ءماجىلىس دەپۋتاتتارى سۋ تاسقىنىنان زارداپ شەككەن ايماقتارداعى جۇمىسىن جالعاستىرۋدا. سونىڭ ىشىندە جاعدايى كۇردەلى وڭىرلەرگە ەرەكشە نازار اۋدارىلادى. كەيبىر ەلدى مەكەندەردە سۋ تارتىلا باستاعانىمەن تۇرۋعا جارامسىز. سوندىقتان تۇرعىندار ۇيلەرىنە قايتا الماي وتىر. ولارمەن كەزدەسۋدە دەپۋتاتتار تاسقىن سالدارىنان بولعان شىعىندارعا بەرىلەتىن وتەماقى بويىنشا ءتۇسىندىرۋ جۇمىستارىن جۇرگىزىپ جاتىر.

سۋرەت: ءماجىلىستىڭ ءباسپاسوز قىزمەتىنەن الىندى

دەپۋتاتتار ەركەبۇلان مامبەتوۆ، دميتري كولودا جانە باقىتجان بازاربەك سولتۇستىك قازاقستان وبلىسىنداعى بىرنەشە ەلدى مەكەندى ارالاپ، سۋ تاسقىنىمەن كۇرەس جۇمىسىنىڭ بارىسىمەن تانىسىپ قايتتى.

بۇگىندە ەسىل اۋدانى پوكروۆكا اۋىلىنداعى سۋ دەڭگەيى 1,5 مەتردەن اسىپ، قاۋىپ ءتوندىرىپ وتىر. جاعداي ەسىل وزەنىندەگى مۇزدىڭ جىلجۋىنا بايلانىستى قيىندادى. وزەننىڭ كوتەرىلۋىنەن 24 ءۇيدى سۋ استىندا قالىپ، تۇرعىندارى قاۋىپسىز جەرگە كوشىرىلدى. دەپۋتاتتار ولارمەن كەزدەسىپ، شىعىنداردى وتەۋگە قاتىستى ءتۇسىندىرۋ جۇمىستارىن جۇرگىزدى.

سۋرەت: ءماجىلىستىڭ ءباسپاسوز قىزمەتىنەن الىندى

– وتەماقى ۇكىمەتتىڭ ءتيىستى قاۋلىسىنا سايكەس بەرىلەدى. توتەنشە جاعداي باستالعاننان باستاپ 30 كۇن ىشىندە جەرگىلىكتى مەملەكەتتىك ورگاندارعا وتەماقى تۋرالى ءوتىنىش بەرۋ قاجەت، 10 جۇمىس كۇنى ىشىندە زالالدىڭ مولشەرى ايقىندالادى. وتەماقى تولەۋگە ارنالعان قاراجات جەرگىلىكتى اتقارۋشى ورگانداردىڭ رەزەرۆتەرىندە بار. ەگەر قوسىمشا قارجىلاندىرۋ قاجەت بولسا، ول مەملەكەتتىك رەزەرۆتەن بەرىلەدى. مەملەكەت كومەك كورسەتەدى، ەشكىم نازاردان تىس قالمايدى، – دەدى دميتري كولودا.

سۋرەت: ءماجىلىستىڭ ءباسپاسوز قىزمەتىنەن الىندى

دەپۋتاتتار كورشىلەس نيكولاەۆكا اۋىلىنداعى قالپىنا كەلتىرۋ جۇمىستارىمەن دە تانىستى. مۇندا دا 20-دان استام ءۇيدى سۋ شايىپ، بارلىق تۇرعىن جەرگىلىكتى ەۆاكۋاتسيالاۋ پۋنكتىنە جىبەرىلدى. تەحنيكالار جۇمىلدىرىلىپ، قالپىنا كەلتىرۋ جۇمىستارى جۇرگىزىلىپ جاتىر.

سۋرەت: ءماجىلىستىڭ ءباسپاسوز قىزمەتىنەن الىندى

بۇدان سوڭ دەپۋتاتتار قىزىلجار جانە شال اقىن اۋداندارىنا بارىپ، نوۆونيكولسكوە، قاراتال اۋىلدارى مەن سەرگەەۆكا قالاسىنداعى سۋ ەلەكتر كەشەنىنىڭ جاعدايىمەن تانىستى. بۇگىندە سۋ قويماسىنداعى سۋ دەڭگەيى 4,2 ​​مەتردەن اسادى. بولجام بويىنشا 1-2 تاۋلىك ىشىندە كوپ مولشەردەگى سۋ پەتروپاۆلعا جەتەدى.

