بۇگىن استانادا وتكەن ءى رەسپۋبليكالىق ۋاعىزشىلار فورۋمىندا "ۋاعىز-ناسيحات ايتۋدىڭ ادەبى مەن مادەنيەتى" تۇعىرناماسى قابىلداندى.

تۇعىرنامانىڭ قابىلدانۋىنا بىرنەشە سەبەپتەر تۇرتكى بولعان. ماسەلەن، وسىعان دەيىن الەۋمەتتىك جەلىلەر ارقىلى قاتە ۋاعىز ايتاتىن، ۇندەۋ جاسايتىن ءدىن وكىلدەرىنىڭ كوبەيگەنىن ايتىپ، باس ءمۇفتي ناۋرىزباي قاجى تاعانۇلى ەسكەرتۋ جاساعان بولاتىن.

ء"بىزدىڭ نايب-مۇفتيلەرىمىز، ۋاعىز-ناسيحاتقا جاۋاپتى ازاماتتار وڭىرلەرگە بارعان كەزدە قاتەلەسكەن ءدىن قىزمەتكەرلەرى بولسا، جولىعىپ، ناسيحات جۇمىستارىن جۇرگىزەدى. ايتپەسە، ەلدى، جاماعاتتى شاتاستىرۋ – كۇنا. ال يمامدار ءبىرىن-ءبىرى الەۋمەتتىك جەلىدە سىناعاننان گورى، قاتەلىكتى ۋشىقتىرۋدان گورى، الدىن الىپ وتىرعان دۇرىس", – دەگەن بولاتىن باس ءمۇفتي.

قمدب ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆتىڭ ايتۋىنشا، جاڭادان ەنگىزىلگەن تۇعىرنامادا ۋاعىز ايتىپ، جاماعاتقا ادال مەن ارامدى ءتۇسىندىرىپ جۇرەتىن يمامدارعا قاجەتتى ەرەجە-قاعيدالار قامتىلعان.

"بۇل قۇجاتتىڭ ماقساتى – قمدب-نا قاراستى مەشىتتەردە ۋاعىز-ناسيحات جۇمىستارىنىڭ بىرىزدىلىگىن قامتاماسىز ەتۋ، ءدىن قىزمەتكەرلەرىنە ءدىنىمىزدىڭ قۇندىلىقتارىن دۇرىس باعىتتا دارىپتەۋ ءۇشىن باعىت-باعدار بەرۋ، ۋاعىز-ناسيحات ايتۋدىڭ مەتوديكاسىنا نازار اۋدارۋ جانە ءدىني ۋاعىز-ناسيحاتتىڭ مودەلىن قالىپتاستىرۋ", – دەپ اتاپ ءوتتى باتىرجان مانسۇروۆ.

Abai.kz