ءماجىلىس دەپۋتاتتارىنىڭ سۋ تاسقىنىنا بايلانىستى وڭىرلەرگە ساپارى جالعاسۋدا. ولار اپاتتىڭ الدىن الۋ، زارداپ شەككەن تۇرعىندارعا قولداۋ كورسەتۋ جانە باسقا دا ماسەلەلەر بويىنشا جۇمىس ىستەپ جاتىر. ءماجىلىس دەپۋتاتتارى ءادىل جۇبانوۆ پەن ەدىل جاڭبىرشين اتىراۋ وبلىسى تۇرعىندارىمەن جانە بوگەت تۇرعىزىپ جاتقان جۇمىسشىلارمەن كەزدەستى.

اپات باستالعالى اۋىلداستارىمەن بىرگە جۇرگەن ءادىل جۇبانوۆتىڭ ايتۋىنشا، بۇگىندە اتىراۋ وبلىسىنىڭ جىلىوي، قىزىلقوعا اۋداندارى سۋعا كەتكەن. قازىرگى تاڭدا جەرگىلىكتى بيلىك، جەكە كاسىپورىندار مەن قارۋلى كۇشتەردىڭ رەسۋرستارى جۇمىلدىرىلىپ، وبلىستىق، اۋداندىق شتابتار جۇمىس ىستەپ جاتىر.

سۋرەت: ءماجىلىستىڭ ءباسپاسوز قىزمەتىنەن الىندى

– ونداعان جىل بويى كەلمەگەن سۋ عوي. سوندىقتان جەرلەر جەكە قوجالىقتارعا ءوتىپ، تابيعي ارنالارى جابىلىپ قالعان. ودان بولەك تەڭىزدەن تاسىمالداناتىن مۇناي ترۋبالارى تارتىلعان. سولاردىڭ ءبارى سۋدىڭ تابيعي جولمەن كەتۋىنە كەدەرگى بولىپ وتىر.  ەندىگى ماقساتىمىز – رەسەيدەن كەلەتىن الاپات سۋدان اتىراۋ قالاسىن امان الىپ قالۋ. جايىقتىڭ بويىنداعى يندەر، ماحامبەت اۋداندارىندا بوگەتتەر سالۋ، بەكىتۋ  جۇمىستارى قارقىندى ءجۇرىپ جاتىر، – دەدى ءا. جۇبانوۆ.

ساپار بارىسىندا دەپۋتاتتار اتىراۋ بەلسەندىلەرى تۇرعىزىپ جاتقان سوكولوك كانالىمەن، قالا ىشىندەگى ۇزىندىعى 20 شاقىرىم بولاتىن بوگەتتىڭ جۇمىسىمەن تانىستى.  ماحامبەت اۋدانى اكىمىنىڭ  ايتۋىنشا، اۋداننىڭ 21 ەلدىمەكەنىنىڭ 17-ءسى جايىق وزەنى جاعالاۋىندا ورنالاسقان. 85 شاقىرىم ەسكى بوگەتتىڭ ورنى بار، ەندى تاعى قوسىمشا 15 شاقىرىم بوگەت سالىنىپ جاتىر. جالپى العاندا بوگەتتىڭ ۇزىندىعى 100 شاقىرىمدى قۇرايدى.

سۋرەت: ءماجىلىستىڭ ءباسپاسوز قىزمەتىنەن الىندى

ءوز كەزەگىندە ءماجىلىس دەپۋتاتى ەدىل جاڭبىرشين توپان سۋدان قورعانۋدىڭ ءتۇرلى ءادىسىن ۇسىندى. ونىڭ ايتۋىنشا، اۋىلعا سۋ كىرمەس ءۇشىن بوگەتتەرمەن قورشاپ، ءدارى-دارمەك، ازىق-تۇلىك پەن جانار-جاعار مايدىڭ قورىن جاساپ الۋ كەرەك.

