(ەركىن راقىشەۆتىڭ فيلمدەرى تۋرالى)

جۋىردا «جارالى سەزىم»، «جەتىمدەر» ءفيلمىنىڭ اۆتورى ەركىن راقىشەۆ دەگەن ازامات ءبىر گازەت بەتىندە بەرگەن سۇحباتىندا ءوز فيلمدەرىن ماقتاپ، ءبىردى-ەكىلى سىني پىكىر ايتقان ءبىر رەجيسسەردى جەردەن الىپ، جەرگە سالىپتى. ءتىپتى ءوزىن جازىقسىز جاپا شەككەن سۋرەتكەر ء(تىپتى - قايراتكەر) رەتىندە كورسەتىپ «ولار مەنى كورە المايدى، جالعىز بەتىمە باساتىن مىندەرى -  وقىماعاندىعىم» دەيدى. ءوزىنىڭ رەجيسسەرلىك ءبىلىمى جوقتىعىن مەڭزەيتىن بولۋى كەرەك. بۇل كىسىنىڭ ءبىراز كوسىلۋىنە مۇمكىندىك بەرگەن جۋرناليست تە ونى «اۋەسقوي رەجيسسەر» دەپ اتاپ بەرىپتى. ەركىن راقىشەۆ وعان شامدانبايتىن سياقتى.

ەرەكەڭ قىزدى-قىزدىمەن وسى كۇنى باسپاسوزدە تەندەنتسياعا اينالىپ كەتكەن كينو تۋرالى جاتتاندى، سىڭارجاق پىكىردى قىزدىرىپ، لاۋلاتا تۇسەدى. ول پىكىرى «ەگەر شەت ەلدەن سىيلىق العىڭ كەلسە، تۋعان حالقىڭدى سورلى قىلىپ كورسەت» دەگەنگە سايادى.

(ەركىن راقىشەۆتىڭ فيلمدەرى تۋرالى)

جۋىردا «جارالى سەزىم»، «جەتىمدەر» ءفيلمىنىڭ اۆتورى ەركىن راقىشەۆ دەگەن ازامات ءبىر گازەت بەتىندە بەرگەن سۇحباتىندا ءوز فيلمدەرىن ماقتاپ، ءبىردى-ەكىلى سىني پىكىر ايتقان ءبىر رەجيسسەردى جەردەن الىپ، جەرگە سالىپتى. ءتىپتى ءوزىن جازىقسىز جاپا شەككەن سۋرەتكەر ء(تىپتى - قايراتكەر) رەتىندە كورسەتىپ «ولار مەنى كورە المايدى، جالعىز بەتىمە باساتىن مىندەرى -  وقىماعاندىعىم» دەيدى. ءوزىنىڭ رەجيسسەرلىك ءبىلىمى جوقتىعىن مەڭزەيتىن بولۋى كەرەك. بۇل كىسىنىڭ ءبىراز كوسىلۋىنە مۇمكىندىك بەرگەن جۋرناليست تە ونى «اۋەسقوي رەجيسسەر» دەپ اتاپ بەرىپتى. ەركىن راقىشەۆ وعان شامدانبايتىن سياقتى.

ەرەكەڭ قىزدى-قىزدىمەن وسى كۇنى باسپاسوزدە تەندەنتسياعا اينالىپ كەتكەن كينو تۋرالى جاتتاندى، سىڭارجاق پىكىردى قىزدىرىپ، لاۋلاتا تۇسەدى. ول پىكىرى «ەگەر شەت ەلدەن سىيلىق العىڭ كەلسە، تۋعان حالقىڭدى سورلى قىلىپ كورسەت» دەگەنگە سايادى.

