بۇقار جىراۋ اۋدانىنىڭ بوتاقارا كەنتىندە زارداپ شەككەندەرگە كەلتىرىلگەن زالالدى باعالاۋ جونىندە ارنايى كوميسسيا قۇرىلادى. بارلىعىنا قاجەتتى كومەك كورسەتىلەدى.

– ەڭ الدىمەن، قازا تاپقانداردىڭ تۋىستارىنا كوڭىل ايتقىمىز كەلەدى. قازا تاپقانداردىڭ وتباسىلارىنا كومەك كورسەتىلەدى. ءبىز زالالدى باعالاۋمەن اينالىساتىن كوميسسيا قۇرامىز. ەشكىمدى پروبلەماسىمەن جالعىز قالدىرمايمىز، – دەدى اۋدان اكىمى ابىلاي سۇلتانعالي.

جەرگىلىكتى اتقارۋشى ورگان جەرگىلىكتى سيپاتتاعى تج جاريالادى.

اۋدان اكىمىنىڭ ايتۋىنشا، ءۇي قازميرر ساراپشىلارىنىڭ قاتىسۋىمەن تەكسەرىلىپ جاتىر. تۇرعىندار ازىرگە تۋىستارىنىڭ ۇيلەرىندە ورنالاستىرىلعان، ولاردى ودان ءارى قونىستاندىرۋ جانە ءۇيدىڭ تاعدىرى تۋرالى ماسەلەلەر شەشىلەتىن بولادى.

بوتاقارا كەنتىندە 30 قاڭتار ساعات 00:07-دە ەكى قاباتتى 12 پاتەرلى ۇيدە ەكىنشى قاباتتاعى پاتەردە تسيليندرلىك گاز جارىلدى.

پاتەردىڭ ۇستىندەگى شاتىر، قابىرعالار مەن ەدەندەر، سونىڭ ىشىندە ءبىرىنشى قاباتتاعى پاتەر تولىعىمەن قيرادى. باسقا پاتەرلەر دە ءىشىنارا زاقىمدالعان.

ۇيدە تۇراتىن 46 تۇرعىننىڭ 35-ءى جارىلىس كەزىندە ۇيلەرىندە بولعان. تج سالدارىنان ەكى ادام قازا تاۋىپ، بەسەۋى زارداپ شەكتى. زارداپ شەككەندەردىڭ اراسىندا ءۇش بالا بار. دارىگەرلەردىڭ تەكسەرىسىنەن كەيىن ەكى بالا ۇيىنە جىبەرىلدى. ءبىر بالا وبكا-عا جەتكىزىلدى، سونىمەن قاتار اۋرۋحانادا ەكى ەرەسەك ادام بار، ولاردىڭ بىرەۋى وتە اۋىر جاعدايدا.

وقيعا ورنىندا جەدەل شتاب جۇمىس ىستەيدى.

– ۇيىندىلەر تازارتىلدى. جەرگىلىكتى اتقارۋشى ورگاندار بارلىق قاجەتتى تەحنيكانى ۋاقتىلى ۇسىندى، سونىڭ ارقاسىندا بەس ادام قۇتقارىلدى. ادامدار ۇيىندىلەردىڭ استىندا، پليتالاردىڭ استىندا قالىپ قويعان. كراندار مەن ءۇش ەكسكاۆاتور تارتىلدى. قازىر تجد مەن پوليتسيا قىزمەتكەرلەرى تەكسەرۋ جۇرگىزۋدە. جارىلىستىڭ الدىن-الا سەبەبى – گاز باللونىنىڭ دۇرىس جۇمىس ىستەمەۋى. گاز باللونى سۋىقتان جىلى بولمەگە كىرگىزىلگەن. بولعان وقيعاعا كىم كىنالى ەكەنىن قۇقىق قورعاۋ ورگاندارى انىقتايدى، – دەدى قاراعاندى وبلىسى تجد باستىعىنىڭ ورىنباسارى امانبەك بەيسەمباەۆ.

دەرەككوزى: قاراعاندى وبلىسىنىڭ اكىمدىگى. سۋرەتتەر اكىمدىك سايتىنان الىندى

Abai.kz