سۋرەت: ءماجىلىستىڭ ءباسپاسوز قىزمەتىنەن الىندى

ءماجىلىس دەپۋتاتى ايداربەك قوجانازاروۆ سۋ استىندا قالعان قۇلسارىلىقتاردىڭ جاعدايىمەن تانىستى. ول ساپار بارىسىندا مۇلكىنەن ايىرىلعان حالىقپەن كەزدەسىپ، ماسەلەلەرىن تالقىلادى. دەپۋتاتتىڭ ايتۋىنشا، بۇگىندە قالانىڭ 40 پايىزىن سۋ شايىپ كەتكەن.

دەپۋتات قازىرگى ۋاقىتتا قالادا ءتۇرلى اۋرۋ تاراۋ قاۋپى بارىن ايتتى. وسى باعىتتا جەرگىلىكتى ەپيدەميولوگيالىق ورتالىق ءتيىستى شارالار اتقارۋعا ءتيىس. قۇلسارىداعى سۋ دەڭگەيى سوڭعى ەكى كۇندە تومەندەگەن. ەندى بيلىك تاراپىنان شىعىنعا ۇشىراعان حالىقتىڭ وتەماقىسىنىڭ دۇرىس بەرىلۋى قاداعالانادى.

سونىمەن قاتار ءماجىلىس دەپۋتاتى ماڭعىستاۋ وبلىسى بەينەۋ اۋدانىندا بولىپ، وسى ءوڭىردى پانالاۋعا ءماجبۇر بولعان قۇلسارىلىقتارمەن كەزدەستى. جەرگىلىكتى مەكتەپكە كوشىرىلگەن تۇرعىنداردىڭ حال-جاعدايىن ءبىلدى. مەكتەپ عيماراتىنداعى ەۆاكۋاتسيالىق پۋنكتتى 700-گە جۋىق ادام پانالاعان. مەكتەپ اكىمشىلىگى ولارعا بارلىق جاعداي جاسالعانىن، وقۋشىلار ءۇشىن ساباق ونلاين فورماتقا كوشىرىلگەنىن ايتتى.

سۋرەت: ءماجىلىستىڭ ءباسپاسوز قىزمەتىنەن الىندى

ال دەپۋتات ۆەرا كيم قازىر پاۆلودار وبلىسىندا ءجۇر. ول اقتوعاي، ۋسپەن، ەرتىس جانە جەلەزين اۋداندارىنداعى سۋ تاسقىنىنا قارسى ءىس-شارالار اتقارىپ جاتقان قىزمەتكەرلەرمەن كەزدەستى. بۇل اكىمدىكتەر، توتەنشە جاعدايلار قىزمەتى، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارى، ءبىلىم، دەنساۋلىق ساقتاۋ، سانيتارلىق-ەپيدەميولوگيالىق قىزمەت جانە باسقا دا مەكەمەلەر. كەزدەسۋ بارىسىندا جۇمىستاردى ۇيلەستىرۋگە، سونىڭ ىشىندە وڭىرلەر اراسىنداعى تەحنيكانى تاسىمالداۋعا باسا نازار اۋدارىلدى.

دەپۋتات حالىقپەن بىرقاتار جيىن وتكىزىپ، مەملەكەت تاراپىنان كورسەتىلەتىن كومەكتىڭ الگوريتمىن ءتۇسىندىردى. وبلىستا بارلىعى 125 وتباسى سۋ تاسقىنىنان زارداپ شەككەن. الدىن الا ەسەپتەۋلەر بويىنشا كەلتىرىلگەن شىعىن كولەمى 207,9 ملن تەڭگە. بۇگىنگى تاڭدا 71 وتباسى تۇرعىن ءۇيدى جوندەۋ جانە قالپىنا كەلتىرۋ ءۇشىن 38,3 ملن تەڭگە تولەم الدى. سۋ تاسقىنىنان الەۋمەتتىك نىساندار زارداپ شەككەن جوق.

Abai.kz