ەگەر ونىڭ ءوز لوگيكاسىنا سالاتىن بولساق، وندا ەركىن راقىشەۆتىڭ ءوزىن ابدەن قازاققا قارسى، وعان نالەت ايتىپ جۇرگەن رەجيسسەردىڭ قاتارىنا جاتقىزۋعا بولماس پا ەكەن؟ ول ءوز فيلمدەرىندە قازاق قىزدارىن ۇنەمى ىشقىرى بوس، جەڭىل ءجۇرىستى بويجەتكەندەر كەيپىندە كورسەتەدى. راقىشەۆ فيلمدەرىندە قاراكوز قارىنداستارىمىز ۇنەمى اۋىلدان بەس قادام اتتاپ شىقسا بولدى - جۇكتى بوپ شىعا كەلەدى. جولدان، كوشەدەن بالا تابادى. ىلعي ءبىر تەكسىز قىزدار! ايتەۋىر قالاعا بارعان بەتتە، اۆتوبۋستان تۇسە سالا اداسادى، الدانادى، اقىرى - اياعى اۋىر بوپ اۋىلىنا قايتادى. سوندا نە، بۇكىل قازاق قىزدارى سونداي كورگەنسىز، كوزسىز، الدى-ارتىن ويلامايتىن الاڭعاسار اقىماق پا؟ بۇل، جالپى، قازاق حالقىنا كۇيە جاعۋ، كولەڭكە ءتۇسىرۋ ەمەس پە؟ بارلىق كينوتۋىندىلارىندا قازاقتاردى ءبىر قاتىگەز، تاسباۋىر، ىشكىش ەتىپ بەينەلەيدى. قازاق قاشان جەتىم-جەسىرلەرىن سىرتقا تەۋىپ ەدى، قاشان قازاق ءوز باۋىرىنان باس تارتىپ ەدى! بۇل دەگەنىنىز بارىپ تۇرعان جالا، ناقاق كىنا ەمەس پە؟! ارينە، پالەسى جۇقپاسىن، جالاسى تيمەسىن دەيمىز.

راقىشەۆتىڭ فيلمدەرىن كورىپ وتىرىپ قازاق دەگەن ءبىر يمانسىز جۇرت پا دەپ قالاسىڭ. جەتىمىن قاڭعىتىپ جىبەرەدى، قىزدارىن تىيا المايدى، ۇلدارىن ايار، وپاسىز، ىشكىش، توعىشار قىلادى، اڭدىعانى ەتەكتى، توسەكتەن كەيىن جاۋاپكەرشىلىكتەن ات-توڭىن الا قاشادى، ءتارتىپ جوق، تاربيە جوق، فيلمدەرى تولعان ازعىندار، قاشىپ-پىسقاندار، مولايا كەلە بۇكىل كادرلاردى جىن قاپتايدى، ۇلدارى - ءىبىلىس، قىزدارى - شايتان بولادى! سوندا حالىقتىڭ بولاشاعى قايدا، ارمان-مۇراتى قايدا، ەرتەڭىن، كەلەشەگىن كىم ويلايدى، اعانىڭ سيقى اناۋ - توسەكقۇمار، ويلاعانى ءناپسى، اينالا تولعان جاۋ، دۇشپان، قول سوزاتىن بىرەۋ جوق، ىلعي ءبىر «پودونوكتاردان» تۇراتىن بولاشاعى جوق قاسيەتسىز حالىق! ماحاببات دەگەن ۇلى سەزىمگە لايىق ەمەس، ادال جار، اينىماس دوس تاپپاعان، ومىردە شاپاعاتى، تۇرمىستا جاراسىمى جوق، بوس كەۋدە، ءۇمىتسىز، ارسىز، ساناسىز جۇرت! جاقسىلىق كورمەگەن، ءومىرى جارىماعان، باسى قۇرالماعان، بەيساۋات بوسقان، قاڭعىپ اندا ءبىر، مىندا ءبىر كوشىپ، اۋىپ جۇرگەن، جاقسىدان كۇدەرىن ۇزگەن ۇشپانا جاستار... ەركىن راقىشەۆتىڭ فيلمدەرىندەگى قازاق وسى! بۇل نە ماسقارا؟!

فيلمدەردىڭ كوركەمدىلىك، كاسىبي سپاسىنىڭ قۇلدىراعان دەنگەيىن بىلاي قويعاندا، بۇل نە دەگەن بەيباستىق. ءوز ەلىن، ۇلتىن وسىنشاما قورلاۋعا وعان كىم رۇقسات بەردى، كىم سەپتەسىپ جۇرگەن؟

مەدەت قۇنىپياۇلى