كانادانىڭ  ۆانكۋۆەر قالاسىندا باستالاتىن قىسقى وليمپيادا ويىندارىنا ساناۋلى كۇندەر قالدى. جازعى ويىندارعا جارتى جىل بۇرىن جار سالاتىن قازاقستاندىق باق قازىر ءۇنسىز وتىر. سەبەپتىڭ  قىسقى ويىنداردى جازعى وليمپيادادان كەم كورگەندىكتەن نەمەسە الدىڭعىنىڭ سوڭعىدان مارتەبەسى تومەندىكتەن ەمەس ەكەنى بەسەنەدەن بەلگىلى. ءبارى سول سپورتشىلاردىڭ جارىتپايتىندىعىنان. يۋتا شتاتىنداعى سولت-لەيك-سيتي مەن يتاليانىڭ تۋرينىنەن اۋزىمىزدى قۋ شوپپە ءسۇرتىپ قايتتىق. سوندىقتان دا، جانكۇيەردىڭ الاڭدامايتىن ءجونى بار.

كانادانىڭ  ۆانكۋۆەر قالاسىندا باستالاتىن قىسقى وليمپيادا ويىندارىنا ساناۋلى كۇندەر قالدى. جازعى ويىندارعا جارتى جىل بۇرىن جار سالاتىن قازاقستاندىق باق قازىر ءۇنسىز وتىر. سەبەپتىڭ  قىسقى ويىنداردى جازعى وليمپيادادان كەم كورگەندىكتەن نەمەسە الدىڭعىنىڭ سوڭعىدان مارتەبەسى تومەندىكتەن ەمەس ەكەنى بەسەنەدەن بەلگىلى. ءبارى سول سپورتشىلاردىڭ جارىتپايتىندىعىنان. يۋتا شتاتىنداعى سولت-لەيك-سيتي مەن يتاليانىڭ تۋرينىنەن اۋزىمىزدى قۋ شوپپە ءسۇرتىپ قايتتىق. سوندىقتان دا، جانكۇيەردىڭ الاڭدامايتىن ءجونى بار.