سۋرەت: ءماجىلىستىڭ ءباسپاسوز قىزمەتىنەن الىندى

ءماجىلىس دەپۋتاتى رينات زايتوۆ سۋ تاسقىنىنان كەيىنگى ەلدىڭ جاعدايىن ءبىلۋ ءۇشىن اقسۋات اۋدانىنا باردى. اۋدان اكىمى اسحات سمايلوۆ تاسقىن سالدارىنان بۇلىنگەن بوعاس وزەنىندەگى كوپىردى، وبلىستىق ماڭىزى بار «ساتباەۆ-اقسۋات» جولىن كورسەتىپ، قالپىنا كەلتىرۋ بويىنشا اتقارىلاتىن جۇمىستار تۋرالى ايتىپ بەردى.

بوعاس وزەنى دەڭگەيىنىڭ تاسىپ كوتەرىلۋىنەن اقسۋاتتان كىندىكتى اۋىلىنا اپاراتىن كوپىردى سۋ شايىپ، اۋدان ورتالىعىمەن ۋاقىتشا جول قاتىناسى ۇزىلگەن. الايدا جەرگىلىكتى اتقارۋشى بيلىك جاعدايدى جەدەل رەتكە كەلتىرۋگە كىرىستى.

سۋرەت: ءماجىلىستىڭ ءباسپاسوز قىزمەتىنەن الىندى

وڭىرلەرگە ساپار اياسىندا اينا ءمىسىرالىموۆا مەن داۋلەت مۇقاەۆ اقمولا وبلىسىنىڭ بىرنەشە اۋدانىن ارالادى. ارشالى اۋدانى جىبەك جولى اۋىلىنىڭ ىرگەسىندەگى نۇرا وزەنىنىڭ تاسۋىنا بايلانىستى قازىر اۋىلداعى جاعداي كۇردەلى. ءار ەكى ساعات سايىن سۋدىڭ دەڭگەيى ولشەنىپ وتىر. 35 مىڭ قۇم سالىنعان قاپتان بوگەت تۇرعىزىلىپ، 50 ارنايى تەحنيكا جۇمىلدىرىلعان.

دەپۋتاتتار ودان ءارى تسەلينوگراد اۋدانى تالاپكەر اۋىلىنا بارىپ، ونداعى جاعدايمەن تانىستى. بىرنەشە كۇن بۇرىن اۋلالاردى سۋ باسقانىمەن، قازىرگى جاعداي تۇراقتى. اۋىل ىرگەسىن بەكىتۋ جۇمىستارى قولعا الىنعان.

سۋرەت: ءماجىلىستىڭ ءباسپاسوز قىزمەتىنەن الىندى

ال قازىبەك الىشەۆ پەن اسقار سادىقوۆ اقتوبە وبلىسىنىڭ قۇمساي اۋىلى تۇرعىندارىمەن جۇزدەستى. ساركول اۋىلدىق وكرۋگىنىڭ قۇمساي اۋىلىنداعى 39 ءۇيدى، 1 شارۋا قوجالىعى مەن 1 كاسىپكەرلىك نىساندى سۋ باسقان. قازىرگى ۋاقىتتا اۋىلداعى 27 ءۇي تۇرۋعا جارامسىز.

سۋرەت: ءماجىلىستىڭ ءباسپاسوز قىزمەتىنەن الىندى

ءماجىلىس دەپۋتاتتارى بۇدان بۇرىن تۇرعىندارمەن كەزدەسىپ، ءوتىنىشى-تىلەكتەرىن تىڭداعان بولاتىن. وسى كەزدە حالىق مالىن تاستاپ كەتە المايتىندارىن ايتىپ، جاڭادان ءۇي سالىنىپ بىتكەنشە جىلى ۆاگوندار سۇرادى. قازىر اۋىلعا ۆاگوندار جەتكىزىلىپ، ەلەكتر جەلىسىنە قوسىلعان. اقتوبەدەگى ەكى سۋ قويماسىنىڭ تولىپ كەتۋ قاۋپى سەيىلدى. زارداپ شەككەندەرگە 300 تونناعا جۋىق كومەك جينالدى. 206 ادامعا 64 ملن تەڭگە كولەمىندە بىرجولعى الەۋمەتتىك تولەم جاسالعان. 11 ەلدىمەكەنمەن ۇزىلگەن جول قاتىناسىن قالپىنا كەلتىرۋ جۇمىستارى ۇزدىكسىز جۇرگىزىلىپ جاتىر.

Abai.kz