ۇلتتىق كينونى قولداۋ ورتالىعى 2024 جىلعى ۇلتتىق فيلمدەر دەپ تانىلۋعا ءۇمىتتى كينوجوبالاردى ىرىكتەۋ كونكۋرسىن جاريالايدى.⠀

كينوجوبالاردى ىرىكتەۋ ەكى كەزەڭدە جۇزەگە اسادى. ءبىرىنشى كەزەڭ – فيلمدەردىڭ ستسەناريىن نەمەسە ستسەناري جوسپارلارىن قاراۋ. ەكىنشى كەزەڭدە تاقىرىپتىق جوسپارعا ساي كەلەتىن، ساراپتاما كەڭەسى ىرىكتەگەن جوبالاردىڭ قۇجاتتارىن جيناقتاۋ جۇزەگە اسىرىلادى.

كونكۋرستىق ىرىكتەۋدىڭ ءبىرىنشى كەزەڭىنە قاتىسۋ ءۇشىن ۇمىتكەرلەر ورتالىققا ەلەكتروندى تۇردە ستسەناريلەردى قاراۋعا ءوتىنىمدى، PDF فورماتىندا ستسەناريلەردى، جەكە باسىن كۋالاندىراتىن قۇجاتتاردىڭ كوشىرمەسى مەن اۆتورلىق شارتتى، ءوتىنىش بەرۋشى مەن ستسەناري نەمەسە ستسەناري جوسپارىنىڭ اۆتورى اراسىنداعى الدىن الا شارتتى جىبەرۋى قاجەت. ءوتىنىش بەرۋشى ءفيلمنىڭ ءار ءتۇرى، ويىن ءفيلمى، انيماتسيالىق فيلم، دەرەكتى-حرونيكالى فيلمدەر بويىنشا تەك 2 ستسەناري ۇسىنا الادى.

قۇجاتتار ورتالىق سايتىنداعى https://kazakhcinema.kz/kz/konkurs_2024 سىلتەمەسى ارقىلى 12 ءساۋىر مەن 18 ءساۋىر كۇندەرى، ساعات 18:00 دەيىن قابىلدانادى.

ورتالىق قۇجاتتاردى قابىلداۋ اياقتالعاننان كەيىن ءوتىنىش بەرۋشىلەر ۇسىنعان قۇجاتتاردى ساراپتاما كەڭەسىنىڭ قاراۋىنا ەنگىزەدى.

ايتا كەتەيىك، كونكۋرستىق ىرىكتەۋگە قاتىسۋ قۇقىعىنا يە بولۋ ءۇشىن ۇمىتكەرلەردىڭ سالىق بەرەشەگىنىڭ بولماۋى، بانكروتتىق راسىمگە تارتىلماۋى ماڭىزدى.

Abai.kz