التى اي قىسپەن ارپالىساتىن قازاقتىڭ قىسقى وليمپيادادان نەگە  قۇر قول كەلەتىنى تۇسىنىكسىز. تابيعاتقا ەش كىنا ارتا المايسىڭ، ال سپورتتىق نىسانداردىڭ ازدىعى ەندى بىلىنبەيتىن شىعار. ازياداعا ارنالىپ سالىنعان عيماراتتاردا جاستاردىڭ جاتتىعاتىن زور مۇمكىندىگى بار. «مەدەۋ» مەن «شىمبۇلاقتى» ايتىپ ماقتانعاندا الىسقا شابامىز، ال الەمدىك سىندا كونكيشىلەر مەن شاڭعىشىلارىمىز شالدىعىپ قالىپ قويادى. وسىعان دەيىن وتكەن ەكى وليمپيادادا كورشى ەلدەردىڭ تىلەۋىن تىلەپ وتىرعانىمىز جاسىرىن ەمەس، سەبەبى، توپ جارىپ شىققان ەشكىم بولمادى.ۇزدىك ۇشتىكتى بىلاي قويعاندا، العاشقى وندىققا كىرگەن قازاق سپورتشىسىن شاممەن ىزدەپ تاپپاعانىمىز  ءۇشىن ەشكىم دە ەسەپ بەرگەن جوق. سوندا، قىسقى سپورت تۇرلەرىن باسقاراتىن فەدەراتسيالار نە تىندىرىپ وتىر؟! الدە  تەمىرحان دوسمۇحامبەتوۆ مىرزا تەك جازعى ويىندارعا  عانا جاۋاپتى ما؟! جارايدى، نورۆەگيا، فينليانديا، رەسەي، گەرمانيا سىندى قىسقى سپورت تۇرلەرىن سەرىك ەتكەن ۇلاندارى مول ەلدەرمەن ساناسپاي-اق قويايىق، بىراق ءبىر مەدالعا زار بولاتىنداي جاعدايىمىز مۇشكىل ەمەس قوي. كوكەيدە سۇراق كوپ، ول سۇراقتار وتكەن وليمپيادالار اياقتالعان بويدا، ءبىزدىڭ قورجىن بوس قايتقاندا  قىلاڭ بەرگەن. بىراق، جاۋاپ قاتقان ءبىر باسشى بولمادى. ەڭ قۇرىعاندا، قولاسىز كەلگەنىمىزدىڭ سەبەبىن تۇسىندىرگەن ءبىر جان جوق.. سوندا، كىنالى كىم؟! سپورتشى ما، باسشىلىق پا، كەرەكتى قارجى مەن كوڭىلدى بولمەي قويعان مەملەكەت پە؟! بۇل دا سول كوپ سۇراقتىڭ ءبىرى. حوش دەلىك، وتكەن ءوتتى، ەندى الدان نە كۇتەمىز؟! 1996 جىلدان بەرى تورتجىلدىق باسەكەسىنەن سىرت قالىپ كورمەگەن حوككەيشىلەرىمىز بۇل جولى قۋانتپادى. ەرلەر مەن قىزدار قۇراماسىنا ىرىكتەۋدەن ىركىلمەي ءوتۋ باقىتى بۇيىرماي قويدى بۇل جولى. وليمپياداعا اپاراتىن بيلەتتەر ءالى دە تاراتىلىپ جاتىر، ازىرگە ۆانكۋۆەرگە اتتاناتىن ات توبەلىندەي توپتىڭ عانا ەسىمى بەلگىلى. كونكيمەن جۇگىرۋشىلەرگە جولداما بەرەتىن الەم كۋبوگى ءالى دە بولسا جالعاسۋدا، قازاقستاندىق دەنيس كۋزين 1500 مەترگە جۇگىرۋدە 18-ورىننان كورىنىپ، قىسقى ويىندارعا قاتىسۋ مۇمكىندىگىن الدى. سونىمەن قاتار، 1000 مەترگە جۇگىرۋدە كورسەتكەن جاقسى ناتيجەسى ءۇشىن دە جولداما الۋعا تولىق قۇقى بار. قىزىلجارلىق رومان كرەچ پەن دميتري بابەنكولاردى دا ۆانكۋۆەردەگى ايدىننان كورۋىمىز ابدەن مۇمكىن. ال قىزدار اراسىنان ەكاتەرينا ايدوۆا قازاقستاننىڭ نامىسىن جالعىز ءوزى قورعايدى. 18 جاستاعى بويجەتكەن 500-1000 مەترلەرگە جۇگىرۋدە ءوز مۇمكىندىگىن بايقايتىن بولادى. بياتلونعا بولىنگەن 220 جولدامانىڭ 9-ى قازاقستانعا بۇيىرىپتى..  شاڭعى سپورتىنىڭ بارلىق تۇرىنە ارنالعان ەرەجە بويىنشا الەم كۋبوگىنىڭ قورىتىندىسىندا ۇزدىك 30 كوماندانىڭ قاتارىنا ەنگەن ەلگە قوسىمشا جولدامالار ۇلەستىرىلەدى. كەلەسى جىلدىڭ 25-قاڭتارىندا، بارلىق جارىستار اياقتالعاسىن عانا جولداما يەلەرىمەن تولىق تانىسامىز. ترامپليننەن سەكىرۋدە تابىسىمىز جاقسى ەمەس، راديك جاپاروۆ، نيكولاي كارپەنكولارعا كوزى تىگەمىز بۇل سىندا. فريستايلدا 6 جولداما ازىرگە قولدا تۇر، ەگەر كەلەسى الەم كۋبوگىندا رەيحەرد، بارناشەۆ، روديونوۆالاردىڭ ناتيجەسى تومەندەپ كەتپەسە. تاۋ شاڭعىسى مەن شورت-ترەكتە  ءبىر قولدىڭ ساۋساعىنا جەتپەيتىن جولدامالار بار ەكەنىن كوڭىلگە مەدەۋ تۇتۋعا تۋرا كەلەدى. جاقىندا عانا  الەم كۋبوگىندا 7-ورىننان كورىنگەن دەنيس تەن مەن ابزال راقىمعاليەۆكە دە سەنىم جۇگىن ارتقان دۇرىس بولار. مانەرلەپ سىرعاناۋدا بۇلاردان وزا شاباتىن وزگە سپورتشى قازاقستاندا ازىرگە جوق..

الەمنىڭ 80-نەن اسا ەلى قاتىساتىن قىسقى وليمپيادا ءححى رەت وتكەلى وتىر. اقپاننىڭ 12 مەن 28 ارالىعىندا بۇكىل الەمنىڭ نازارى كانادانىڭ وڭتۇستىك-باتىسىنداعى ۆانكۋۆەر قالاسىنا اۋادى. تەلەديدارعا تەلمىرىپ، تاقىمىن قىسقان اعايىن مينيسترلىك ايتقانىن ورىنداپ، «ءبىر مەدالمەن ورالامىز» دەگەن سوزىنەن تايماسا دەپ تىلەيدى. سولت-لەيك-سيتي مەن تۋريندەگى مەدالسىز قايتۋدىڭ «سەڭى» بۇل جولى بۇزىلادى دەگەنگە سەنگىمىز-اق كەلەدى.سەبەبى، قول بۇلعاپ ازيادا تۇر. ءوز جەرىمىزدە وتەتىن جارىستا جەر سيپاپ قالماس ءۇشىن، الەمدىك سىننان ابىرويمەن قايتۋ كەرەك.

اينا كەرىم، «اباي-اقپارات»