكشە العىسىمىزدى بىلدىرەمىز.

بۇل قىزىقتى تۇساۋكەسەردە سىزدەر ءۇشىن اندەرى تەك پوەزياعا ء(ان ءسوزى ەمەس!) جازىلعان تالانتتى اكتەر، كومپوزيتورلارىڭىز قادىرعالي كوبەنتاي مەن ءانشى-گيتاريست باۋىرلارىڭىز ەرشات قايىرحان ونەرىن كورسەتپەك.

قادىرلى اعايىن!

بۇگىن قازاقتى كىتاپ وقىمايدى دەپ جازعىراتىندار كوپ. مۇلدە ولاي ەمەس ەكەنىن ءسىز دە مەن دە بىلەمىن! ءار قازاقتىڭ ۇيىندە، ەڭ قۇرىعاندا ءبىر قابىرعاسى كىتاپقا ارنالادى. ءبىزدىڭ دە كىشىگىرىم ەڭبەگىمىز سىزدەردىڭ شاڭىراقتارىڭىزدا تۇرسا دەپ ارماندايمىز!

قوس كىتاپتىڭ باعاسى – 2 500 تەڭگە. ساتىپ الام دەۋشىلەر كىتاپتى تۇساۋكەسەردە الا الادى. كۇتەمىز!

وسى حابارلاندىرۋدى بولىسكەن ادامعا اللا رازى بولسىن!

قۇرمەتپەن
اقبەرەن ەلگەزەك

قىمباتتى زامانداستار!

اۋەلى، حالىقارالىق كىتاپ جانە اۆتورلىق قۇقىق كۇنىمەن بارلىعىڭىزدى شىن جۇرەكتەن قۇتتىقتايمىن!

ەكىنشى، شىن مانىندەگى «كىتاپتى – دوس – ءومىر دوسى» دەپ بىلەتىن شىنايى وقىرمانداردى جاڭا كىتاپتىڭ جارىق كورۋىمەن قۇتتىقتايمىن!

بۇل ءوزى قيىن ءارى قىزىقتى وقيعا بولدى! )))

مەنىڭ اعا-دوسىم، وتە تالانتتى اقىن اقبەرەن ەلگەزەك ەكەۋىمىز تاڭعى ارماندار مەن ۇمىتتەر بيىك عيماراتتاردىڭ ۇستىنەن باتىل ۇشاتىن زامانداردا ارمانداپ ەدىك: «شىركىن، ەكەۋىمىز ءبىر كىتاپ شىعارساق» دەپ. «ول ەرەكشە كىتاپ بولسا» دەپ. سودان بەرى ەكى جىل ءوتىپتى.

بىردە استانادا...

ياعني وسىدان ون كۇن بۇرىن...

ەكەۋىمىزدىڭ دە ومىرىمىزدەگى تىم ۇزاققا سوزىلعان جۇمىسسىزدىق ءداۋىرىنىڭ ىشكى قۇلازۋىن، بانك وپەراتورلارىنىڭ شەكتەۋسىز بىرلىگى مەن ءۇي قوجايىندارى ەسەپشوتىنىڭ ۇزاق تسيفرلارىن جارىپ-بۇزىپ ءوتىپ، دۇنيەگە عاجايىپ ءارى اقىماقتاۋ ( ))) ) وي كەلدى.

ول وي حازىرەت سۇلتان مەشىتى مەن پيراميدانىڭ ورتاسىندا ءبىراز قالىقتاپ ءجۇرىپ، اقىرى قونار تۇسىن دا تاپتى.

ەكەۋىمىز «Twinbook» فورماتىندا (ۇعىمدى ءوزىمىز ويلاپ تاپتىق)) ) «عارشى» جانە «عاۋسار» اتتى كىتاپ شىعاردىق. قارىزداندىق-قاۋعالاندىق. سەبەبى، بۇل كىتاپ سىزدەردىڭ ەستەتيكالىق سەزىمدەرىڭىزگە دەگەن قۇرمەتىمىزدى شىن بىلدىرسە دەدىك. بۇل كىتاپتىڭ ىشىندە – بۇرىنعى ءتورت كىتابىمىزدان ىرىكتەلگەن جانە تىم جاڭا كوووپ ولەڭدەر بار. ەكەۋىمىزدىڭ.

اسا مەيىرىمدى، ەرەكشە قامقور اللا بۇيىرتسا، 26-شى ءساۋىر كۇنى، ساعات 15.00-دە قر ۇلتتىق اكادەميالىق كىتاپحاناسىندا «عارشى» مەن «عاۋساردىڭ» تۇساۋكەسەر ءراسىمى بولادى.

بۇل ءۇشىن – ءور التايدىڭ كەربۇعىسى – ورالحان اعامىزدىڭ قارىنداسى، اسا اياۋلى اپايىمىز – عاليا بوكەيقىزىنا ريزاشىلىعىمىزدى بىلدىرە كەتسەك، ارتىق بولماس.

بۇل راسىمدە اكتەر، كومپوزيتور قادىرعالي كوبەنتاي جانە ءانشى، گيتاريست ەرشات قايىرحان جۇيكەنىڭ ەمەس، جۇرەك تالشىقتارىن ءۇزىلدىرىپ بارىپ، قايتا جالعايتىنىنا سەنىمدىمىز.

كەلىڭىزدەر! كۇتەمىز!

P.S. كىتاپ ساتىلادى. باعاسى: 2500 تەڭگە.

قۇرمەتپەن     ەرلان ءجۇنىس

اباي-اقپارات