«AMANAT» فراكتسياسىنىڭ  دەپۋتاتتارى ج. امانتايۇلى، ن. اشىمبەتوۆ، ۆ. كيم «مايقايىڭ التىن» اكتسيونەرلىك قوعامىنا قاتىستى پروبلەمالاردى كوتەرىپ، دەپۋتاتتىق ساۋال جولدادى.

جىل باسىندا پاۆلودار وبلىسىنىڭ باياناۋىل اۋدانىنداعى «مايقايىڭ التىن» اكتسيونەرلىك قوعامى اۋماعىندا ورىن العان اپات قابىرعامىزدى قايىستىردى.

كاسىپورىندا قىزمەت اتقاراتىن ءتورت بىردەي ازامات اۆتوبۋس ىشىندە كەنەتتەن وپىرىلعان جەر استىنا قۇلادى. ونىڭ ەكەۋى مەرت بولسا، قالعان ەكى ازاماتتىڭ تاعدىرى ءالى دە بەيمالىم. ون كۇننەن استام ۋاقىت ىزدەۋ-قۇتقارۋ جۇمىستارى جالعاسۋدا. ءالى اۆتوبۋستا، قالعان ەكى ازاماتىمىز دا تابىلمادى.

قاقاعان قىستىڭ ىزعارىنا قاراماستان تاۋلىك بويى ءجۇرىپ جاتقان قۇتقارۋ جۇمىستارىنا وبلىس اكىمدىگىنىڭ جاۋاپتى قىزمەتكەرلەرى مەن باسشىلىعى قاتىسىپ وتىر. قاجەتتى كومەك ءاربىر وتباسىنا كورسەتىلىپ جاتىر.

ەڭ وكىنىشتىسى، قۇلاعان جەردىڭ استىنا بۇرىندارى شاحتا بولعانىن ەشكىم ەسكەرتپەگەن. ءتىپتى ۇستىنەن جول سالعان جانە سول جولدى قىزمەتكەرلەر وسى كۇنگە دەيىن پايدالانىپ كەلگەن.

ال، تەحنيكالىق قاۋىپسىزدىك شارالارىنا ساي، ول جەردى قورشاۋعا الىپ، قاۋىپتى زونا رەتىندە وقشاۋلاپ تاستاۋ كەرەك ەدى. دەگەنمەن، بۇل ماسەلەنىڭ باسى عانا. بۇل ءبىر.

كەلەسى، كەنتتە تۇراتىن «شانحاي» شاعىن اۋدانىنىڭ تۇرعىندارى الاڭداپ وتىر. وعان سەبەپ شاعىن اۋداننىڭ استى دا شاحتاعا اينالىپ كەتكەن دەيدى. كەن قازۋ بارىسىنداعى جارىلىستاردان ءۇي ىرگەسى سولقىلداپ كەتەتىنىن ايتىپ وتىر. 100-گە جۋىق شاڭىراق ورنالاسقان اۋماق، قازىرگى وپىرىلىپ قۇلاعان جەردەن نەبارى 500 مەتر قاشىقتىقتا ورنالاسقان.

بۇگىندە 10 مىڭعا جۋىق حالىق تۇراتىن ەلدى مەكەننىڭ نەگىزگى تىرشىلىك كوزى دە وسى كەن ورىندارىندا. تەك «مايقايىڭ التىندا» مىڭنان استام جەرگىلىكتى تۇرعىندار ەڭبەك اتقارادى.

«مايقايىڭ التىن»  رەسمي سايتىنداعى مالىمەتتەرگە سۇيەنسەك، كاسىپورىن قۇرىلعان ۋاقىتتان بەرى مۇندا 16,7 ملن توننا كەن وندىرىلگەن. بۇل دەگەنىمىز – 80 توننا التىن، 1 240 توننا كۇمىس، 204 مىڭ توننا مىس، 300 مىڭ توننا مىرىش. 13 ملن توننادان استام كەن كاسىپورىنعا قاراستى كەن بايىتۋ فابريكاسىندا قايتا وڭدەلگەن.

سويتە تۇرا، «مايقايىڭ التىن» ءوز قارجىسىنا كەنتتە ەشقاشان تۇرعىن ءۇي سالماعان، بالالار الاڭى، سپورتتىق نەمەسە الەۋمەتتىك نىساندار تۇرعىزباعان.

تەك جىلىنا جەرگىلىكتى بيۋدجەتكە باردى-جوقتى الىم-سالىق تولەپ كەلگەن.

ال، ەندى وسى اكتسيونەرلىك قوعامنىڭ 100 پايىز اكتسياسى كيپر رەسپۋبليكاسىندا ورنالاسقان «Rence Enterprises LTD» كومپانياسىنا تيەسىلى. ول كومپانيا ميلان پوپوۆيچ دەگەن بيزنەسمەنگە تيەسىلى.

ەلىمىزدىڭ بايلىعىنا كەنەلگەن بۇل باي-پاتشالاردىڭ ءىسىن كىم قادالاۋعا الادى.

وسىعان بايلانىستى،

ءبىرىنشى. كوميسسيانىڭ جۇمىسىن اشىق ءارى جۇرتشىلىقپەن، جەرگىلىكتى تۇرعىندارمەن بىرلەسە وتىرىپ ۇيلەستىرۋ كەرەك.

ەكىنشى. وسى ماڭداعى بارلىق شاحتالىق جۇمىس جۇرگىزىلگەن اۋماقتاردى انىقتاپ، ولاردى قاۋىپسىزدىك ەرەجەلەرىنە ساي وقشاۋلاۋ كەرەك.

ءۇشىنشى. شاحتانىڭ ماڭىندا ورنالاسقان شاعىن اۋىلدىڭ تۇرعىندارىنا بارلىق قاۋىپسىزدىك جاعدايىن قاراستىرۋ قاجەت.

ءتورتىنشى. ەلىمىزىدىڭ بايلىعىن پايدالانىپ، بىراق الەۋمەتتىك كومەكتى دەر كەزىندە كورسەتپەي وتىرعان شەتەلدىك كومپانيالارعا زاڭ جۇزىندە قاتاڭ شارالار قولدانىلىپ ەسكەرتۋ جاسالۋى قاجەت.

بەسىنشى. ورىن العان اپاتقا جانە تەحنيكالىق قاۋىپسىزدىكتىڭ ساقتالماۋىنا تۇرتكى بولعان جاعدايعا پروكۋراتۋرا ادىلەتتى باعاسىن بەرۋى قاجەت.

Abai.kz