دۇنيەجۇزىلىك كوشپەندىلەر ويىنى - تۇركى حالىقتارى اراسىنداعى قارىم-قاتىناستى ارتتىرۋعا تىڭ سەرپىن بەرەدى – قوشانوۆ
ءماجىلىس توراعاسى ەرلان قوشانوۆ ەلوردادا V دۇنيەجۇزىلىك كوشپەندىلەر ويىندارىنىڭ باستالۋىنا قانشا كۇن قالعانىن كورسەتىپ تۇراتىن كەرى ساناق تاقتاسىن سالتاناتتى تۇردە ىسكە قوسۋ راسىمىنە قاتىستى. بۇگىننەن ساناپ باستاساق، قازاقستاندا وتەتىن كوشپەندىلەر ويىندارىنا 171 كۇن قالدى.
جيىنعا دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان، تۋريزم جانە سپورت ءمينيسترى ەرمەك مارجىقباەۆ، استانا قالاسىنىڭ اكىمى جەڭىس قاسىمبەك، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ قاتىستى.
ءماجىلىستىڭ ءباسپاسوز قىزمەتى. سۋرەتتى تۇسىرگەن ج.جۇمابەكوۆ
سالتاناتتى ءراسىمدى اشقان ءماجىلىس سپيكەرى جينالعان قاۋىمدى ۇلىستىڭ ۇلى كۇنى – ناۋرىز مەرەكەسىمەن قۇتتىقتاپ، دۇنيەجۇزىلىك كوشپەندىلەر ويىنى تۇركىتىلدەس حالىقتاردىڭ عانا ەمەس، الەمنىڭ نازارىن اۋدارعان بايراقتى باسەكە ەكەنىن اتاپ ءوتتى.
سونداي-اق ەرلان قوشانوۆ قازىرگى ۋاقىتتا ەلىمىزدە الەمدىك جارىسقا دايىندىق قارقىندى جۇرگىزىلىپ جاتقانىن ايتتى.
ءماجىلىستىڭ ءباسپاسوز قىزمەتى. سۋرەتتى تۇسىرگەن ج.جۇمابەكوۆ
– وسى ءدۇبىرلى جارىستى قازاقستاندا ابىرويمەن وتكىزۋ – بارشامىز ءۇشىن ۇلكەن مارتەبە، زور جاۋاپكەرشىلىك. مەملەكەت باسشىسى بۇل دودانى جوعارى دەڭگەيدە ۇيىمداستىرۋدى تاپسىردى. ءبىز كوشپەندىلەر ويىنىن ءسان-سالتاناتىمەن لايىقتى دەڭگەيدە وتكىزەمىز دەپ زور سەنىممەن ايتا الامىن. بۇل سايىس باۋىرلاس تۇركى حالىقتارى اراسىنداعى ءوزارا ىنتىماقتاستىق پەن مادەني قارىم-قاتىناستى ارتتىرۋعا تىڭ سەرپىن بەرەدى. ەلدەرىمىزدىڭ اراسىنداعى رۋحاني بايلانىستى ودان ءارى نىعايتا تۇسەدى دەپ سەنەمىن، – دەدى ءماجىلىس سپيكەرى.
ءماجىلىستىڭ ءباسپاسوز قىزمەتى. سۋرەتتى تۇسىرگەن ج.جۇمابەكوۆ
قازاقستاندا وتەتىن كوشپەندىلەر ويىنىنا الەمنىڭ 100 ەلىنەن وكىلدەر قاتىسادى دەپ كۇتىلىپ وتىر. قازىردىڭ وزىندە 60 ەلدىڭ كەلىسىمى بار. سپورتتىڭ 20 تۇرىنەن 4 مىڭعا جۋىق قاتىسۋشى سىنعا تۇسەدى. ۇلى دالا ءتوسىن دۇبىرگە بولەيتىن مەرەكە ءبىر اپتاعا سوزىلادى.
ءماجىلىستىڭ ءباسپاسوز قىزمەتى. سۋرەتتى تۇسىرگەن ج.جۇمابەكوۆ
سالتاناتتى راسىمنەن سوڭ مەيماندار «ناۋرىز مەيرامى استانا 2024» قولونەرشىلەر جارمەڭكەسىن ارالاپ، ۇلىستىڭ ۇلى كۇنىنە ارنالعان مەرەكەلىك كونتسەرتتى تاماشالادى.
ءماجىلىستىڭ ءباسپاسوز قىزمەتى. سۋرەتتى تۇسىرگەن ج.جۇمابەكوۆ
Abai.kz
